Hakha SAC Byuhahmu Col. Hein Htet Aung a Thi tiah CHRO nih a Fehter.Hakha khua SAC ralkap bu i Tactical Operation Command ah luzik a si mi Colonel Hein Htet Aung a thi, tiah Chin Human Rights Organization (CHRO) nih a fehter.
A thihnak a ruang cu lung lei zawtnak a si tiah CHRO nih a langhter i, ral sunghnak kong he pehtlai in Napyidaw SAC zung lei nih hneknak tam tuk an pek caah a si kho, tiah a langhter chap.
Col. Hein Htet Aung hlan ah hin Hakha SAC ralkap Byuhahmu cu Col. Saw Tun a rak si i, Oct 2023 ah khan an rak ṭhial. A thi mi Col. Hein Htet Aung hi Col. Saw Tun zaka ah an chiah mi a si, tiah CHRO nih a langhter.
Thawngpang Dang Rak Rel Chih :Myanmar Kong ah “Kan Lungrethei Hringhran” tiah UNCS nih Chim. UN Security Council meeting ah Myanmar kong he pehtlai in chungtel zapi huap in biachahnak ngaingai an tuah kho ṭhan lo.
Chungtel ram 15 an umnak UN Security Council (UNSC) nih nizan February 5 ah khan Myanmar ram kong he pehtlai in kutka khar ceihhmainak an ngei ṭhan nain chungtel zapi huap in Myanmar kong ah biachahnak ngaingai an ngei kho lo.
Sualnak ngei lo Myanmar rammi hna ralchanh in SAC ralkap nih vanlawng kahnak a tuah mi cung ah faakpi in duhlonak an langhter i, harnak a tong mi Myanmar rammi milu 18 million sin ah hnahnawhnak um lo te in bawmhnak phakter ding le President U Win Myint le Daw Aung San Suh Kyi tel in ramkhel thongtla vialte thlah ding in US, UK, France le a dang UNSC ram 6 nih hmun khat ah cathanh an chuah.
Asinain, Tuluk le Russia tel in a dang ram 4 nih cun SAC ralkap ralchanh in Myanmar kong ah zeihmanh chimrel mi an ngei. UNCS nih atulio Myanmar ram buainak kong ah “Kan lungre a thei hringhran” tiah a tlangpi in an langhter i, SAC ralkap nih ASEAN hnatlaknak panga a ṭuanchuah nakhnga an forhfial.
UN nih a rak chiah mi Myanmar special palai Noeleen Heyzer cu 2023 ah a rianṭuan caan a dih cang caah a lawng mi Myanmar special palai hmunhma ah palai thar a rianrannak in chiah ding zong in UNSC ah ceihhmainak an ngei, tiah theih a si.
Lom Um Kho Tuk :CNF/CNA nih KIO/KIA Dohthlennak Kum (63) Tlin Lawmnak Ca a Kuat.Tlangcungmi hna nih kan i ruahchan mi ramkhel hmuitinh kan phak hlanlo KIO/KIA he pehzul in ral kan do ṭi lai, tiah CNF/CNA nih a langhter.
Nihin February 5 hi KIO/KIA nih dohthlennak an tuahnak kum 63 a tlin ni a si i, CNF/CNA zong nih KIO/KIA sin ah lawmhpinak ca a ṭial.“KIO/KIA dohthlennak kum 63 caan chung ah thisen le nunnak a pe mi Kachin ralkap vialte le Kachin mipi cung ah upatnak kan in pek hna,” tiah CNF/CNA nih upatnak a langhter.
“Atulio Myanmar ram dohthlennak lamthluan zong ah KIO/KIA i a fek dirhmun, ṭhithruainak le lungṭhawnnak cu CNF/CNA nih upatnak kan in pek hna,” tiah CNF/CNA nih a langhter chap.
Chin le Kachin tel in tlangcungmi vialte nih kan i ruahchan mi ramkhel hmuitinh kan phak hlanlo KIO/KIA he pehzul in ral kan do ṭi lai, tiah CNF/CNA nih a langhter.
A luancia 1961 ah KIO/KIA an rak dirh i nihin February 5 hi kum 63 a tlin ni a si. KIO/KIA dohthlennak kum 63 tlin camtuak cu KIO/KIA Headquarters le Kachin ramchung ralzam camp tampi ah an tuah cio hna, tiah theih a si.Crredit : The Hakha Post