Chin ramkulh, Kanpetlet peng, Kyindway khuapi ah SAC ralhrang le CDF-Kanpetlet hna karlak ah kahdohnak a chuah liopi a si rih i ralhrial in aa dor mi tualchung mi hna nih bawmhnak an herh, tiah theih a si.
Kyindway khuapi ah aluan ciami December 22 in khuapi chung kahdohnak aa thok i nihin tiang pehtlai in kahdohnak a chuak rih caah khuapi chung in tualchung mi hna le a pawngkam um tualchung mi hna cu thla 2 leng ral an hrial cang hna i eidin lei ah chanbaunak tampi an ngei, tiah ralhrial mi pakhat nih a chim.
“Khuapi chung ah luhkhawh a si rih lo. Kahdohnak a chuah liopi a si rih i ral kan hrialnak hi thla 2 lengkai a si cang. Cucaah eidin awk bawmhchanh kan herh hringhran ko. Atu hrawng hi kan zualhma deuh” tiah a chim.
Ralhrial in aa dor mi khua 15 chung in tualchung mi hna cu tlang, dum/hau chung hna ah thlam sak in an i dor hna i atu hi CDF-Kanpetlet nih khuapi chung an laak khawh rih lo caah atu le tu kahdohnak a um i SAC ralhrang nih khuapi chung ah anmah lei i vennak ding fek ngai in an sak, tiah CDF-Kanpetlet Kkei sing Battalion in ṭuanvo ngeitu pakhat nih Zalen ah a chim ve.
“Kyindway khuapi laak khawh ding dirhmun ah kan dir lo. Kahdohnak cu nifate ti awk in a um i kahdohnak a fah deuh caan paoh ah SAC ralhrang nih raltuknak vanlawng pawl le Mi-35 helicopter in bomb a rak thlak. Khuapi chung ah tualchung mi hna an um ti lo i khuapi chung hnarcheu reng lo a rawk cang” tiah a chim.
Kyindway khuapi um SAC ralhrang pawl cu cozah inn (Building) pawl pawngkam hna ah anmah i vennak ding caah tiin fek ngai in an sak hna bantuk in CDF-Kanpetlet zong nih a bawmh peng ve hna, tiah theih a si. Crd:Lungmili Post