Kalaymyo Le A Kiangkap Kahdohnak.Sagaing ramṭhen, Kalaymyo khuachung le Kalaymyo chaklei Kangyi khua ah nihin February 21 zinglei suimilam 6:30 hrawng ah kahdohnak a chuak, tiah theih a si.
“Kalaymyo 9 miles palik sakhan hrawng ah kahdohnak a chuak i Indaingkone (Myohla), Pyusawhti le SAC ralkap an umnak Kangyi khua le Kalaymyo khuapi chung ah kaphnih kar kahdohnak a fak,” tiah CDF-KKG Battalion Commander Mangpi nih a chim.
SAC ralkap le Pyusawhti pawl nih umhmun an khuarnak Kangyi khua cu tualchung hriamtlai ṭangṭi phu CDF-KKG, CNDF, PDF-Vakok , RKDF, Kalay PDF leh LDF (Pah-Kah-Phah) nih an kah hnu ah Kalay khuapi chung ah kahdohnak an pehzulh, tiah theih a si.Kalaymyo khuachung in SAC ralkap nih hriamngan he kahdohnak an tuah ruang ah Letpanchaung khua mi 4 hliam an pu, tiah theih a si.
Kalaymyo khuachung kahdohnak kong he pehtlai in Kalaymyo um tualchung mi pakhat nih cun, “Kalaymyo khuachung ah cun caan tlawmpal chung cu an i kap ve ko nain thinphan tuk ding a si lem lo, a kiangkap Pyusawhti khua tu ah cun an i kap ko. A dik lo mi thawng an thanh lengmang ruang tu ah hin mipi thinphang tuk in an um tawnnak a si. Khuapi chuahtak hau dirhmun tiang in thawng a thanh mi hna an um cu lung a ṭha lo ngai, a dik lo mi thawng a si,” tiah The Chin Post ah a chim ve.
Kalaymyo chaklei Kantharyar, Kangyi, Doewaingchaung khua le Kalaymyo thlanglei Sekan, Layeinsu, Myohla lei ah kal lo ding le Kalaymyo khuapi chung ah leng chuah lo ding in tualchung hriamtlai ṭangṭi phu nih mizapi ralrin an pek hna.
A poi Tuk Ee :Yangon In Kyaukphyu Ah A Kal Mi Rakhine Mino Pawl SAC Ralkap Nih An Tlaih Hna.February 18 zanlei ah vanlawng in khual a tlawng mi Rakhine mino 66 cu SAC ralkap nih an tlaih hna hnu ah February 19 zinglei ah Yangon in Kyaukphyu lei ah a kal mi minung 26, cu ni zanlei ṭhiam ah Yangon in Kyaukphyu ah a kal mi minung 40 le February 20 ah Yangon in Kyaukphyu ah a kal mi minung 15 cu SAC ralkap nih an tlaih ṭhan hna, tiah Myanmar Now nih a ṭial.
Kyaukphyu vanlawng bual ah SAC ralkap nih hin an rak hngahcia hna i Rakhine mino pawl cu an tlaih colh hna. Cu hnu ah SAC ralkap sakhan ah an lanhpi hna, tiah Rakhine ramkulh um SAC ralkap he naihniam in a um mi pakhat nih Myanmar Now ah a chim.
February 20 zanlei tiang ah SAC kuttang zung rianṭuan he naihniam in a um mi minung 8 lawng SAC ralkap nih an thlah hna i a dang mino 100 leng cu an thlah rih hna lo, tiah a chim chap.
February 20 zinglei ah Yangon in Kyaukphyu ah vanlawng in khualtlawng mi tlaih a tong mi hna lak ah hin Rakhine mino pa 9 le nu 6 an i tel, tiah theih a si.
SAC ralkap nih chungkhar cazin le NRC original an chek hna pin ah AA le PDF he pehtlaihnak an ngeih le ngeih lo an chek hna hnu ah kut an khih hna i an kalpi ko hna, tiah kum 40 tluk Kyaukphyu khua mi pakhat nih Myanmar Now ah a chim.
Yangon khuapi ṭamhnak dawr pakhat ah rian a ṭuan mi kum 21 tluk, Minpin khua mi pakhat zong February 19 zanlei ah Yangon in Kyaukphyu lei a kal lio ah SAC ralkap nih an tlaih, tiah theih a si.Rakhine mino an tlaih mi hna an chiahnak Kyaukphyu khuapi Ramawaddy Hall kiangkap vialte zong SAC ralkap 20 hrawng nih humhimnak an laak, tiah tualchung pakhat nih a chim.Credit : The Chin Post