Khuami An Zaam Kar Ah Khampat Khua Inn 15 Leng A Kaang!
=========
Sagaing ramṭhen, Tamu peng, Khampat khua cu SAC ralkap le tualchung hriamtlai phu kar kahdohnak ruangah a luancia July 23 in tualchung mipi dihlak nih an rak zaamtak i, culio ah no.1 sangchung ah inn 15 leng a rak kaang, tiah theih a si. No.1 sangchung ah a kaangmi inn 15 hna hi inn ṭhaṭha le sakliomi inn an si, tiah tualchung mi pakhat nih a chim.
“Tutan ah SAC ralkap nih an khanghmi inn hna hi SAC ralkap le palik nih umhmun an khuarnak sang a si caah an pawngkam, an duhnak inn paoh cu an khangh hna,” tiah SAC ralkap khanghmi a si kong a chimchap.
“Inn khanghpiak a tongmi chungah NLD party a ṭanhtu le USDP party chungtel zong an i tel. Cucaah timh ciammam tein an khanghmi siloin an duhnak hmun paoh an khanghmi a si,” tiah a chim. Inn 15 an khangh pinah thilri man fak deuh le an duhmi thilri paoh an i laak, tiin khuami hna nih an chim tiah Chin World nih a ṭial.
Kahdohnak Ruangah Khampat Khua A Chuahtak Mi Khampat Ah An Kir Kho Cang. Sagaing ramṭhen, Tamu peng, Khampat khua cu kahdohnak ruangah khuami nih an rak chuahtak nain, nizaan August 3 thawk in Khampat khua a chuahtakmi mipi cu kan umnak khua Khampat ah kan kir kho cang, tiah an chim.
A luancia July 23 in Khampat ah tualchung hriamtlai phu le SAC ralkap kar kahdohnak a rak chuah ruangah khuami hna cu khua chuahtak in Kalaymyo, Tamu le hmunkip ah an rak zaam hna. Khampat ummi Khampat Christian Council(KCC) in ṭuanvo ngeitu pastor hna nih August 2 ah tualchung hriamtlai phu le SAC ralkap kar biaruahnak an ngeih hna hnu ah atu bantuk in kan umnak Khampat khua kan kir khawhṭhannak hi a si, tiah tualchung mi pakhat nih a chim.
Tualchung mi pakhat nih a chimning ah cun KCC in ṭuanvo ngeitu hna nih Khampat khua pawng ummi tualchung hriamtlai phu hna sin ah biaruahnak an va ngeih hna, cu hnu ah Khampat um SAC ralkap le palik sin ah biaruahnak an va ngeih ve ṭhan hna. “Kaphnih nih daihnak an cohlan caah a si lai, khuachung ah kan kir kho cang” tiah a chim.
Hmundang ah ralhrial in a zaammi ‘Khampat ah kir khawh a si cang’ ti thawngpang aa zumh ngam lo i a kir rih lo mi zong an um. Mi bawmchantu lei in ṭuanvo ngeitu pakhat nih cun “Hnangam tein kir khawh a si ko cang” tiah a chim.
Khampat khua mi hna nih mah umnak inn le inn pawngkam ah a puak rih lo mi bomb kan hmuh a si ahcun ṭuanvo ngeitu hna sin ah a rannak in thawngthanhnak tuah colh ding in le mibu piin um lo ding in, mi bawmchantu phu nih ralrin an pek hna.
July Thla Chung Ah KNU Brigade 5 Hmunram Chung Ah Kahdohnak Voi 180 Leng A Chuak. 2023, July thlachung lawng ah Karen National Union(KNU) Brigade 5 hmunram chung ah SAC ralhrang, Border Guard Forces(BGF) fonh le KNLA karlak ah kahdohnak voi 189 a chuak, tiah KNU nih nihin July 4 ah cathanh an chuah.
Hi kahdohnak caan chung ah SAC ralhrang lei 109 an thi. Karen National Liberation Army(KNLA) chungtel 1 nih ram le miphun caah a nunnak a pek i minung 5 nih hliamhma an tuar, tiah an langhter.
Cu pinah KNLA nih SAC ralhrang zung 3 zong an hrawkpiak chih hna i an hriamthil pawl le eidin (riahcaw) an phurhnak motor 1 zong an hrawkpiak chih hna, tiah an langhter chih.
Mah thlakhat chung lawng ah SAC ralhrang nih khuachung le leikuang, Lo tuahnak hmunhma chung ah hriamngan kuan 11 an kah pinah raltuknak vanlawng in voi 12 tiang bomb a thlak chih caah mipi 2 an nunnak a liam, tiah Karen National Liberation Army(KNLA) nih cathanh an chuahmi ah an langhter chih.
Bomb Puahkehnak In CDF-Kanpetlet Chungtel 1 Nunnak A Liam! Chinland Defense Force-Kanpetlet nih nizan July 3, zanlei sang ah SAC ralhrang nih vawlei chung ah phum in an tarhmi bomb cu thianhlimnak an tuah liopi ah puahkehnak a chuak i CDF-Kanpetlet chungtel pakhat a nunnak a liam, tiah tualchung thawngzamhnak Kanpetlet Voice in kan theih.
Kalay Khuapi Siangsangrun-2 Pawng Ah SAC Ralhrang Bomb Puahhnawh An Tong 4 An Thi. Sagaing ramṭhen, Kalaymyo khuapi um siangsangrun (2) pawng ah rallam a sialmi SAC ralhrang pawl cu July 3, zinglei suimilam 9:00 tluk ah bomb in an puahhnawh hna i SAC ralhrang 4 an thih caah mipi 1 meithal in an kah i hliamhma a tuar, tiah kan theih.
Atu bantuk in bomb puahhnawh an tonmi ruang ah SAC ralhrang nih duhpaoh in an kahmi meithal kuan nih mipi 1 a phei ah a khen hi a si, tiah theih a si. SAC ralhrang pawl cu bomb puahhnawh an ton caah 1 hi hmakhatte ah a thi colh. A dang 3 hi hliam faak an tuarnak in an thi ve, tiah Zalen nih a ṭial.
Arakan Army AA Hriantlai Phu Nih BPLA Ralkap Training Peknak Cu Tlamtling Tein An Lim Khawh. Arakan Army (AA) hriamtlai phu nih Bamar people’s Liberation Army (BPLA) hriamtlai phu cu ralkap training an pek hna i, comrade 11 chung ah 5 hi Myanmar Sagaing ram base camp pakhat in tlamtling te in a dih mi ansi tiah an langhter.
Arakan Army nih anmah pengtlang Rakhine ramṭhen ah SAC ralhrang kahdohnak cu a dihter i, thlichia ṭotho (Cyclone Mocha) nih a rawk mi sersiam ṭhannak tu biapi in aa tlaih tiah theih asi. Arakan Army (AA) hriamtlai phu nih Chin ramkulh in CDF cheukhat, Magway ramṭhen le Sagaing ramṭhen in PDF cheukhat hna cu ralkap training tlamtling tein a pek hna tiah an langhter.