KIA Brigade 9 Humhaknak Ananhpa Hmunram Ah SAC Ralhrang Nih Jet Vanlawng 2 In Bomb A Thlak
=========
Kachin ramkulh, Hpakant khuapi KIA brigade 9 humhaknak Ananhpa hmunram chung ah SAC ralhrang nih nizan October 16, zanlei suimilam 4:00 tluk ahkhan raltuknak vanlawng 2 in bomb a thlak, tiah kan theih. “SAC ralhrang nih atu bantuk in bomb a thlakmi ruang ah mipi nunnak liammi le hliam a pumi zong an um nain thawngfiang cu kan thei kho rih lo. Kahdohnak a faak khomi a si caah hlathlainak zong kan tuah kho rih lo” tiah tualchung mi pakhat nih Kachin News ah a chim.
Aluan ciami October 14 zong ahkhan Hpakant lampi ah rallam a sialmi SAC ralhrang pawl le KIA, PDF fonh karlak ah kahdohnak a chuak, tiah tualchungmi hna nih an chim. Aluan cia 2022, October 23 lio zong ah KIA brigade 9 humhaknak simi Ananhpa hmunram chung ah SAC ralhrang nih vanlawng in bomb a rak thlak caah mipi 30 leng an nunnak a rak liam cang, tiah kan theih.
No.1 Hmunram September Thlachung Kahdohnak Ah Mipi Ralkap 42 An Nunnak A Liam. Ralram No.1 hmunram chung um Sagaing ramṭhen, Magway ramṭhen, Mandalay ramṭhen le Shan ramkulh chaklei hna ah aluan cia 2023, September thlakhat chung lawng ah mipi ralkap 42 an nunnak a liam i 29 nih hliamhma an tuar, tiah NUG cozah in runvennak vuanci nih cathanh a chuah.
September thlakhat chung lawng ah ralram hmun No.1 chung um mipi ralkap PDF hna le SAC ralhrang karlak ah kahdohnak voi 323 a chuak i SAC ralhrang 175 an thi pinah 301 nih hliam an tuar, tiah a langhter.
PDF chungtel hna nih Drone in voi 145 an kahdoh hna pinah voi 55 an kah hna. SAC ralhrang nih cunglei in voi 5, Drone in voi 6 tiang an kah ve hna. Mah kahdohnak hna cu ralram hmun No.1 chung um PDF, Pah-kah-phah le EROs ṭangṭi phu hna nih an hruai hna, tiah a langhter chih.
Hi kahdohnak chung ah SAC ralhrang sin in hriamthil phun 46, kuan 3518, bomb thei lung 5 le lamhmi bomb lung 3 hna zong PDF nih an laak chih khawh, tiah NUG cozah in runvennak zung nih cathanh an chuahmi in theih chih a si.
Khin-U Khuapi SAC Ralhrang PDF Nih An Kah Hna; 3 An Thi I Meithal Zuun 2 An Laak. Sagaing ramṭhen, Khin-U khuapi ah umhmun a khuarmi SAC ralhrang pawl cu PDF nih an kah hna caah ralhrang 3 an thi i MA-1 meithal zuun 2 zong kan laak khawh chih, tiah Khin-U peng Pah-kah-phah in ṭuanvo ngeitu pakhat nih a chim.
“October 17 zing ahkhan khuapi chung ah SAC ralhrang nih umhmun an khuarnak hmu 2 cu suimilam caan tlawmpal chung kan kah hna caah SAC ralhrang 2 cu hmakhat te ah an thi colh, hliam faak tuar bu in a zaam mi 1 zong siizung an phak pi hnu ah a thi ve” tiah a cunglei upa nih Khit Thit ah a chim. Hi kahdohnak ah SAC ralhrang sin in MA-1 meithal zuun 2 zong kan laak khawh chih i mipi ralkap hna cu himte in hnulei kan tolh kho ṭhan, tiah a chimchap.
Yinmarbin, Thegon Khua Ngakchia 3 Telh In Mipi 6 SAC Ralhrang Nih An Lu An Tan Hna! Sagaing ramṭhen, Yinmarbin peng, Thegon khuami ngakchia 3 hna telh in mipi 6 SAC ralhrang nih an tukvelh hna hnu ah an lu an tan hna, tiah tualchung mi hna nih an chim.
“October 16 zing ah Pale khuapi in Yinmabin peng ah rallam sial SAC ralhrang pawl nih atu bantuk in an lu an tan hna hi a si i khua a chuahtak mi hna nih khuachung an luh ṭhan lio ah an ruak cu an hmuh hna hi a si. Tanbo in an lu ah an tukthah hna, mipi ralkap zong an si lo i mipi menmen an si ko” tiah tualchung mi pakhat nih Khit Thit ah a chim.
Thah a tongmi hna cu The-gon khuami Pa Zaw Mg, Pa Zaw Thu, Pa Mg Lin hna an si i kum 30 hrawng an si hna. Cu pinah kum 17 tluk a simi siangngakchia pa 3 hna Pa Khat Nay Nine, Pa That Zin Oo, Pa Than Hteih Aung hna an si, tiah a chimchap.
SAC ralhrang nih khuami 1 an tlaih i cu hnu ah a dang khuami pawl cu phone an chawnh hna hnu ah atu bantuk in an thah hna hi a si. Mah ralhrang pawl cu The-gon khua an luhhnawh hnu ah a pawngkam khuate 2 zong an hrawh piak hna i Minthargon khua ah atu hi umhmun an khuar, tiah tualchung mi hna nih an chim.
NCA Kum 8 Tlin Camtuak Tonpumhnak Ah Aa Telmi ABSDF Chungtel 3 An Rian In An Phuah Hna. Myanmar ram pumpi kahdaihnak NCA kum 8 tlinnak camtuak tonpumhnak ah a kaimi All Burma Students’ Democratic Front(ABSDF) chungtel 3 hna cu an rian in kan phuah hna, tiah ABSDF nih cathanh an chuah.
ABSDF nih kan ngeihmi phunglam hna cu buar in kanmah ABSDF chungtel lila nih 2023, October 16 ah SAC ralhrang nih an tuahmi NCA kum 8 tlinnak camtuak tonpumhnak hmun i anmah nawl in an kalmi ruang ah an rian in kan phuah hna hi a si, tiah an langhter. Rampi kahdaihnak NCA kum 8 tlinnak camtuak ah hin ABSDF hruaitu hna zong i telve ding in sawm kan si nain kan duh lo pinah mizei hriamtlai phu hmanh kanmah ai-awh in kal kan fial hna lo, tiah an langhter chih.