Kalay Peng Sai Khua Mi Ralhrial In An Zaam Dih, Tualchung Mi 2 Nunnak Liam.Sagaing ramṭhen, Kalaymyo peng, Sai khua ah SAC ralkap pawl cu rallam an sial ruangah tualchung mi pawl ralhrial in an zaam dih, SAC ralkap hriamngan kahnak in Sai khua le 9 Miles um tualchung mi pahnih nunnak a liam, tiah theih a si.
“Nizan February 25 ah SAC ralkap pawl cu rallam an sial i Sai khua mi dihlak cu a himnak hmun ah ralhrial in an zaam dih. Kan khuachung ah minung pakhat hmanh an um ti lo,” tiah Sai khua mi pakhat nih nihin February 26 ah The Chin Post ah a chim.
SAC ralkap pawl cu kan khuachung ah an lut i minung an um le um lo an kawl hna. Khua mi pawl kan zaamnak hmunhma zong an hngalh caah PDF lei nih kadang a him deuhnak hmun ah zaam ṭhan dingin an kan ti, tiah a chim chap.
SAC ralkap nih hriamngan in kahdohnak an tuah ruangah nizan February 25 ah Sai khua mi pakhat a nunnak a liam i nihin February 26 ah 9 miles um tualchung mi pakhat zong a nunnak a liam chap, tiah Sai khua mi pakhat nih cun The Chin Post ah a chim.
(Nawlnak : Kan thawnglaknak nih hmanthlak a kan pek mi zohchih in tlangtar kan palhsual caah nan kan theihthiam naklai kan in nawl hna. Hmanthlak hi Sai khua a si lo! SAC ralkap nih Kalay peng khua an rak khangh cang mi hmanthlak hlun a si)
Thawngpang Dang Rak Rel Chih: Dr. Hmuh Thang Inn Cu CDF Hakha Nih An Chuh I A Herh Ningin An Tawlrel Lai.Dr. Hmuh Thang cu a inn an chuhnak le a herh ningin hman a si lainak kong CDF Hakha Central Council nih nizan February 25 ah an thanh.
“Pu Dr. Hmuh Thang cu ralhrang cozah SAC a dirkamh lawng si loin Town Hall ah 2023 September 15 ni ah ralhrang cozah SAC thimnak kong mizapi lemsoinak a tuah caah Sakta lam, Hakha ah a ngeihmi inn cu mizapi ta ah chiah a si cang,” tiah CDF Hakha Central Council nih cun an langhter.
Dr. Hmuh Thang a inn tawlrelnak kong ah CDF Hakha nih, dothlennak chung cu mizapi aiawh in CDF-Hakha Central Council nih a herhning in a tawlrel lai, tiah an langhter.Dr. Hmuh Thang cu Chinram USDP Party Chairman a si i SAC nih an auh hnu ah SAC kuttang ah rian a ṭuan mi a si. 2010 thimnak lioah teinak a rak hmu mi zong a si.Credit : The Chin Post