Kan Chin Pasaltha Hna nih Ralhrang Sakhan voi 3 tiang an nam hna!
=========
Hriamnam Tling An Ngeilo Nain CDF-Asho Nih SAC Ralhrang Sakhan Voi 3 Tiang A Nam Hna. Hriamnam tlamtling tein an ngeih lo bu in SAC ralhrang hna lam tampi in a nor mi CDF-Asho nih ralhrang sakhan voi 3 tiang kan nam cang hna tiah CDF-Asho tuanvo ngeitu pakhat nih a chim.
CDF-Asho cu Magway ramthen nitlak lei Rakhine tlangram pawng ah Chin miphun um nak khua cheukhat ah kahdohnak tuah in an cawl cang. A si nain hriamnam lei an chanbau caah hmunhma humhak le hmunhma theihhngalh nak caah biapi in an cawl cang deuh.
CDF-Asho cu an dirhnak caan zong a sau rih lo nain SAC ralhrang sakhan voi 3 tiang an nam cang. Aluan cia August 21 lio ah Ngaphe(ငဖဲ) peng Gas lam a hngak mi SAC ralhrang sakhan an rak luhhnawh hna nain hriamnam an i deih lo caah le hriamnam ṭha an ngeih lo caah an duhning in an cawlcang kho lo.
“Sakhan lak dingin kan i timtuah ko nain hriamnam ṭha kan ngeih lo caah kan duhning in kan cawlcang kho lo. Cucaah kan herh mi Drone cawknak caah ‘Vakok thla’ timi tangka kawlnak Campaign zong kan tuah lio a si.”tiah CDF-Asho upa Salai Ro Chin nih a chim. Hi tangka kawlnak Campaign cu August 25 in October 2 tiang chungah Ticket zuar a si. Lawmman laksawng (poh ding) cu kut in tah mi Laithil Samtu thuam, Lautu, Asho, Mara le Mizo thuam hna an si lai.
CDF-Asho cu SAC ralhrang nor ding le Chin Miphun nih zalonnak a hmuh khawhnak ding, Chin Miphun hna hmunkhat teah le lungrual tein kan i funtom khawhnak ding ca le mah te khuakhan lairelnak kan hmuh khawhnak ding caah Ngaphe peng, Min Hla peng, Min-dung(မင်းတုန်) pengchung hna ah a cawlcang mi an si tiah kan theih.
Sii-ai Lei Chanbau Ruangah CDF-Paletwa Ralkap 2 An Nunnak Liam. Chin ramkulh thlanglei Paletwa pengkomh chungah sii-ai lei tlamtlin lo nak le chanbau ruangah CDF-Paletwa ralkap 2 an nunnak a liam nak kong CDF-Paletwa nih September 16 ah ngaihchiat nak cathanh an chuah. A nunnak liam mi ralkap 2 hna nih Chinland le a Miphun ca rian an tuan lio ah an nunnak a laim hi a si tiah ngaichiatnak cathanh chuah mi ah an langh ter chih.
A nunnak liam mi hna hi, Salai Muang Maung (kum 25) cu August 3 le Salai Enok (kum 19) cu August 8 ah an nunnak an liam i an pahnih in Commando ah a um mi an si. “An zawtnak nih an cheituk hna ruang, Operation tuahnak tiang thilri a um lo ruang le siizung kalpinak a hlat tuk ruang zongah a si”tiah CDF-Paletwa lutlai pakhat nih a chim.
“Ramtang ah um in Dothlennak a tuah mi kan si caah harnak tampi kan tong, cucaah mipi hna nih a hmunhma ah ra in nai teltum khawh lo zongah a kakip in rak i tel cio dingin kan sawm hna”tiah a cunglei upa nih a chimchap. CDF-Paletwa cu 2021 April 28 ni ah rak dirh mi a si i a tu ni tiangah CDF-Paletwa ralkap 9 an nunnak a liam cang tiah theih a si.
Kum Hnih Le Cheu Chungah CDF-Mindat Ralkap Minung 56 An Nunnak Liam. 2021 kum SAC ralhrang nih hramhram in uknak an lak hnu in kum hnih le cheu chung ralhrang an nornak ah CDF-Mindat ralkap in minung 56 an nunnak a liam tiah CDF-Mindat ralkap pakhat nih a chimnak kong Ayerawaddy Times nih a langh ter.
A voikhatnak kahdohnak an rak tuah lio ah SAC ralhrang Tactical Operation Command pakhat an rak tlaih hnu in CDF-Mindat nih khuachung hmun cheukhat zong an humhak khawh. “Ralhrang lei nih thazaang tampi hmangin khua in nichuah, nitlak lei in luhhnawh an kan timh caah kan sikhawh chungin kan kham hna caah ralhrang lei motor 7 kan hrawhpiak hna pin ah ralhrang hriamnam le riahcaw hna zong kan rak chuhkhawh hna.
Ralhrang a thi mi le hliamtuar zong an rak tam”tiah CDF-Mindat ralkap nih cun a chim. CDF-Mindat nih Lai meithal thonghrolh in SAC ralhrang an rak doh mi hna cu hmundang hriamtlai phu hna zong nih thazaang ah an rak i lak ngai hna tiah kan theih.
Tanintharyi Peng Ah SAC Ralhrang Pakhat Meithal He PDF Sin Ah Aa Fonh. Tanintaryi ramthen, Myeik pengkomh Tanintharyi peng Nyaung-pin-kon khua ah umhmun khuar mi SAC ralhrang khah-mah-yah (561) Battalion in ralhrang pakhat cu meithal he PDF sin ah CDM tuah in aa fonh tiah theih a si.
Mipi sin ah a rak i fonh mi ralhrang pakhat nih hin MA-3 meithal zun 1, kuan 30, kuanbawm 3 le 5.56 kuan 100 a rak i chuahpi. A mah cu PDF lei nih lawmman pek ding zong an timhtuah lio a si.
Tanintharyi pengchung ah SAC ralhrang CDM tuah in mipi sin ah a rak i fonh mi ralhrang 35 le palik 49 an dihlak 84 an si cang i a himnak hmun ah an chiah hna tiah theih a si.
Malaysia Ah Chin Pa Pakhat Rian A Ṭuannak Ah A Lumh Caah A Nunnak Liam. Malaysia ram ah kum 10 chung rianṭuan in aa hlawhfa mi Chin pa Salai Ngun Lian Sang (kum 34) cu September 13 ah rian a ṭuannak hmun ah ruahlo piin a lumhnak ah a nunnak a liam tiah theih a si.
Salai Ngun Lian Sang cu 2013 kum ah Malaysia a phan i 2023 September 6 ni ah a rianṭuan nak dawr cu thianhhlimhnak a tuah lio ah a lum i a thluak ah thisen a luh caah siizung ah an kal pi. A si nain September 13 ni ah a nunnak a liam hi a si. September 16 ah a ruak cu Malaysia ah an vui tiah Zalen nih a langhter. Credit: Lungmili Media