Kalaymyo Kyotungpin Sang Ah Inn A Kang
===========
Sagaing ramṭhen, Kalaymyo, Kyotungpin sang sehzung pawng ah nihin October 27, zanlei suimilam 2:30 hrawng ah inn a kang, tiah tualchung mi hna nih an chim. Inn a kangh ning cu hnawm an duahnak mei in aa thawk, Kyotingpin sang mino nih an phalh i zanlei 3:30 hrawng lawng ah mei a thi, tiah an chim.
Inn khat cu a ciam dih, a kangh ning a fah ngai caah a pawngkam inn a tlaih lo nakhnga kan ven i kan phalh khawh, kan phalh khawh hnu ceo ah meithat motor cu a hung phan, tiah mei phalhnak ah aa tel vemi Kyotungpin mino pakhat nih a chim.
Pau a naih cang caah Kalaymyo khuachung a ummi mipi nih mei kong ah ralrin kan herh ngaingai, pumpak pakhat cio nih mei kong ah rian kan ngei dih, tiah ṭuanvo ngeitu hna nih ralrin an pek hna.
2023 January-October, thla 10 chung ah Kalaymyo khuachung ah a ruang hngalh lo in innkangmi an um pah tawn, tiah theih a si.
Kanpetlet Khuachung Le Khuate Dihlak Tluk Cu Kan Uk Khawh Cang – CDF-Kanpetlet. Chinram thlanglei Kanpetlet khuachung le khuate dihlak tluk cu kan uk khawh cang, tiah CDF-Kanpetlet chimphuannak nawlngeitu nih a chim. Kanpetlet khuachung ah SAC ralkap pawl cu an i chawkvak ngam ti lo, sianginn zong an ong ngam lo, khuachung ummi cheukhat hmanh zalong in an um ngam lo, khua pawngkam ah hmunhma kan laak dih i kan uk khawh ṭhan cang, khuate lei zong kan uk khawh dih ti tluk a si, tiah CDF-Kanpetlet chimphuannak nawlngeitu nih cun a chim.
SAC ralkap pawl cu Kanpetlet khuachung pengukzung, BEHS sianginn, Yangaung pura le penguk fimcawnnak zung lawng ah umhmun an khuar kho cang, tiah theih a si. A luancia October 20 ni ah CDF-Kanpetlet nih khuachung um SAC ralkap pawl cu umhmun an khuarnak ah an va kah hna i ralkap 2 an thih pinah hliampu zong an tam, tiah CDF-Kanpetlet nih an rak thanh.
Kanpetlet khuachung ah SAC ralkap le CDF-Kanpetlet kaphnih kar kahdohnak fak a chuah tawn caah tualchung mi dihlak ti tluk cu ral an zaam i chungkhar 20 hrawng lawng an taang cang, tiah CDF-Kanpetlet in chimphuannak nawlngeitu nih a chim.
Kanpetlet khuachung ah kahdohnak fak a chuak kho ṭhanmi a si caah tualchung mi zong SAC ralkap nih umhmun an khuarnak naih ah umkal lo ding, tiah CDF-Kanpetlet nih ralrin an pek hna. Milu 5000 leng le inn 1200 a umnak Kanpetlet khuami hna cu Magway peng Saw khua leng ramtang le dum hna ah ralzaam in an i dornak kum 3 a tling deng cang.
Tonzang Peng Ah India Lei In A Rami Hriamtlai Phu Khat Cu CDF-Tonzang Nih An Kah Hna. Chin ramkulh, Tonzang peng, CDF-Tonzang Battallion nih an ukmi hmunram Thansi khua le Santone khua hna ah India lei in a rami Chin Kuki Liberation Army(CKLA) cu an kah hna, tiah theih a si.
CKLA hriamtlai phu cu CDF-Tonzang hmunram cheukhat ah khualtlawng mi, meithal he tlerhkhawnh in tangka hal, thilri laakpiak a hmangmi phu an si i khuate hna ah tualchung mi hrocer in phaisa hal an hman ruang ah CDF-Tonzang Battalion 1 le 2 nih an kah hna, tiah CDF-Tonzang Battalion-2 nih October 26 ah an thanh. CDF-Tonzang Battalion 1 le 2 nih an kah hna caah CKLA phu cu an zaam dih i minung 3 cu India ralkap nih an tlaih hna, a dang cu Manipur tiva lei ah an zaam i minung tam ngai hliam an pu, tiah an thanhmi ah cun an langhter.
CDF-Tonzang nih an langhter ning ah; CKLA hriamtlai phu cu India ram mi Ngam Cha le Ja Mon hruaimi phu a si i a luancia 2023 March 24, zan suimilam 10:00 hrawng ah Tonzang peng Phaisat khua ah lut in tualchung mi cu phaisa zong an rak chuh bal hna, tiah theih a si.
CKLA hriamtlai phu cu India-Myanmar ramri hrawng ah hrambunh in a ummi phu an si, tiah naihniam in a ummi nih an chim. Kuki miphun aiawh in hriam a tlaimi phu cu Kuki National Organization/
Kuki National Army phu khat lawng an si i Kuki min pu in hriam a tlaimi phu dang cu Kuki miphun aiawhtu phu an si lo, tiah tualchung hriamtlai phu le Kuki mipi hna nih an chim.
Global Zotung Supreme Council Nih CDF-Zotung Cu Ralrin An Pek Hna. CDF-Zotung nih Zotung hmunram ah minung lungthin pu loin thil an tuahmi cu Global Zotung Supreme Council(GZSC) nih faak piin kan doh i kan cohlang hrimhrim lo, ralhrang phu pakhat an si. Hi hnuah Zotung hmunram um tualchung cung ah kutthlak in thil an tuah le a phunphun in hrocernak an tuah ṭhan ahcun faak piin kan lehrulh hna lai, tiah an thanh.
Global Zotung Supreme Council(GZSC) cu hramhram uknak a dongh tiang doh ding le Federal rampi ser khawh nakding ah CNF/CNA he i bawm in doh a thleng i rian a ṭuan cuahmahmi kan si pinah mizapi an him nakding ca ah GZSC cu dirhmi a si, tiah an langhter.
GZSC in a chuakmi CDF-Zotung nih Zotung hmunram ah chek gate an tuah i khualtlawng mi hna cu ngunkhuai an khawlh hna leng ah khuate zong ah ngunkhuai an khawlh hna. Sualnak ngei lo tualchung mi hna tlaihkhihnak, tukvelhnak le hriamnam in tlerhkhawnnak a phunphun an tuah, tiah an cathanh ah cun an langhter. GZSC nih an langhter ning ah CDF-Zotung an thil tuahmi lakah ngaih a chia khunmi cu lungrual tein a um komi tualchung mi karah rem lonak thil an tuah hi a si.
Anmah he lung aa khat lomi paoh cu an ṭhawl dawi hna. Nu hna zong hual loin an tuk an velh hna i an tlerhkhawn hna. Cu pinah Zotung hmunram Yansi khua B.E.H.S sianginn ṭhen ah ca a cawngmi siangngakchia Lung Ṭhung, Cung Lian Uk, Bawi Khan Lin le Romin Thang hna cu an tlaih hna i an tuk an velh hna. Tualchung mi cheukhat an tlaihmi hna zong atu tiang an thlah rih hna lo, tiah an langhter. CDF-Zotung nih siangngakchia pali an tuk an velh hna tiin GZSC nih cathanh an chuahmi ah an tuk an velh hnanak a ruang an langhtermi a um lo. Credit: The Chin Post