Tonzang Peng Ah India Lei In A Rami Hriamtlai Phu Khat Cu CDF-Tonzang Nih An Kah Hna!
==========
Chin ramkulh, Tonzang peng, CDF-Tonzang Battallion nih an ukmi hmunram Thansi khua le Santone khua hna ah India lei in a rami Chin Kuki Liberation Army(CKLA) cu an kah hna, tiah theih a si.
CKLA hriamtlai phu cu CDF-Tonzang hmunram cheukhat ah khualtlawng mi, meithal he tlerhkhawnh in tangka hal, thilri laakpiak a hmangmi phu an si i khuate hna ah tualchung mi hrocer in phaisa hal an hman ruang ah CDF-Tonzang Battalion 1 le 2 nih an kah hna, tiah CDF-Tonzang Battalion-2 nih October 26 ah an thanh.
CDF-Tonzang Battalion 1 le 2 nih an kah hna caah CKLA phu cu an zaam dih i minung 3 cu India ralkap nih an tlaih hna, a dang cu Manipur tiva lei ah an zaam i minung tam ngai hliam an pu, tiah an thanhmi ah cun an langhter.
CDF-Tonzang nih an langhter ning ah; CKLA hriamtlai phu cu India ram mi Ngam Cha le Ja Mon hruaimi phu a si i a luancia 2023 March 24, zan suimilam 10:00 hrawng ah Tonzang peng Phaisat khua ah lut in tualchung mi cu phaisa zong an rak chuh bal hna, tiah theih a si.
CKLA hriamtlai phu cu India-Myanmar ramri hrawng ah hrambunh in a ummi phu an si, tiah naihniam in a ummi nih an chim. Kuki miphun aiawh in hriam a tlaimi phu cu Kuki National Organization/ Kuki National Army phu khat lawng an si i Kuki min pu in hriam a tlaimi phu dang cu Kuki miphun aiawhtu phu an si lo, tiah tualchung hriamtlai phu le Kuki mipi hna nih an chim.
Kanpetlet Khuachung Le Khuate Dihlak Tluk Cu Kan Uk Khawh Cang – CDF-Kanpetlet. Chinram thlanglei Kanpetlet khuachung le khuate dihlak tluk cu kan uk khawh cang, tiah CDF-Kanpetlet chimphuannak nawlngeitu nih a chim. Kanpetlet khuachung ah SAC ralkap pawl cu an i chawkvak ngam ti lo, sianginn zong an ong ngam lo, khuachung ummi cheukhat hmanh zalong in an um ngam lo, khua pawngkam ah hmunhma kan laak dih i kan uk khawh ṭhan cang, khuate lei zong kan uk khawh dih ti tluk a si, tiah CDF-Kanpetlet chimphuannak nawlngeitu nih cun a chim.
SAC ralkap pawl cu Kanpetlet khuachung pengukzung, BEHS sianginn, Yangaung pura le penguk fimcawnnak zung lawng ah umhmun an khuar kho cang, tiah theih a si. A luancia October 20 ni ah CDF-Kanpetlet nih khuachung um SAC ralkap pawl cu umhmun an khuarnak ah an va kah hna i ralkap 2 an thih pinah hliampu zong an tam, tiah CDF-Kanpetlet nih an rak thanh.
Kanpetlet khuachung ah SAC ralkap le CDF-Kanpetlet kaphnih kar kahdohnak fak a chuah tawn caah tualchung mi dihlak ti tluk cu ral an zaam i chungkhar 20 hrawng lawng an taang cang, tiah CDF-Kanpetlet in chimphuannak nawlngeitu nih a chim.
Kanpetlet khuachung ah kahdohnak fak a chuak kho ṭhanmi a si caah tualchung mi zong SAC ralkap nih umhmun an khuarnak naih ah umkal lo ding, tiah CDF-Kanpetlet nih ralrin an pek hna. Milu 5000 leng le inn 1200 a umnak Kanpetlet khuami hna cu Magway peng Saw khua leng ramtang le dum hna ah ralzaam in an i dornak kum 3 a tling deng cang.
Myanmar Ram Pumpi In Thla 10 Chung Ah Nu 300 Tluk An Thi I 500 Leng Tlaih An Tong. 2023 January-October, thla 10 chung ah SAC ralkap vanlawng kahdohnak ruang ah Myanmar ram pumpi huap in nu 193 an thi i 500 leng an tlaih hna, tiah Assistance Association for Political Prisoners(AAPP) nih October 26 ah an thanh.
Sagaing ramṭhen ah nu a thimi an tam bik i thla 10 chung ah nu 152 an thi. Cun, tlaih a tongmi nu an tam biknak cu Mandalay ramṭhen in a si. Nu a thimi hna lak ah SAC ralkap hriamngan in a thimi 100 tluk an si, tiah AAPP nih an thanh.
2023 January-October, thla 10 chung ah SAC ralkap nih tazacuai in thong an thlakmi nu 260 leng an um i, cu chung ah nunchung thong thlak dingmi 16 le thihdan pekmi 5 an i tel, tiah AAPP nih cun an langhter. 2021 February – 2023 September thla tiang ah SAC ralkap ruang ah Myanmar ram pumpi in nu 600 leng an thi, 4900 leng tlaih an tong i 3500 leng cu thlah an si rih lo, tiah AAPP nih October 1 ah an langhter.
SAC ralkap nih hramhram in nawlngeihnak an laak hnu 2021 February -2023 October thla tiang ah Democracy cawlcanghnak ah aa telmi hna telh in tualchung mi 4,159 an thi cang, tiah AAPP nih October 26 ni ah an thanh. Credit: The Chin Post