Sami Khuapi Ah SAC Ralkap le Rakhine Ralkap AA Kar Kahdohnak Fak Ngai A Chuak
==========
Chin ramkulh, Paletwa peng, Sami khuapi chung ah SAC ralkap le Rakhine ralkap AA cu nizan December 14, zinglei ah an i kap i kaphnih kar kahdohnak a fak, tiah tualchung mi nih a chim.
Nizan December 14, zinglei ah Sami khuapi Leikkone sang ah ralkap thazaang 20 hrawng nih umhmun an khuarnak SAC ralkap sakhan cu Rakhine ralkap AA nih an kah i suimilam pakhat chung hrawng kaphnih kar kahdohnak a fak, tiah an chim.Cu kahdohnak ruang ah Sami khuapi tualchung mi cu a himnak hmun ah an zaam hna, tiah theih a si.
Paletwa peng, Shinletwa ralkap sakhan zong Rakhine ralkap AA nih a luancia December 11 ni ah an rak kah i kaphnih kar fak ngaiin kahdohnak a chuak.
A luancia zarh chung ah Paletwa peng chung SAC ralkap nih biapi ngai ah an chiahmi sakhan ṭha ngaimi pahnih Taronai Byuha sakhan le Hnonbu Byuha sakhan cu Rakhine ralkap AA nih an laak. A taang rihmi ralkap sakhan vialte zong laak kan i tim, tiah AA nih an thanh.
Cinduai Khua Pawng Ah SAC Ralkap Nih Vanlawng In Bomb An Thlak.Chin ramkulh, Kanpetlet peng Cinduai khua pawng ah nizan December 14 zinglei ah SAC ralkap nih vanlawng in bomb an thlaknak kong CDF-Kanpetlet in ṭuanvo ngeitu pakhat nih a chim.
Kahdohnak zeihmanh um loin bomb an thlak nain zeibantuk bomb dah an thlak ti a fiang lo, zumh ning le ruahdamh ning ahcun rocket bomb a si lai ti a zumhnak zong a chim chap.
December 14 zing suimilam 11:00 hrawngah Kanpetlet peng Cinduai khua le Laungshe karlak um Cinduai phak hlan meng 7 hrawng a hlatnak ah SAC ralkap Fighter pakhat nih bomb lung 8 a thlak.
Cinduai khua chung ah kahdohnak zeihmanh um lo bantukin Kanpetlet peng chung zong ah kahdohnak a um lo buin bomb an thlak. Cinduai khua pawng bomb thlaknak ah tualchung mi a thimi, aa hliammi le inn lo rawk a um hraw lo, tiah theih a si.
SAC kuttang Telegram channel nih cun Cinduai khua SAC ralkap sakhan kap dingin PDF cu Laungshe khua thleng lei in motor in an kal, tiah December 13 ah an langhter.Credit: The Chin Post