Kan camp chung lam vialte ceu toi ah fiang ririai tein. A liamcia kan ralkap hna ihnak buuk khat hnu buk khat ka run pal hna!
======
Tuzaan cu zaandang lo bang thlapa a rung vang. Piang hithiar tein. Farkung kar in a run i kaap mi thlapa vang nih kan buuk a run kah hna. Kan camp chung lam vialte ceu toi ah fiang ririai tein. A liamcia kan ralkap hna ihnak buuk khat hnu buk khat ka run pal hna. An king. A dai. Pinlei buk hmai ah kan ralkap tingtang an tum.
Uaihnang nawn in vuak mi tingtang aw le thlapa vang nih lung a lenter khun. Chungkhar taktak tluk in nun ai hrawn mi hna; voikhat lo i hun tian cu a har khun. Fial lo mi mitthli rual an run tolh. Bia le hla hna nih thinlung an hnemh khawh taktak lo mi an fiang. Zei in kan i hnemh lai.
Phaisa hin luatnak hi cawk awk tha hna sehlaw, bia le hla hna hin ram le miphun ngeih awk tha sehlaw, awngbali hin ram le vawlei hi zuh awk tha sehlaw—tihi thuk tukin khua a ka ruahter. An rak silo. Nunnak thisen hin ram hi thlen a rak si. A fiang tuk ko hme cu! Pathian hrimhrim nih hin sualfa luatnak ca ah vawlei ah a rungtum i a thisen a pek. A thi hrimhrim. Jesuh hi misual luatnak ca ah hi hnu voikhat a ra ti lailo. A nunnak pakhat te kha a pek bak ve. Luatnak ca ah cun a tuah lo awk hme a rak that lo cu!
Ka ram le ka miphun ca ah ka rian a si tiah ai phum taktak i ai pe mi hna nih an nunnak pakhat te khi an pek. Zeiti phunphai i a ruat i, zeizei a ti mi pawl hna kha; phui! Khrihfa zong nan si bal lailo. Mi firkhu nan si. Nan thih tiang nan zai peng lai.
Fiang uh. Luatnak cu thisen in thlen a si. A lak a si lailo. Ni nikhat ah kan tei telai. A tu cu kan tap. Asinain, kan lung cu kan thul naisai lailo. A sunglawi tuk mi ram dawtnak thisen ruang ah kan tap.
Ka tuar kho loh. Rual Nawl, Bawi Nun Cung, Lal Hngak Lian. Hngak Lian (Hngaka) kan tuar har khun. Mi nunnem, mi daidam… kan thinlung nih a celh lo. Kan ton telai kan ruat ko nain; a fak khun. Tuar a har khun. Nawla, Bawi Nun— kan celh hrim tung lo e. Kan bochan tuk mi kan ralkap hna, Nawl a ngai tuk mi kan ralkap hna, Philh khawh tilo ding mi kan ralkap hna. Upatnak sangbik he, Credit: Lengkawite
Kan fa le nanthi le sa le nan nun nak a sungloi tuk mi dih tiang in nan pek mi hi a lak sihngin hlah seh mu. Ka fa pa le hna ram le mi phun nan dawt tuk ruang i cnan tuar le nan ton afah hi. thin lung nih atuar kho cawk lo e Bawi pa nih asin ah adinh ter hrim hna la ti zumh ngam nak hmanh nih hin akan hnem kho thlu lo e.