Sittwe Khuapi I India Consulate Zung Rianṭuan Pawl Cu Yangon Ah An Ṭhialter Hna, Myanmar ram dirhmun a chiat chin lengmang ruang ah India cozah nih Rakhine ramkulh khualipi, Sittwe khuapi ah a um mi Myanmar Consulate zung rianṭuan pawl cu Yangon ah ṭhialter an si kong India Ministry of External Affairs in chimnak nawlngei Randhir Jaiswal nih nizan April 12 ah a chim.
India cozah nih Myanmar ram dirhmun a zoh peng i a hlei in Rakhine ramkulh dirhmun cu ṭha tein a ngiat kong le Mandalay i India consulate zung nih pehzulh in a ngiatthlai kong Randhir Jaiswal nih cun a chim chap.
“Myanmar ram dirhmun cu bei maw bei lo a si i a fiang lo mi le dirhmun chia ngaiin a um lio a si caah Myanmar ram ah a tlawng mi India ram mi zong nih himnak ding ca ah ser mi zulhphung tete zulh khawh cio i zuam u,” tiah a chim. India cozah nih a ram mi hna humhim ding le a ram mi an him khawh nakhnga a herh mi paoh a tuah kong Randhir Jaiswal nih cun a chim. The Chin Post
Thawngpang dang: Kyeinchaung Byuha sakhan cu ramri hngak ralkap le palik an umnak a si i, Strategy Operation Command Lieutenant Colonel Min Soe le palik bawi Lieutenant Colonel Win Myint Aung nih an hngah mi sakhan a si. Sakhan chung ah SAC ralkap chungtel 100 leng, ramri hngak SAC ralkap 400 hrawng le an chungkhar minung 150 hrawng an umnak a si, tiah AA nih an thanh.
Kyeinchaung Byuha sakhan cu a luancia March 25 ni in AA nih kah hram an rak thawk i, ni 48 chung an kah hnu, nizan April 12 ni ah sakhan cu a ningpi in an laak khawh. Cu sakhan kahdohnak ah cun SAC lei tam ngai an thih pin ah an chungkhar telh chih in minung tam ngai tlaih an si i, AA nih hriamnam tam ngai an laak kong an langhter.
Cu pin ah Maungdaw peng chung lawng ah si lo in Ann peng le Buthidaung peng zong ah kahdohnak kan kanpi cuahmah, tiah AA nih an langhter chih.
AA cu chaklei hriamtlai unau he ṭangṭi in 1027 Operation an kalpi chung ah peng 9 an laak cang i ralbawi telh in SAC ralkap a thong leng AA sin ah an i ap cang, khuapi a taang rih mi ramkulh chaklei um Buthidaung le Maungdaw laak ding in kahdohnak an kalpi cuahmah, tiah theih a si. The Chin Post