Hmawbi Vanlawng Ralkap Hmunpi Kahnak Ah A Thi Mi An Tam Kho!
========
Myanmar ram mipi le tlangcungmi umnak ah vanral kahnak ah an hman mi SAC vawlawng ralkap umnak Hmawbi sakhaan ah 107MM bomb 5 in October 22 zaan 9:00pm ah kan kah hna tiah Urban Special Operation (U.S.0) hruaitu pakhat sin theih a si.
Yangon, Hmawbi peng chung um SAC vanlawng ralkap umnak sakhaan in ralkap thawngpeknak thawngin kah nak tuah a si i vanlawng datsi le vanlawng remhnak le thilri chiahnak hmun lei ṭhial mi vanlawng pawl an umnak a si tiah U.S.0 nih thawngthanhnak a tuah.
“Vanlawng sakhaan kahnak ah a rawkmi thilri a tam ngai tiah theih a si. Kahnak a chuah hnu in an vanlawng pawl niam tein a zuang. Yangon khua chuahnak le Hmawpi, Thaukchianh, Hle Ku peng, lamton kip ah mipi umkalnak an check hna. Kan ralkap pawl an him ko” tiah U.S.0 lei nih an chim chap.
Mah banatuk khuachung kahnak hi voi 5 tuah a si cang. Hmailei zong SAC lutlai pawl sipuazi he pehtlai mi hmun ah kah timh a si cang ko tiah U.S.0 lei nih ralring pek a si. Khuchung kahnak Operation ah U.S.0 nih Yangon khuachung ah kahnak tuah a si cang lai tiah September 15 ni thawngthanhnak a tuah hnu thlakhat chung ah voi 4 kahnak a tuah cang tiah People Spring nih a ṭial.
Hmawbi Peng SAC Air Force Sakhan Missile In An Kah. Yangon ramṭhen, Hmawbi peng SAC Air Force sakhan cu October 22, zan ah tualchung hriamtlai phu nih Missile in an kah, tiah tualchung mi nih an chim. Nizan October 22, zan suimilam 9 hrawng ah SAC Air Force sakhan chung in puahkeh thawng voi 3 tiang pehtlai in a thang, tiah an chim.
A voi 3 nak a puah ning cu a thang khun i inn zong a tlirh dih, tiah Hmawbi SAC Air Force sakhan pawng a ummi pakhat nih RFA ah a chim. Puahkehnak a chuah hnu in Air Force sakhan kiangkap le Hmawbi gate ah SAC ralkap nih motor, motorcycle aa chawkmi cu an check dih hna, tiah tualchung mi nih cun an chim. Hmawbi Air Force sakhan puahkehnak kong he pehtlai in SAC nih thanhnak zeihmanh an tuah lo.
Yangon hrambunh Urban Special Operation nih “SAC ralkap cu tlangcung mi hna telh in sualnak ngei lo mipi hna fahnak pek le vanlawng hmang in thahnawnnak a tuah tawnmi an si caah atu bantukin Missile kahnak kan tuahnak a si” tiah nihin October 23 ah an thanh.
Shwebo Peng Bonebwe Khua Ah SAC Ralkap Nih Tualchung Mi 3 An Thah Hna. Sagaing ramṭhen, Shwebo peng Bonebwe khua ah SAC ralkap nih sualnak ngei lo tualchung mi 3 an thah hna, tiah khuami hna nih an chim. Bonebwe khua ah October 15-20, ni 6 chung umhmun khuar in a ummi SAC ralkap nih khuami kum 30 in kum 45 karlak pa 3 cu an thah hna i, khuachung ah an ruak an hlonh hna, tiah Zamani hriamtlai phu in ṭuanvo ngei pakhat nih a chim.
Bonebwe khuami pa 3 ruak cu SAC ralkap nih khua an chuahtak hnu, October 21 ah Zamani hriamtlai phu, tualchung hriamtlai phu le pah-kah-phah hna i fonh in Bonebwe khuachung thianhfelnak an tuah ah an hmuh hna.
NUG No. 1 Military Region Nih PDF Ralkap Hna Cu Hriamnam An Pek Hna. Magway ramṭhen, No. 1 military region um Magway ramṭhen uknak zung hruainak in hriamnam peknak training an lim, tiah theih a si. October 19 ah NUG runvennak zung, PDF No. 1 military region, Magway ramṭhen uknak zung hruainak in Magway ramṭhen hmun pakhat ah hriamnam peknak hi an tuah.
Hriamnam peknak ah hin Magway ramṭhen PDF ṭuanvo ngeitu, pengkomh ṭuanvo ngeitu, Battalion Commander le Deputy Battalion Commander hna an kai i PDF thantaar zong salute peknak an tuah. Cu pinah nunnak a liammi PDF hna zong upat peknak an tuah i biatawi chimnak zong an ngei. Hriamnam peknak ah PDF le Pah Kah Phah an kai, tiah theih a si.
Magway ramṭhen uknak zung hruainak in hriamnam peknak training voi 7 kan tuah cang i ralkap 800 leng an kai. Battalion in Battalion 29 zong hriamnam kan pek khawh cang hna, tiah NUG runvennak zung, PDF headquarter nih an thanh. Cu leng ah rampi budget le mizapi nih nan thawhmi tangka in raltuk cawnnak training le hriamnam cawknak zong kan pehzulh rih lai, tiah an langhter.
Hakha Peng Tender Ṭuannak Kong He Pehtlai In CDF-Hakha Central Council Nih Thanhnak An Tuah. CDF-Hakha Central Council nih Hakha peng Tender ṭuannak kong he pehtlai in nizan October 22 ah cathanh an chuah. An cathanh chung ah cun, Central Executive Committee(CEC) nih biachahnak kan tuah bantukin Tender ca ah a biapi bik le a herh bikmi cu lung a si caah Lung laak kan kham, tiah an langhter.
“CDF-Hakha Central Council cu Kawl ralhrang uknak le hramhram uknak paoh doh ding tiah aa hmaithlak bantukin SAC riantuannak paoh a lamkip in phihkhar le doh aa zuam peng. 2021 October 01 thok in Tender tuanmi paoh dantat ding tiah 2021 September 30 ah Chinland Joint Defense Force Facebook cahmai ah cathanh chuah a rak si bantukin nawl ngai lomi hna tampi dan kan tat cang i a dang zong pehzulh in dan kan tat rih lai,” tiah an cathanh ah cun an langhter.
Cu pinah Tender riantuannak ah a herh bik cu lung a si caah Central Executive Committee meeting biachahnak CEC/2023-15 ningin Tender ca lunglak cu CDF-Hakha nih kan kham; pumpak ca a phormi paoh cu Tender he aa pehtlai lo tiah gate ah min thut a si lai; chimh ngai lomi cu lung a phorhnak motor thla thum chung tlaih i dohthlennak caah hman chung ding le lung ngeitu cu lung cinh man zat in dantat ding tiah biachahnak ngeih a si. Cucaah hi cathanh kan chuah hnu a dang cathanh kan chuah ṭhan hlan tiang cu Central Council ram chungah Tender he aa pehtlaimi lunglak cu kan kham, tiah an langhter.