Mizei Hriamtlai Phu Ti Theih Lo Mi Pakhat Nih Khualtlawng Motor 2 An Kah I Minung 1 Nunnak A Liam, Tiah CDF-Kanpetlet Nih Thanh!
=========
Chin ramkulh, Kanpetlet peng, Makya pengkomh, Lungbawk khua hmunram chung ah mizei hriamtlai phu ti theih lo mi nih 2024, January 27, zing suimilam 11:00 tluk ah khualtlawng motor 2 cu an bawh i an kah caah motor khaltu minung 1 nunnak a liam, tiah CDF-Kanpetlet nih nihin January 28 ah thawng an thanh.
Kanpetlet peng No.5 hmunram chung ah mizapi nih umkal ṭhutto ralrin ding le thil pakhat khat a cansual ahcun a rannak in thawng nan kan thanh lai, tiah an langhter. CDF-Kanpetlet nih mizapi cungah harsatnak a petu hna paoh cu faakpi in kan doh hna. Cun, hi thil a tuahtu phu hna cu hlathlainak kan tuah cuahmah liopi a si i faakpi in dantatnak kan tuah lai, tiah CDF-Kanpetlet nih cathanh an chuah mi ah an langhter chih.
Kanpetlet Ram Chung Ah A Ho Ti Theih Lo Mi Hriamtlaiphu Nih Tualchungmi Motor 2 An Kah Hna Caah Motor Khaltu Nunnak Liam. Chin ramkulh Kanpetlet peng,Taikne 5 hmun Magya khua Auhsuh Lung Bauh khua ramri pawng ah tualchungmi hna motor 2 in khual an tlawn cuahmah lio ah min theih lo mi hriamtlai hna nih an kah hna caah motor khaltu pa a hmun ah a nunnak liam colh tiah January 28 Nihin zinglei ah thawng an thanh. Kanpetlet peng chung ah mizapi umkal ralrin ding in le thil pakhat khat a can tik ah CDF-Kanpetlet sin ah a rannak in thawng thanh ding in thawng thanhnak an tuah chih.
Hsihseng Khuapi Ah PNLA Nih PNO Pyithusit 3 Hna Cu Hriamnam Pawl He An Tlaih Hna. Shan ramkulh thlanglei, Hsihseng khuapi ah SAC ralhrang kuttang PNO pyithusit ralhrang 3 cu Pa-O National Liberation Army(PNLA) nih nizan 2024, January 27 ah hriamnam pawl he an tlaih hna, tiah theih a si.
“PNLA ralkap nih an i cit mi motor cu kah dingin an bawh timi thawng kan theih ca ah kan va kulh hna i, 3 kan tlaih hna. Cu pinah AK meithal zuun 1, Bomb 1, kuanfang 79 le WY rithaisii pawl zong kan tlaih chih hna” tiah Pa-O National Liberation Army(PNLA) ralkap pakhat nih Tachileik News Agency ah a chim.
PNLO cu SAC ralhrang nawlngeihnak a daih khawh i mizapi nih an duh mi Federal Democracy phunglam kan phak khawh tiang unau thum hna he hmunkhat ah kahdohnak ka tuah cang lai, tiah 2024, January 26 ah thawng an thanh.
Kyaukgyi Khuapi Ah Tualchung Mipi Ralhrial 17 SAC Nih An Tlaih Hna. Pago ramṭhen, Nyaunglebin pengkomh, Kyaukgyi khuapi ah riahcaw la mi tualchung mipi ralhrial minung 17 SAC ralhrang nih an tlaihkhih hna, tiah KNU nih a langhter.
SAC ralhrang nih tlaihkhih mi tualchung mipi ralhrial hna hi Kyaukgyi peng, Ahnanbaw khua mi an si i, riahcaw la dingin khua chung an kir lio ah SAC nih an tlaihkhih hna tiah theih a si.
SAC ralhrang nih an tlaihkhih mi hna hi (Nu 10 Pa 7) ansi i, cu lak ah nu 2 an umnak theih loin an tlau, tiah KNU nih a langhter.
Taungoo pengchung ah Kum 28 Leng An Rak Umnak SAC ralkap Sakhan Pathum An Chuahtak. Bago ramṭhen, Taungoo pengkomh ah SAC ralkap nih kum 28 leng an rak umnak sakhan pathum an chuahtak i Karen National Union (KNU) nih hmunhma thianhfelnak an tuah tiah theih a si.
Bago ramṭhen, Taungoo pengkomh KNU Brigade 2 hmun ah a um mi, SAC ralkap nih an rak chuh mi hna Military Operation Command – MOC. 20 kuttang um LIB 528 le LIB 593 Htinshoe sakhan cu a luancia January 13 ah an chuahtak, January 14 ah Bosakhee sakhan an chuahtak ṭhan i, January 15 ah Timupaw Soe sakhan zong an chuahtak tiah theih a si. January 20 ni ah Karen National Defence Organisation (KNDO) Battalion No. 4 le Special Brigade phu nih SAC nih an chuah tak mi sakhan 3 ah hmunhma thianhfelnak an tuah.
SAC ralkap Htinshoe sakhan cu KNU Brigade 2 le Brigade 5 ramri hmunram ah a um mi a si i a chung um SAC ralkap pawl cu thla zei mawzat chung riahcaw pe kho ti lo ding in KNLA le KNDO nih an kham hna hnu ah an chuahtak tiah theih a si.
January zarhkhatnak ah Bago ramthen, Thang Ta Pin peng chung um Musalay, Phalaysaloe le Kalawmide sakhan 3 zong SAC ralkap nih an chuah tak i Shwe Cin peng chung um Winkalay sakhan le Kuntphent sakhan zong SAC ralkap nih an chuah tak tiah BMC media nih a langhter.
Photo- Taungoo peng SAC sakhan 3 a si mi, Htidawpin Htinshoe sakhan), Bosakhee sakhan, Timupaw soe sakhan cu SAC ralkap nih an chuah tak hnu ah KNDO battalion 4 le Brigadet bu hna nih sakhan mei an khangh lio hmanthlak