Kyaw Moe Htun Thah A Timtu Hna Cu New York Biaceihzung Nih ‘Sualnak An Tuah’ Tiah Bia An Khiahpiak Hna New York khuapi ah a ummi Phyo Hein Thut cu, UN ah Myanmar ram aiawh in rian a ṭuanmi Kyaw Moe Htun thah ding in teltumnak a ngeih ve ruangah ‘sualnak a tuah’ tiin New York thlanglei pengkomh biaceihzung nih bia an khiah, tiah theih a si.
Phyo Hein Thut cu New York khuapi um, Kyaw Moe Htun zung humhimnak latu ding ah a lut i, Kyaw Moe Htun le zung rianṭuantu hna konglam(information) vialte cu Thailand ram um SAC ralkap sinah a pek leng ah, Kyaw Moe Htun rawiphiar nakding ah Thailand ram um SAC ralkap hna siin tangka zong aa lak, tiah July 24 zanlei ah biaceih zung nih an langhter.
Ni 8 chung a sualnak case an kawl hnu ah biaceih zung nih ‘sualnak a tuah ko’ tiin bia an khiah i a ra laimi 2024 March 14 ah biaceihbawi hna nih a dihlak in bia a khiah te lai, tiah theih a si.
U.S Hluttaw nih a sermi upadi ning in ramleng Ambassador pakhat cu rawiphiarnak le dohnak an tuah ahcun a sang bik kum 5 tiang thong thlak khawh a si. Kyaw Moe Htun thah le rawiphiar a timtu New York um kum 28 tluk Phyo Hein Thut le kum 20 tluk Hein Zaw hna cu 2021 August 6 ah FBI nih an rak tlaih hna.
Hi hna pahnih hi Thailand ram um hriamnam lei Agent a simi SAC ralkap hna he pehtlaihnak an ngei i Kyaw Moe Htun that ding in misual zong an hlan hna. Kyaw Moe Htun kan doh lai i a rian in a chuah hlei lo ahcun kan thah lai ti tiang in khua an khang, tiah New York palik nih an thanh.
Kyaw Moe Htun rawiphiar nak ah dollar 4,000 an laak i thah ding a si ahcun misual phu hlan man ah dollar 1,000 chap ṭhan dingin hnatlaknak an ngei, tiah biaceih zung nih an langhter. Kyaw Moe Htun rawiphiarnak case ah aa tel vemi Ye Hein Zaw cu a sualnak amah tein aa phuan caah biaceihzung nih chekhlatnak an tuah dih in U.S ram in chuah ding ah 2022 May thla ah biaceihbawi nih bia an khiahpiak.
Kyaw Moe Htun rawiphiarnak kong ah SAC ralkap zong an i tel tiin mi cheukhat nih an chimceih i, cu kong he pehtlai in RFA nih SAC chimphuannak nawlngeitu Zaw Min Htun cu pehtlaihnak an tuah tawn nain a cohlang lo, tiah RFA nih an langhter. Credit: TCP
Relchap: Kanpetlet Peng Kahdohnak Ah SaC Ralkap 7 An Thi, CDF-Kanpetlet In Ralkap Pakhat Nunnak Liam Chin ramkulh Kanpetlet peng, Cinduai ah riahcaw chan ding in a kalmi SAC ralkap le Chin ralkap phufonh hna cu nizan July 24 ah fak ngai in an i kap i cu kahdohnak ah cun SAC ralkap 7 an thi, Chin ralkap lei in ralkap 4 hliamhma an tuar, tiah CDF-Kanpetlet nih an thanh.
SAC ralkap nih vanlawng in kahdohnak a tuah pinah hmunhma i thleng in ralvengtu hna le riahcaw chantu hna cu hmunhnih in rallam an sial caah kahdohnak a fak. Nizan, July 24 zinglei suimilam 8:30 in 9:00 tiang Cinduai ah riahcaw chan ding in aa thawhmi SAC ralkap 300 leng le Chin ralkap kar kahdohnak a chuak i, SAC ralkap 7 an thih pinah hliamhma tuar zong an tam, tiah theih a si.
Zinglei ṭhiamṭhiam ah Kanpetlet vanlawng bual pawng ah SAC ralkap le Chin ralkap phu hna cu an i kap ṭhan i cu kahdohnak ah cun Vakok battalion in ralkap pakhat nih ram le miphun ca ah a nunnak a pek, tiah CDF-Kanpetlet Vakok battalion nih an thanh.
Kanpetlet peng ah ni 10 chung hrawng kahdohnak a chuak cang i, cu kahdohnak ah cun SAC ralkap a thi mi le hliamhma tuar mi hi 30 leng an si, tiah Chin ralkap lei nih an thanh. Kanpetlet ah pehtlai in kahdohnak a fah caah mipi bawmhchanhnak kan herh ko, tiah Kanpetlet peng zatlang uktu phu le Chin Defence Force -Kanpetlet nih an chim. Credit: TCP
Relchap: Hakha University Ah Cachimtu Saya/Mah An Um Lo Caah Lecturer Hna Cu Assistant Professor Pek Dingin An Auh Hna Chin ramkulh, Khuapi Hakha University ah cachimtu an um ti lo caah Lecturer hna cu an lung tho hna seh tiin Assistant Professor rian pek dingin an lem hna i an auh hna, tiah theih a si.
Hakha University ah cachimtu an um lo caah Lecturer hna cu kum 2 te lawng rianṭuan hnu in Assistant Professor nan si lai tiin an lung thawhnak dingin an lem hna nak kong cu July 21 i SAC kuttang fimcawnnak zung an ca chungah a um, tiah theih a si.
Assistant Professor si nakding ah PhD kai hau loin Assistant Professor rian hmuh khawh a sinak kong zong aa tel, tiah theih a si. 2017 kum thawk in Chinram um ralkap sii-inn hna ah ralkap siibawi hna cu kum 2 rian an ṭuanter hna i an rian an dih in an duhmi Doctor line an kaiter hna i um an duhnak ralkap sii-inn ah an rak umter hna, tiah theih a si.
Asinain 2023 April thla ah Chin ramkulh ah an auhmi thazaang hi 2021 lio an rak auhmi thazaang nakin an tlawm deuh i 19 hrawng lawng an si. 2022 October thla in Chin ramkulh Thantlang khuapi kahdohnak ah SAC ralkap siibawi 2 an rak tlau i a thimi cazin ah an khumh cang hna. Officer 3 telh in SAC ralkap 6 zong an rak tlau, tiah theih a si. Credit: TCP
