Iran Nih Israel Cu Gaza Na Luh Ahcun Kan I Thlak Lai Lo Ti Chim Awk A Tha Lo Tiah Ralrinnak A Pek!
==========
Israel nih Hamas ralhrang pawl an hram in kan bongh lawlaw hna lai tiin Gaza khuapi ah luh an i tim cuahmah cang. An ralkap zei maw zat cu thongthla pawl chanh awk ah an lut cang hna tiah Israel nih an langhter.
Iran ramdang Minister Howwein Amir Abdollahian nih cun middle east ram hna zei maw zat cu a rannak in a ton cuahmah cang hna hlei ah Hamas hruaitu Ismail Haniyeh zong Qatar ram doha khuapi ah October 14 ah khan a va ton. Hi an i tonnak ahhin Hamas nih Civil mi an tlaih mi hna kong biapi in an i ceih tiah Iran nih cun an langhter.
Asinain Iran nih cun Israel ralkap pawl Gaza strip ah an luh ding cu a duh in a duh lo caah ahohmanh nih ral a fak chin lai lo tiah chimchung khawh a si lo tiah Israel cu ralrinnak a pek than.
US Preisdent Joe Biden nih cun tutan Israel le Hamas buainak ahhin ahohmanh i thlak hlah ulaw nan caah a tha deuh lai tiah vawlei cung ram hna cu ralrinnak a rak pek cang hna.
Kan hnu te ah khan Iran nih cun Lebonon ah a ummi Hezbollah pawl tutan ral ah an i tel ve sual ahcun Israel caah a poi tuk lai tiah ralrinnak a rak pek cang. Iran nih hin Hamas ralhrang le Hesbollah ralhrang hna cu Israel dotu ding bak ah a bawmhmi hna an si.
Israel – Hamas kar buainak ah EU meeting tuah dingin nihin ahhin chungtel ram hruaitu hna cu video in bia i ruah dingin sawm an si tiah EU Chairman nih a chim. Hi meeting ah biatung pathum ceih timh a si tiah Chairman Charles Michel nih a chim.
Pakhatnak, Zapi sinah minung hawi zawnruahnak he tlukruang in bawmh ding, Pahnihnak, tlanghrawn ral hraanh lo le aa pehtlai mi hna he ton in tuan khawhnak le Palestine ram dirhnak ah aa telmi ramhnih daihnak kong. Pathumnak, EU chung kiangkap ah innlo chuahtak ral ruang har tongmi innpa ram ah thial in har ton ding telh in, humhimnak kongkau a si lai tiah Chairman nih a chim.
Israel ralkap hna cu Gaza ah a um mi Hamas ralhrang pawl cihmih awk ah Gaza ah an lutcang hna tiah IDF chimnak nawlngeitu Daniel Hagari nih a chim. Israel ralkap hna cu Tank zei maw zat he Gaza ah lut in Hamas nih an tlaih mi hna pawl va kawl awk ah an luh hi a si tiah a chim chap. Hamas nih hin minung 150-200 karlak hrawng an tlaih hna, asinain Israel nih cun minung 120 lawng fiang tein an theih khawh rih hna.
Israel le Palestine buainak daihter awk ah US nih cun heh tiah aa zuam i, kaphnih hruaitu pawl a ton cuahmah hna lio a si. Israel nih Gaza ah a um mi minung 1 million renglo cu suimilam 24 chung ah chuak dih u tiah nawl a chuah hnu in, a rannak in an chuak thluahmah cang hna. Hi kong ah UN nih cun a si kho lo mi a si tiah a ti ko nain Israel nih cun a bia a let hlei lo.
Hamas hna nih ruahloin kahdohnak an tuah mi ruangah Israel ah minung 1300 renglo an thi cang, asinain Israel nih Gaza ah Vanlawng le miakpi in kahdohnak a tuah mi ruangah Gaza ah a um mi minung 1900 hrawng an thi i minung 7696 renglo hliam an tuar.
Gaza Khrihfa Sizung Bomb Nih A Tlak, Minung A Thimi An Tam. October 17 (cawnnihnih) ah Gaza i Khrihfa sizung Al-Ahli Baptist Hospital cu bomb nih a tlak i a tlawmbik minung 500 an thi tiah Gaza Health Ministry nih an thanh. Hi kong ah Hamas le Israel cu an i puh ve ve. Hamas nih Israel nih vanlawng in a thlak mi a si a ti lio ah Israel nih Hamas nih an kah sual mi (misfired) a si tiah an chim ve.
October 18, thaizing hi US President Joe Biden cu Israel le Jordan ah a tlawng lai i Jordan khuapi Amman ah Jordan siangpahrang Abdullah II, Palestine President Mahmoud Abbas le Egypt President Abdel Fattat el-Sissi he tonnak a ngei ding an si nain Jordan nih Biden he ton ding an i let (canceled) caah Biden cu Israel tiang lawng a tlawng lai tiah White House nih an thanh.
Atu tiang ah Gaza lei a thi mi hi 3,000 leng an si i hliam a tuar mi 9,700 an si.
Cun a tlau mi (an ruak hmuh lo mi le a thi maw a nung dah ti theih lo mi) hi 1,200 an si tiah Gaza Health Ministry nih an thanh. Israel lei a thi mi 1,400 an si, a tam deuh mi misawhsawh an si Israel ralkap zong an i tel. Hamas nih Israel rammi an tlaih mi 190-200 an si tiah theih a si. Nifatin tein Hamas nih Israel lei ah rockets missile a kah bantukin Israel zong nih Gaza cu cunglei in a kah peng ve.
Gaza Kong He Pehtlai In EU Nih Lakhruak Meeting A Auh. Isreal le Hamas karlak ah a cang mi buainak a karh tuk lio ah Middle East kong he pehtlai in Europe ram hruaitu pawl lakhruak in Zoom meeting an ṭhu hna. Nifatin in a thi mi an karh bantuk in atu buainak kong ah Europe ram pawl an ruahnak aa khat kho cio hna lo tiah VOA nih a chim.