Kalaymyo Datsi Man A Fah Ruangah Falam Ah Datsi Man A Kai!
===========
Chin ramkulh, Falam khua datsi zuartu hna nih Kalaymyo lei in datsi an cah khawh ti lo ruangah Hakha lei in an laak mi an zuar chin, tiah theih a si. August zarhkhatnak ah Kalewa in Maharmyaing lam cu caan karlak a rak pit i Mandalay in Kalaymyo leiah motor a kal kho ti lo. Mandalay lei in a rami cu Gangaw-Hakha lei lawng in an kal khawh caah Kalay le Falam lei datsi man a kai, tiah theih a si.
“Hakha in kan cahmi datsi hi Gallon khat kyats 16,500 in kan zuar, Kalaymyo i kan cahmi tu cu Gallon khat kyats 14,000 in kan rak zuar. Hakha lei i datsi kan laak hnu in dawr cheukhat ah gollon khat Ks 18,000 in 20,000 tiang a zuarmi an um,” tiah Falam khua um datsi zuartu pakhat nih Zalen ah a chim.
“Kalay ah datsi Gallon khat ah kyats 16,500 a si i diesel Gallon khat ah kyats 17,000 a phan. Hakha lei va cah a phu deuh,” tiah motor khaltu pakhat nih a chim ve. Datsi man a ṭum khawh rih hlei lo ruangah Kalay in Chin ram ah meh-hang le eidin phorhmi vialte zong an man an kai ngai hna, tiah theih a si.
Facang, chiti, pe le a dangdang eidin thil a zuartu pakhat nih cun, a hlan ah cun facang tun khat ah kyats 125,000 in an rak zuar i atu cu kyats 150,000 in zuar a hau cang. Lakphak hrai khat ah 1,000 in a zuarmi zong an um cang, tiah Zalen ah a chim.
Kalay peng ah facang a chuah ngainak hmun a simi Inkyinkhun, Tharyarkone le Letpanchaung khua zong ah facang a tlawm cang. A um chun hna zong a dih pah cang caah Kalay khuapi chung ah facang duh poh in cawk khawh a si lo, tiah theih a si.
Karenni Ramkulh August Thlachung Ah Kahdohnak Voi 50 Tluk A Chuak; SAC Ralhrang 110 An Thi. Karenni ramkulh chung hmun dangdang ah 2023 August thlachung lawngah SAC ralhrang he kahdohnak voi 50 tluk a chuak i ralhrang lei in 110 an thi tiah KNDF nih September 5 ah thanhca an chuah.
Loikaw, Demoso, Hparuso le May-seh peng chung kahdohnak lawngah SAC ralhrang Lieutenant Colonel pakhat telh in 100 leng an thi i 40 leng hliam an tuar. Aluan cia August 2 thok in Demoso le Hparuso khua motor lampi cu humhak ding in aa zuam mi SAC ralhrang Tat-mah (55) kuttang Battalion chung in ralhrang phu 3 ah rallam sial mi hna he nifa tin kahdohnak a chuak.
Hi thlakhat chung kahdohnak lio ah ralhrang lei a thi mi le hliamtuar an tam caah SAC ralhrang nih raltuknak vanlawng voi 45 a hman. KNDF ralkap in minung 5 an nunnak liam. Ralhrang lei 3 an tlaih hna pin ah hriamnam fa mi zun 15 le a nganmi zun 1 telh in meithal kuan le hriamnam dang zong kan lak chih. Ralhrang vanlawng le hriamngan kah nak ruangah mipi 3 an thi i inn 30 leng a rawk pin ah Khrihfa biakinn 1 le sianginn 2 a rawk tiah KNDF nih an langhter chih.
SAC Ralhrang An Thathawhnak Caah An Mah Ralhrang Lila Le An Chungkhar Hna Cu TikTok An Zuamter Hna Lai. SAC ralhrang pawl an thathawhnak le an lungthin thawnnak ding caah an mah ralhrang le an chungkhar hna cu TikTok zuamnak an tuah ter hna lai tiah ralhrang chung neihniam hna nih an chim.
TikTok aa zuam dingmi hna nih, ralhrang hna thazaang ah an i lak ding mi hla, Myanmar ram chawleh thalnak kong, zatlaang sining kong, dothlennak tuah tu lei nih an langhter mi thawngpang hna cu nichuak capo ah tuah ding kong le ralram ah a kal mi ralhrang lei an thawhnak bia le hla tibantuk zong aa tel lai i a hnubik September 5 ah nan kuat cio dih lai tiah a thlithup in thawngthanhnak an tuah.
Cu an i zuamnak Vedio cu minute 3 tluk lawng a sau lai i Social Media ah tar a si lai, hi zuamnak ah a thiambik pakhat nak laksawng sing 1, pahnih nak 50,000 le pathumnak ah 30,000 pek an si lai pin ah a dang tein laksawng phun 2 a um rih lai tiah ca an chuah mi ah an langh terchih.
“Rampi huap in ralhrang pawl le an chungkar cio TikTok zuamter ding in thawngthanh dih an si, an laksawng zoh tik ah a phupha lo. Social Media ah TikTok hi mitam deuh nih an vun hman ngai caah a tu an tuah mi ralhrang lei thathawhnak le ralhrang ttanh hlei nak kong TikTok zuamnak an tuah mi zong hi mitam deuh nih zoh kho hna seh ti ruahnak an neih caah a si” tiah ralkap CDM pakhat nih a chim.
Myanmar Ram SAC Ralkap Cu Ralhrang Phu Tiah ASEAN People’ Forum Nih Thawngthanhnak An Tuah. Indonesia ram Jakarta khua ah tuah mi ASEAN People’ Forum 2023 tonpumhnak ah Myanmar ram SAC ralkap phu cu ralhrang phu tiah September 3 ah langhter in thawngthanhnak an tuah.
Myanmar ralkap hna nih Miphun pakhat ci hmih khawhnak tiang sual a tuah rung le ralkap phung le phai buar in mipi cungah lainawn nak a tuah mi ruang ah a tubantuk in ralhrang phu tiah kawh auh in thawngthanh nak an tuah hi a si.
Brunei, Cambodia, Indonesia, Lao, Malaysia, Philipine, Singapore, Thailand, Timor Leste le Vietnam ram hna in zatlaang phu tonpumhnak chungah a tubantuk in Myanmar ram mipi hna sin ah lungrual te le hmunkhat ah kan dirpi hna tiah APF nih an langhter. Ni 945 tiang Myanmar ram SAC ralhrang nih uknak a kal pi mi zong a tlamtling lo tiah hi Forum cathah chuah mi ah an langhter.
Mah pin ah NUG, NUCC, ERO le zatlaang phu hna telh in dothlennak ah aa teltum mi phu pawl hna lawng pehtlaih ding le an mah sin in bawmhnak luh ter ding kong zong ASEAN Civil Society Conference/ ASEAN People’ Forum ACSC/APF nih an langhter chih.