Ta-moe-nge Ah A Um Mi Ralkap LIB 123 Sakhaan KIA Nih AN Lak, Ralkap Lei 50 Reng Lo An Thi!
=========
Shan ram, Kutkai peng, Ta-moe-nge khua ah a um mi ralkap LIB 123 sakhaan cu KIA nih an lak tiah KIA thawngzamhnak nih a thanh. November 12 ah Ta-moe-nge khua, Ka-ta-nai sakhaan khua ah hram a bunh mi ralkap LIB 123 sakhaan cu KIA Brigade 6 nih an kah i sakhaan an lak beh hi a si. Cu sakhaan cu November 13 ah an lak khawh i ralkap lei 50 reng lo an thi, hriam tampi zong an lak khawh tiah theih a si.
Kutkai le Tangyan Ah A Um Mi Ralkap Le Pyithusit Sakhaan 3 TNLA Nih An Lak. Shan ram, Kutkai pengle Tangyan peng ah a um mi ralkap le pyithusit sakhaan 3 cu TNLA nih an lak tiah TNLA nih an thanh.
November 10 zaan sml 12:00am hrawng ah Kutkai peng ah a um mi ralkap kuttang pyithusit sakhaan cu TNLA nih an lak, November 14 zinglei sml 4:00am hrawng ah Kutkai peng, Lwaikan khua pawng ah a um mi ralkap le pyithusit sakhaan cu TNLA nih an lak chap i sakhaan chung um kahdohnak thilri pawl zong an lak khawh tiah theih a si.
Cubantuk in November 14 ah Tangyan peng ah a um mi ralkap ralkap Sai-Hlian sakhaan zong TNLA nih an lak. November 14 ah Kutkai peng ah a um mi ralkap kuttang Mon-hyun pyithusit phu le Monpaw pyithusit phu hna cu TNLA sin ah hriam zuun 10 an rak ap. Cun November 15 zinglei sml 5:00am hrawng ah Kyaukme peng, Naungpyit khua lamṭhen ah ralkap le TNLA hna karlak ah kahdohnak a fak tiah theih a si.
Loikaw Kahdohnak Ah Ralkap 110 Leng An Thi. Karen ram, Loikaw University ah hmunhma a khuar mi ralkap pawl an kah hna i 110 leng an thi, tlaih mi ralkap zong an tam i adang tang mi ralkap vialte nih a sung an pek tiah KNDF nih nihin November 15 ah thawng a thanh.
Loikaw University tual chung ah Brigade 66 kuttang ralkap pawl cu Kareni dothlennak phu pawl nih a luancia November 13 thawk in an kah hna. Ni 2 chung kahdohnak LIB 425 in Battalion Commander le Second Battalion Commander telh in Battalion an zapi le IB 6 in battalion a cheu hrawng an thi i a zapi a thi mi ralkap hi 110 leng an si i tlaih mi ralkap 38 an um tiah KNDF nih a thanh. Cun hriamngan/hme 128 le kuanzen pawl tampi an lak khawh.
November 14 zaanlei ah Loikaw University tualchung ah a hnu bik a tang mi ralkap pawl a sung pek ding in caan an awnh hna caah Commander Kaung Myat hruai mi ralkap 32 nih a sung an pek tiah an langhter.
Kantbalu Peng, Natinn Le Wettoe Khua Pyusawhti Ralhrang Sakhan An Kah 8 An Thi. Sagaing ramṭhen, Kantbalu peng, Natinn le Wettoe khua ah a ummi Pyusawhti ralhrang sakhan cu mipi ralkap nih Hriamngan in an kah tiah, Kyunhla-Kantbalu cawlcanghnak phu chungin ṭuanvo ngeitu pakhat nih Yangon Khit Thit ah a chim.
November 14, zing suimilam 8:00 tluk khan Kantbalu peng, Natinn khua, Pyusawhti ralhrang thazaang 100 tluk umnak sakhan ah raltuknak hmunhma a sertu hna cu mipi ralkap nih MM 81 hriamngan in an kah hna hliamtuar an um tiah theih a si. Kahdohnak hi KBU-UG group le tanglei local group hna ansi i, Kantbalu SAC ralhrang battalion 606 nih rak bawm in hriamngan an kah, sihmanhsehlaw mipi ralkap hliamtuar lo in an kir tiah an langhter.
Cu bantuk ṭhiam in, Kantbalu khuapi thlanglei Wettoe khua ah a ummi Pyusawhti ralhrang sakhan cu November 11, zaan khan mipi ralkap nih luhhnawh in an kah hna 8 an thi, 4 hliam an tuar, meithal 10 an lak, tiah Infinity Group nih an chim.