Mizoram Siaha Ah Chin Pa Sin In Raltuknak Hman Mi Telephone Hmete Walkie Talkie 100 Leng An Tlaih
=========
Mizoram ramkulh, Siaha khuapi ah Chin mi pa sin in kahdohnak i an hman mi chonhbiaknak telephone hmete Walkie Talkie le seh thilri zeimawzat cu Assam Rifles nih an tlaih tiah theih a si.
Siaha khuapi chung Tlangkawn check-gate ah Assam Rifle nih Chin pa motor cu check-hlatnak an tuah i Walkie Talkie 100 leng le seh thilri an tlaih tiah an langhter.
“Walkie Talkie chonhbiaknak telephone hmete hi raltuknak ah hman tawnmi thilri a si caah a tu bantuk in an tlaihnak hi a si” tiah tualchungmi pakhat nih a chim. Walkie Talkie phortu hi Chin ramkulh, Hakha khuapi (Pu Ngunhre) fapa (Pu Chawngtu) kum 38 mi a si tiah an langhter chih. Lungmili Post
Thawngpang dang: Yangon In Mandalay Lei A Kir Mi Mino 4 Cu SAC Ralkap Nih Motor Chung Ah An Tlaih Hna.Yangon in Mandalay lei a kir mi Taze khua mi mino 4 cu SAC ralkap nih motor chung ah an tlaih hna, tiah tlaih a tong mi hna he naihniam in a um mi nih an chim.
Nihin February 13, zinglei ah Yangon-Mandalay a kal mi Express khualtlawng motor aa cit lio mi mino 4 cu SAC ralkap nih Tada-U gate pawng ah an tlaih hna, tiah theih a si.
“Yangon-Mandalay Express motor he khual a tlawng mi Taze peng Kanhtuma khua mino 4 cu Tada-U gate pawng an phanh ah SAC ralkap nih motor chung ah an tlaih hna. Tlaih a tong mi mino 4 cu kum 23-24 hrawng an si hna i Yangon-Mandalay ah motor pakhat aa citṭi mi hawikom rual an si,” tiah tlaih a tong mi hna he naihniam in a um mi nih an chim.
SAC nih hramhram in kum 18 cung mino nu le pa ralkap tlakter ding tiin phung a nunter ṭhan ni February 11 ni thawk in SAC ralkap nih khualtlawng mino hna cu chekhlat in an tlaihkhih hna, tiah Sagaing le Magway thawng laaknak hrampi nih an chim. The Chin Post