Israel ah milem!
======
Judah biaknak nih milem (satil/saram siloah minung loin sermi zuk/lem) cu an inn si seh an biakinn hna zong ah i chiah an duh bak lomi a si. Judah (jew) biaknak kan ti tikah a fawinak in Jesuh Khrih hi Pathian Fapa Messiah a si ko ti a cohlang lomi an si, le Nawlbia 10 chung bantuk in Siasal (milem) ngeih le cu bantuk zuklem hmai kun kha a kham bakmi an si. Hmanthlak tepawl hmanh an tar duh lo.
Milem le siasal an rak i ser an rak i chiah ruang ah Israelmi hna nih fak tukin Pathian thinhunnak kha an rak ton lengmang ti cu Bible i an kong kan relmi ah kan hmuh. Tu chan zong ah Israel Jew hna cu Nawlbia tang ah an um rih i Khrih Khamhnak Thawngttha cu a fih in an fihmi a si. Asinain Nawlbia an zul kho dih lo. Jew zong ah cun Pathian zei a rel lomi an hun karh chin lengmang tthan i Khrihfa zong ah lut lo, Judah biaknak zong zei pipa ah chia ti loin taksa duhnak le Siasal hmai ah lam le khui kha a poi ah ruat ti lomi an tam lengluang ve.
Nihin Khrihfa nih kan i cawnpiakmi cu Pura le Siasal hmai theng na kun hau lo; Pathian nakin na duhdeuhmi kha na siasal a si ko ti si. Cu pinlei ah Pathian Vel kan tinco caah kan minung sinak kha kan tei khawh lo ning a si zia cu Thiang Thlarau nih a kan hngalhter tthan i Bawipa sinah kan kir kha a biapimi a si. Amahbelte mit in hmuh le kut in tongh khawhmi Siasal cu ka lungtak in ka bia lem lo nuamh le haihnak, daihnak asiloah lawmhnak ca men ah a hmai ah ka kun, ka lam ka khui, kai hlawk le si ko tiin a poi ah ruah lohi cu a Pathian zeirellonak taktak kha a si ko cang.
Kan nau pakhat a thli in zuu a ding tawn, Vodka cu a rim um lo caah nu le pa, hawikom nih an thei lo. A nu le pa ttih hna caah a thli in ding nain an van theih tikah a ngol hlei lo, an ka theih vaivek cang a ti i an hmai ah a din chel a riit ngaichel kha si cang. Cu nih langhtermi cu nu le pa zeirel lo kha a si ko.
Hamas nih nai zarhte ni i Israel an phomh ah khan mu, Gaza ramri Israel ram these ramcar cung ah Music Festival ngan ngai an tuah lio le milem lian ngai siasal pakhat Buddah bantuk in a tomi hmai ah Israel zeimaw zat le ramdang in a rami telh in an zate a thong leng cu an lam, an i kup, an khui, hla an sa i an i nuamh liopi si kha News ah le Social Media ah Video Clips tampi um ko khi mu. Mah Music Festival i aa telmi lawng 300 deng an thi i Hamas nih an tlaihmi tambik zong cuka hmun ummi an si ko kha. Tutan hi Ralpi 2nak hnu ah Israel nih a fakbik an tonmi a si a titu an um i 2000 kum hnu a fakbik an tuarmi si cu fiang.
Brasil DJ pakhat zong ai tel kha mu. Ka lung a van chuakmi cu Brasil an puai ah Jesuh sersatnak an tuah i Satan nih Jesuh a tei ti kha an langhter ni tlawmpal ah tilian nih Brasil ah tamtuk a thah a hrawh hna ti kha kan hmuh i kan ruah. Israel chinchin cu Nawlbia tang nungmi le Pathian nih ka mi a timi an si.
Israel cozah a thinhung i ramkip in Israel cu an ram ah raltu ding in an tlung. US le Nato nih an dirkamh. Asinain Pathian nih a dirkamh hna lai maw? Ka huam ve caah ttha tein an kong; Israel cozah thar siseh US-Israel nih Arab a naih ning tibantuk tiang in ka zoh tikah Israel caah zangfahnak ka ngei. Cucu Khrih hi Pathian Fapa Khamhtu a si tiah an cohlan lomi hi a sibik. Cun Khrihfa hna nih Israel an hmuhning tamdeuh hi ka thinphang, Pathianmi an si nain Khrih zumtu cu Pathian Fa kan si cang ti hi kan hngalh ahcun kan ruahning ai dang deuh kho men. Pathian mi le Pathian fa timi pehte ding.