Christmas le Kumthar Hmannak Kong He Pehtlai In HCMF Nih Cathanh An Chuah!
=========
Christmas Le Kum Thar Cu Biakinn Chung Lawng Ah Tuah Ding In HCMF Nih Mizapi Sinah Theihternak An Tuah. Tu kum 2023 Christmas le 2024 Kum thar cu khuacaan le thawngpang ruangah mahle siarem ningin tuah si loin Biakinn ah pumhnak he hlunghlai tein tuah cio si ko seh, tiah November 9 ah Hakha Christian Ministers Fellowship(HCMF) EC nih cathanh an chuah.
HCMF EC nih caan har ruangah Christmas le Kum Thar kan tuah khawh lonak kum 3 a si cang. Tu kum zong khuacaan le thawngpang ruangah Christmas le Kum Thar cu mah le siarem ningin tuah si loin Biakinn ah pumhnak he hlunghlai tein tuah cio ding in mizapi sinah theihternak an tuah. A leng lei ah sathah in Christmas le Kum thar hman lo ding, Biakinn chumtual zong ṭamh lo ding. Biakinn hmai singboard le Biakinn chung lawng ṭamh dingin HCMF EC nih an cathanh ah cun an langhter.
Cu pinah mahle inn cio zong ṭamhnak tuah lo ding in le lam zong ah zeihmanh ṭamhnak tuah lo ding in theihternak an tuah. Biakinn chung ah Christmas le Kum thar tuah dingin HCMF nih timhtuahnak an ngeihnak a ruang cu atu lio thil kan tonmi hi faak piin kan ruah caah a si tiin HCMF Chairman Rev. Nawl Cung Lian Le Secretary Rev. Dr. Stephen Lian Hup Ling an minthut he cathanh an chuah.
Tulio kan ram sining ruang ah Christmas le Kumthar kan hman lo nak hi kum 3 a si cang nain zei ti a si khawm ah tukum zong Biakinn chung te ah Pathian thangṭhat in caan hman kha a ṭha bik ko lai tiah kan ruah caah a tanglei langhter mi hna hi zul kho cio ding in biachahnak kan tuah tiah HCMF nih cathanh a chuah.
1. Tukum Christmas le hmai Kum Thar hi puai (sathah le rawl dumṭinak) in tuah lo ding le Biakinn cio ah pumhnak le thangṭhatnak tu hlunghlai tein tuah cio ding. 2. Biakinn/sang le veng/pumpak in Christmas le Kum Thar puai a biapi in sathah/rawl dumṭinak tuah lo ding.
3. Biakinn chung cu mah duh ning in ṭamhnak (Decoration) tuah cio ding. Biakinn leng cu Biakinn Signboard lawng ṭamh ding. 4. Pumpak inn cio zong innchung lawng ah ṭamhnak tuah ding. Lam le kaa dangdang ṭamhnak tuah lo ding.
Chin Ramkulh Telh In Myanmar Ram Pumpi Ah SAC Ralhrang Nih Inn 28,000 Deng An Khangh. SAC ralhrang nih 2021, February 1 in nawlngeihnak a laak hnu 2023, October 31 tiang kum hnih le cheu reng lo chung ah SAC ralhrang le an kuttang pawl nih Chin ramkulh telh in Myanmar ram pumpi ah mizapi inn 76,923 an khangh i an hrawh, tiah Data For Myanmar phu nih November 8 ah an langhter.
SAC ralhrang nih mizapi inn khanghpiak in an hrawhpiak mi hna lak ah a tam biknak hmun cu Sagaing ramṭhen ah a si i inn 58,397 tiang a phan. Pahnihnak ah Magway ramṭhen ah a si i inn 11,540 tiang a phan, tiah an langhter. Cu pinah Chin ramkulh chung ah inn 1,638, Mandalay ramṭhen ah inn 1,570 le Kachin ramkulh ah 1,510 hna cu SAC ralhrang le an kuttang pawl nih an khangh i an hrawhpiak hna, tiah Data For Myanmar phu nih an langhter.
Aluan ciami October thlakhat chung ah Myanmar ram pumpi huap in SAC ralhrang le an kuttang pawl nih mizapi inn 603 an khangh i an hrawhpiak hna, tiah an langhter chih. United Nations Office for the Coordination of Humanitarian Affairs(UN OCHA) nih Myanmar ram cu a him tilo ruang ah Myanmar ram pumpi huap in umnak hmun a chuahtak mi, minung 2,000,000 deng an si cang, tiah October thla ah a langhter.
Yaw Le Chinram Lei A Rak Kai Mi SAC Ralhrang Motor Rual Cu Hnu Lei An Kir Ṭhan Cang. Pakokku in Chinram lei panh in a rak kai mi ralhrang hna motor bu cu Pauk le Htilin Khua kar Zipyia khua an phak hnu, November 7, 2023 ah khan hnu ah an kir cang i November 9 ah Pauk peng Yipyia khua an phan tiah theih a si.
Magwe ramṭhen, Pakokku hrambunh LIB 101 in a hnulei a um mi, Yaw le Chin ramkulh, thlanglei ah riakcaw a phor mi motor 70 hrawng cu Pakokkku – Pauk peng ah thlakhat hlei kham an si i atu cu an kir kho cang tiah theih a si. SAC ralkap 300 hrawng le riakcaw a phortu motor rual cu September 28 ah Pakokku in an rak i thawh hi a si.
Lampi ah kham an ton caah zarhkhat tiang cu Pauk peng ah an tang. Magwe hrambunh mipi ralkap he kahdohnak a chuak. SAC ralkap nih Pakokku-Pauk- Kyaukhtu- Mindat lampi hmang in Chin ramkulh thlanglei ah ralkap thazang a chap ṭhan lengmang. 2023 June 21 ah Pakokku in a rak chuak mi SAC ralkap mawṭaw 9 cu ralkap 100 hrawng nih himnak an lakpiak i Mindat-Kyaukhtu lei an panh caah cuka lamcung mipi hna nih ṭha tein ralrinnak ngei uh tiah CDF-Mindat nih an rak thanh.
June 21 ah cu SAC ralkap pawl cu phu 3 ṭhen in Kyaukhtu hmunhma chung ah an lut i lam kehlei le orhlei ah hriamngan an thlah thlorh, meithal an puah thlorh i hmai an fon thluahmah caah CDF phu hna nih cuka hmunhma khuami hna kha umkalnak tuah rih lo ding in ralrinnak an rak pek hna.
May 2022 thla ah Mindat-Matupi ah hriamnan, meithal, kuan, zen le riakcaw phortu motor runpi he an rak kai lio ah atu Ongtaw hlei cu bom in an hrawh bal cang. Ralhrang motor bu chung i ralhraang cheukhat cu November 8 chun 12:00 hrawng ah Yipyia khua ah Monywa hrambumh North-Western command lei in Mi 17 vanlawng nih an rak laak hna i nichuah chaklei hoih in a zuang pi hna tiah theih a si.