Operation 1027 Hnu In Sagaing Ramṭhen Ah SAC Minung 400 Leng Nih CDM An Tuah
===========
Chaklei hriamtlai phu unau thum nih 1027 Operation an kalpi hnu in Sagaing ramṭhen khuapi laak an i timh ruang ah kahdohnak a zual i SAC kuttang rianṭuantu ralkap, palik le zung rianṭuantu 400 leng cu mipi sin ah an i fonh, tiah tualchung hriamtlai phu nih an chim.
Katha khuapi in minung 85, Indaw khuapi in 100 leng, Htichaingh khuapi in 100 leng, Kawlin khuapi in 100 tluk le Wuntho khuapi in minung 60 hna cu mipi sin ah an i fonh. CDM a tuahmi a tam deuh cu zung rianṭuan an si i palik le ralkap cu an tam tuk rih lo, tiah an chim.
1027 Operation thawk hnu tlawmpal ah ramṭhen dang le ramkulh dang zong ah khuapi laak ding in kahdohnak kalpi a si ruang ah SAC kuttang ah rian a ṭuan rihmi Non-CDM zung rianṭuan hna le SAC ralkap pawl cu a caan um liote ah mipi sin ah i fonh ding in ralrin peknak he sawmnak cathanh zong an chuah chih.
“1027 Operation kalpi hnu November thla thawk in Sagaing ramṭhen chung peng kip ah Non-CDM tawlreltu ding Committee dirh a si i mipi sin ah i fonh dih ding in ralrin peknak le sawmnak tuah a si bantukin mipi sin ah aa fonhmi hna cu an herhmi ṭuanvo kan laakpiak hna, khuapi cheukhat zong ah CDM a tuah i mipi sin ah aa fonhmi an um nain cazin felfai in kan la thlu kho rih lo,” tiah NUG chimnak nawlngei Nay Bone Lat nih a chim.
Non CDM hna kong he pehtlai in December 12 ni ah SAC chimnak nawlngei Zaw Min Thun nih cun, “Cozah rianṭuantu hna le humhimnak latu palik, ralkap hna cu tualchung hriamtlai phu nih hramhram in an rian chuahtak ding in an fial hnanak le an tlerhkhonh hnanak hmuh tik ah hihi phunglam he aa kalhmi a si i mizapi nih an cohlan ṭhiam ko ahcun atu bantukin cozah rianṭuantu hna ṭhihpheih le tlerhkhonh a herh lonak kong mipi dihlak nih ruah caan a cu cang,” tiah SAC tlaihmi Media ah a chim ve.Credit : The Chin Post