Khampat Khua In A Zaammi SAC Ralkap Le An Chungkhar Hna Cu India Ram Ah An Zaam!
==========
Sagaing ramṭhen, Tamu peng Khampat khua in a zaammi SAC ralkap le an chungkhar hna cu India ram ah an phan i hliamhma pumi SAC ralkap cheukhat cu India ram chung ah an thi, tiah Khit Thit Media nih a ṭial.
No. 1 military region, Tamu pengkomh hruainak in KIA, PDF le Pah Kah Phah nih Khampat khuapi cu November 7 zinglei ah khuapi ningin an rak laak i Tamu pengkomh Battalion 2, special Battalion 2, CNDF, TDA, RCDF, KNA-Burma le ṭangṭi phu hna i bawm in an rak kah.
“November 5 hrawng ah SAC ralkap le palik an chungkhar hna cu India ram ah an zaam. November 12 ah India ralkap nih an bawmh hna i hliamhma pumi zong an um. Cheukhat hliamhma pumi cu thlop manh loin a thimi an um,” tiah cu kong a theimi ramri ummi hna nih an chim. Cu pinah KIA le PDF nih an laakmi Khampat khuapi palik sakhan in hriamngan, palik officer hruk-aih thilthuam le palik thilri cheukhat hna zong social media ah an taar.
Rih Le Ṭio(Khuamawi) SAC Sakhan Cu Chin Ralkap Ṭangṭi Phu Nih An Kah. Rih SAC sakhan le Khuamawi SAC sakhan cu nizan November 12 zanlei suimilam 4 hrawng in Chin ralkap ṭangṭi phu nih an kah i, Rih Sakhan cu an laak cang nain Ṭio sakhan cu an la kho deuh rih lo, tiah thawngpang kan laknak nih a chim.
SAC ralkap kahmi RPG kuan nih Zokhuathar ah aa dor mi ralzam pahnih; tarnu pakhat le pa ngakchia kum 12 mi cu an ban ah a hliamh hna i, an pahnih in Champhai sizung ah zohkhenh an si. Kahdohnak ruangah kaphnih in thi le hliam an um le um lo thawng fiang theih khawh a si rih lo.
Chin ralkap lei nih hin SAC sakhan an kah lai kong hi an rak thanh cia cang hna ruangah tualchung mi zeizawzat cu Mizoram lei ah an zaam hna i, nizan tiang ah Myanmar lei in ralzam thongkhat leng Zokhuathar ah an lut tiah Zokhuathar YMA President nih a chim. (Ṭio sakhan an laak, an la rih lo ti bantuk in thawngpang kan don ruangah ka ca hi kan remh ṭhan)
SAC Ralkap Meithal Kahnak In Zokhuathar Ah Aa Dormi Ralzam Pakhat Nunnak A Liam! Rih SAC sakhan cu Chin ralkap ṭangṭi phu nih an laak cang hnu ah Ṭio sakhan cu Chin ralkap nih an nam ṭhan i, SAC lei nih kahthlor in Zokhuathar lei an kah ruangah ralzam in aa dormi pa kum 51 mi cu meithal kuan chawkvai nih a khen i a nunnak a liam.
Tuzing ṭhiamṭhiam ah Zokhuathar ah ralzam in aa dormi tarnu pakhat le ngakchia pa pakhat cu meithal kuan hliam an pu cang. SAC lei nih hin Ṭio sakhan SAC ralkap hna bawm ding in raltuknak vanlawng a thlah i, vanlawng nih khuachung zong a kah tiah tualchung mi hna nih an chim.
Vanlawng kahnak kong he pehtlai in thawngpang hlat cuahmah lio a si. Kahdohnak ah kaphnih in thi le hliam kong ah thawngfiang theih a si lo. (Kan ca a reltu lakah Zokhuathar a ummi kan um ahcun comment le messenger in thawng thanh khawh peng kan si)
Rakhine Ah SAC Ralkap Le AA Kar Kahdohnak Aa Thawk Hnu In SAC Ralkap Nih Lam An Kham. Rakhine ramkulh, Rathedaung peng chung ah SAC ralkap le AA kar kahdohnak aa thawk ṭhan caah nihin November 13 zinglei in Yangon-Sittwe motor lampi, Sittwe peng chung lam cu SAC ralkap nih an kham cang, tiah tualchung mi hna nih BBC ah an chim. Sitttwe peng chung ah a ummi palik le SAC ralkap i bawm in Kyauktan chek gate le Sittwe khua luhnak gate cu an khar cang, tiah theih a si.
SAC ralkap le palik nih chek gate lam an kham cang caah Sittwe in kadang peng ah khual a tlawngmi hna zong ah a kham dih hna i ti lam lawng in an kal kho, tiah BBC nih a ṭial. Nihin November 13 zinglei ah Rathedaung peng le Minbya peng ah AA nih SAC ralkap motor 2 cu lam hruang in an kah i an laak khawh. Mrauk -U khuapi zong ah SAC ralkap nih meithal an puah len, tiah theih a si.
Kyaukhtu Miakpi Ralkap In SAC Ralbawi Pakhat Cu Meithal Le Zen-Kuan He CDM A Tuah. Magway ramṭhen, Saw peng Kyaukhtu miakpi ralkap in SAC ralbawi Lieutenant Colonel pakhat cu MA 3 meithal he CDM a tuah caah lawmman tangka kyats sing 50 kan pek, tiah YRA nih an thanh. November 5 ah Kyaukhtu miakpi ralkap in SAC ralkap ralbawi Lieutenant Colonel pakhat cu Gangaw pengkomh Battalion 15, 16, 17 YRA sinah CDM a tuah, tiah theih a si.
SAC ralkap CDM a tuahmi pa nih cun, MA 3 meithal zun 1, kuanbawm 3, meithal kuan 219 le kuankham angki zun 1 he CDM a tuah i nizan November 12 ah lawmman tangka kyats sing 50 an pek i a himnak hmun ah an chiah, tiah theih a si. YRA sinah CDM a tuahmi SAC ralkap hna cu YRA nih lawmman laksawng an pek hna i kal an duhnak hmun ah an va chiah tawn hna, tiah YRA nih an langhter.