Khampat Khua Ah NUG Ukhruainak In Rianṭuan Hram Thawk An Timh!
===========
Tualchung hriamtlai phu hna nih ni 10 tluk an uk cangmi Khampat khua ah ukhruainak thar he rianṭuan cang ding in NUG nih timhlamhnak an ngei, tiah theih a si. Tualchung hriamtlai phu nih an rak laakmi Sagaing ramṭhen, Tamu peng Khampat khua ah ukhruainak thar he rianṭuan hram thawk an i timhnak kong cu NUG tang pengkomh ukhruaitu phu le hriamtlai phu sin in theih a si.
Kalay-Tamu lampi cung Khampat khuachung SAC ralkap sakhan cu tualchung hriamtlai phu nih ni 5 chung an rak kah i November 7 ah Khampat khua cu an rak laak khawh. “Khampat khua dirhmun cu a hlan bantukin a ṭha cang, siizung le sianginn zong NUG ukhruainak tang ah tharchuah in caan a rauh hlan ah a rannak in on khawh ṭhan kan zuam lai,” tiah Tamu pengkomh Battalion 2 in ṭuanvo ngei pakhat nih a chim.
“Khampat khuachung cu sang 9 in ṭhen a si i sang 5 cu sangbawi an i thim kho cang, sang 4 an taang i thimnak tuah ding in timhlamh lio a si. Atu dirhmun ah cun Tamu pengkomh, Tamu peng Pah-Ah-Phah hruainak in kalpi cuahmah a si rih,” tiah pengkomh Pah-Ah-Phah phu chungtel pakhat nih a chim.
Tualchung hriamtlai phu nih khua an laak hnu in le hmunram thianhfelnak an ngeih hnu in khuami zong an umnak ah an kir kho cio i SAC ralkap sakhan umnak no. 1 sang telh in sang dang zong ah chawdawr le dawr dang tete zong a hlan bantukin an on dih ṭhan cang hna, tiah tualchung mi nih an chim.
Shan ramkulh chaklei hriamtlai phu unau thum le ṭangṭi phu hna nih October 27 in an rak thawkmi 1027 Operation kahdohnak an kalpi hnu in khuapi 4 an laak lioah Sagaing ramṭhen Khampat, Kawlin le Chin ramkulh Rihkhawdar khua zong tualchung hriamtlai phu nih an laak khawh ve.
Patlelin Khua Kahdohnak Ah SAC Ralkap 10 An Thi, Palik Pakhat An Tlaih. Mandalay ramthen, Madaya peng Patlelin khua ah umhmun a khuarmi SAC ralkap cu tualchung hriamtlai phu nih an kah hna i ralkap 10 an thi, palik 1 kan tlaih, tiah NUG runvennak No. 1 nih an thanh.
November 16 ah Madaya peng Patlelin khua ah umhmun a khuarmi SAC ralkap ralbawi Captain Kyaw Hein nih a hruaimi SAC ralkap 50 hrawng cu PDF, Sinku peng Pah Kah Phah le Madaya Pah Kah Phah nih an va kah hna, tiah Khit Thit Media nih a ṭial. Cu kahdohnak ah cun SAC ralkap 10 an thi i 5 hliamhma an pu. Palik 1 tlaih a si i meithal zun 3, meithal kuan 49 le kuanbawm 7 an laakpiak hna.
Patlayin ah raltuk bawm dingin a kalmi SAC ralkap Lah Kah Tah 1014 nih Aungkanthar khua Arthit lakphak dawr cu a ruang um loin meithal in an kah caah tualchung mi 11 an nunnak a liam pinah Puaisakone khuami pakhat zong an thah, tiah theih a si.
Madaya Peng PatlayInn Khua Ah A Ummi SAC Ralhrang Luhhnawh In An Kah Hna 10 Renglo An Thi, 1 An Tlaih. Mandalay ramṭhen, Madaya penmg, Patlayinn khua ah a ummi SAC ralhrang mipi ralkap nih luhhnawh in an kah 10 renglo an thi, 1 an tlaih, tiah NUG nih an langhter.
November 16, khan Madaya peng, Patlayinn khua i ralbawi Kyaw Hin hruaimi SAC ralhrang thazaang 50 tluk umnak sakhan cu mipi ralkap People’s Defence Army Battalion, Singu စဥြ့ကူး peng Pah Kah Phah le Madaya peng Pah kah Phah nih luhhnawh in an kah tiah theih a si.
Kahdohnak hmun ah SAC ralhrang 10 an thi, 5 hliam an tuar, 1 an tlaih, meithal 3, Kuan bawm 49 le kuan chiahnak bawm 7 an lak tiah theih a si. Kahdohnak hmun, SAC ralhrang thazaang chap dingin a rami ralhrang nih Aungkantha khua pawng an phak ah Arr Thit lakphaktidawr cu ruang umlo in an kah caah tualchung mipi 11 lak ah 1 nunnak liam, tiah theih a si.
Loikaw Khuapi Biaceihzung Ah Umhmun Khuarmi SAC Pawl Cu An Kah Hna I Mei In Khangh. Karenni ramkulh, Loikaw khuapi ah ummi biaceihzung ah umhmun khuarmi SAC ralhrang pawl cu Karenni hriamtlai phu hna nih luhhnawh in an kah hna caah an laak khawh i biaceihzung zong mei in an khangh piak hna, tiah ralhmai thawng latu cheukhat sin in kan theih.
“Biaceihnak zung ah umhmun a khuarmi SAC ralhrang pawl luhhnawh in an kah hna i biaceihzung zong an khangh piak hna. Nihin November 17, zing suimilam 10 hrawng ah mei a kaang. Kahdohnak cu zinglei tuandeuh ahkhan a si.
Zung chung ah ummi ralhrang pawl cu a zaammi an um i, a thimi zong an um. Biaceih zung cu an laak khawh cang” tiah ralhmai thawng latu pakhat nih Khit Thit ah a chim. Karenni ralkap hna nih Loikaw khuapi um SAC ralhrang pawl nih umhmun an khuarnak sianghleirun zong luhhnawh in an kah caah an laak khawh cang, tiah theih chih a si.