Israel Ralkap Nih, Gaza Hmunram Sii Inn An Kulh!
=========
Israel ralkap nih raltuknak Tanks in Gaza hmunram sii-inn dihlak an kulh dih a pawngkam an kah. Hi kong he pehtlai in, Israel nih a chimmi cu zeiruang ah dah Gaza nih mizaw zohkhenhnak hmun hi ralthuam le raltuknak hmun ah a hman tiah a chim.
Gaza ngamdamnak lei Ministry of Health nih a langhter ning cun, Israel raltuknak tank nih Rantiai sii inn, Al Nasar sii inn le mit zohkhenhnak the eye & mental health zong an kulh dih tiah an langhter.
Al-Rantisi sii inn ah hin, Gaza ngakchia cancer zawtnak ngeimi hna an chiahnak hmun ah hin mipi 1000 tluk nih ralhrialnak ah an hman tiah theih a si. Hi kong he pehtlai in, Palestinian Health Minister Mai al-Kaila the Wafa news agency nih a langhter ning cun, Gaza al-Shifa sii inn hi Israel ralkap nih voi 5 tluk bomb a puahhnawh tiah a chim.
Hamas Hruaitu Top 3 Hna, Qatar Ah Dollar Billion 11 He Nuam An Cen. October 7, Israel kahdohnak in mipi nunnak a Liam lio, Gaza hmunram Palestinian tualchungmi hna nih a herhmi siiai, din le ei kawlhawl in an vah lio ah, Hamas hruaitu cheukhat hna cu Gaza hmunram in lamhlapi rili Kam ah caan an hmang tiah theih a si.
Hamas hruaitu top 3 minung 3 hna, Ismail Haniyeh, Moussa Abu Marzuk le Khaleed Mashal hna cu an ram buainak karlak ah, Middle East Qatar ah dollar billion 11 tluk tangka he nuam an cen tiah, New York Post report nih a langhter.
Hi kong he pehtlai in, ram hruaitu Top 3 hna hi pumpak vanlawng in khualtlawn ansi naak kong langhter a si i, US i Israel embassy zong nih X (Twitter ṭhing) ah post ser in ram hruaitu Top 3 lak ah minung 1 men hi zeizat dah si hnga tiah an chim.
Iran Bawmtu Yemen Misual Hriamtlaiphu Nih, US Drone An Kah Thlak. Yemen ram Houthi misual hriamtlaiphu nih, US ralkap drone an kah thlak tiah US ṭuanvo ngeitu le Houthi cawlcanghnak Iran cozah bawmtu nih an chim. US ṭuanvo ngeitu nih, Yemen rili Kam MQ9 drone kah thlak a sinak kong an chim i, Houthi hriamtlaiphu biachim tu zong nih Kan mah kah thlakmi a si tiah a chim chih.
Israel-Hamas kahdohnak ah, US nih Middle East i Iran bawmtu ram misual hriamtlaiphu hna cu i thlak ve lo dingin ralrin a pek cang hna. October thla chung khan Houthi misual hriamtlaiphu nih Yemen in Israel kahdohnak vanlawng le Drone an kah thlak piak hna tiah US nih a chim.
Lebanon i Hezbolaah misual hriamtlaiphu nih Israel hi an rak kah ve fawn. hi kong he pehtlai in, Hezbollah nawlngeitu nih a chim micu Israel nih Gaza kap in tualchung mipi a thah peng hna ahcun Middle East kahdohnak hi a zualter chin chin lai tiah a chim.
Minphun Ramdang Harsatnak Le Buainak Daihter Kho Ding Ah Americans Nih Biden Naak In Trump An Zumh Deuh. US vote petu hna nih, Ukraine, Israel le China buainak daihter ding lam ah President Biden nakin President ṭhing Trump an zumh deuh tiah Bloomberg New le Morning Consult nih thimnak Poll thar a ngeihnak ah an langhter. Bia halnak lettu lak ah 46% zatuak nih hin, Trump hi US le China pehtlaihnak buainak hi deihter kho dingin an zumh i, Biden tu cu 34% zatuak nih an zumh ve tiah theih asi.
Cu bantuk ṭhiam in, Russia le Ukraine buainak deihter dingah 45% zatuak nih Trump an zumh i, 34% zatuak nih Biden an zumh ve. Hamas le Israel buainak deihter ding zongah 43% zatuak nih Trump an zumh i, 33 % zatuak nih Biden an zumh ve tiah theih a si.