Hakha Khuachung Ah Dothlennak Phu Pawl Cawlcanghnak Ngiat Ding In SAC Nih CCTV Camera Hmun Tampi Ah A Bunh!
==========
Chin ramkulh ah SAC nih an zungpi hram an bunhnak Hakha khua ah SAC nih CDF le Dothlennak phu pawl cawlcangh ngiathlai ding in Security Camera pawl khuachung hmun (5) nak tam ah a bunh tiah CHRO le CDF phu lei nih an chim.
“Hakha khuachung ah CDF pawl nih SAC ralkap sakhaan pawl, palek sakhaan pawl le himnak an laknak hmunhma pawl kha an kah khawh mi a si. Kahdohnak a um tik ah SAC nih CDF pawl cawlcanghnak kha ngia kho ding in, an i runven khawh nak hnga CCTV Camera an bunh hi a si tiah ruah khawh a si” tiah CHRO Project Director Salai Mang Hre Lian nih Khonumthung Burmese ah a chim.
CCTV Camera pawl cu SAC zung he a naihnak hmun pawl, Chin ramkulh Chief Minister hlun inn pawngkam le a inn kalnak lam hmunhma, biakinn kalnak lam hna ah an bunh. Hakha khuachung umkalnak vialte kha ngia kho ding in hmun 5 ah CCTV a bunh kha fehter khawh a si tiah a chim fawn.
SAC nih Hakha khuapi ning in CCTV Camera bunh aa tim ko nain atutiang cun a tuah kho rih lo tiah theih a si. Hramhram in uknak lak a rak si hlan ah, Bank le Sizung pawl ah CCTV Camera an hman ko nain atu ahcun SAC ralkap sakhaan, cheukhat zung le an cawlcanghnak hmun pawl ah CCTV Camera an bunh cang tiah Hakha khuami pakhat nih a chim.
CCTV Camera pawl an bunh hnu cun mipi tlaihkhih le cheknak pawl an tuah chin khawh mi a si caah thinphang a si tiah khuami hna nih an chim fawn. “Thawngpang kan theih mi a um. SAC nih Hakha khuachung an sakhaan pawl, himnak an laknak hmun pawl le cheukhat zung ah CCTV an bunh. Adang a biapi mi hmunhma pawl zong ah an bunh hna tiah thawng kan theih” tiah CDF-Hakha rianngeitu pakhat nih a chim.
Hakha peng chung ah CDF, CNA le SAC ralkap karlak ah atu le atu kahdohnak a chuak ṭheo tawn. Hramhram in uknak lak a si hnu kum 2 le cheu chung ah SAC zung le sakhaan pawl ah kahdohnak a um pah lengmang.
Bomrap Ruang Ah Chin Ramkulh Chung Mipi 20 An Thi Cang I Hliam A Tuar Mi 37 An Um. Chin ramkulh chung, bomrap ruang ah sualnak ngei lo mipi 20 an thi cang i 37 an i hliam tiah Chin Human Rights Organization (CHRO) nih September 11 ah thawng a thanh.
SAC ralkap pawl nih kahdohnak an tuah tik ah biakinn pawl ah chikhat an i din, sianginn luhnak hna ah hmunhma an khuar i bomrap an tunh caah an kir hnu ah khuami hna nih an i lamh sual tawn tiah CHRO Project Director Salai Mang Hre Lian nih RFA ah a chim.
“SAC ralkap pawl nih bomrap tunh hna hlah sehlaw mipi hna nih bomrap harnak an tuar hnga lo. SAC ralkap pawl nih an phanhnak hmun poah bomrap an tunh kha hmuh khawh a si. Cun chikhat hmunhma an khuarnak pawl an chuahtak tik ah an tunh tak mi bomrap nih mipi pawl a puah hnawh hna. Cheukhat cu a hmun ah a thi mi an um. Cheukhat cu ke bul, kut bul in pum tlamtling lo dirhmun an phan” tiah Salai Mang Hre Lian nih cun a chim.
2021 kum ah bomrap ruang ah a thi mi minung 4 le hliam a tuar mi 2 an um i 2022 ah bomrap ruang ah a thi mi minung 9 an um i hliam a tuar mi 17 an um. 2023 ah bomrap ruang ah a thi mi 7 le hliam a tuar mi 18 an um tiah CHRO cathanh chung ah hmuh khawh a si.
KIA Headquarter Pawng Nansanyang Khua Lei A Rak Kai Mi SAC Motor Tlar Tampi A Rawk, Ralkap 27 An Thi. Kachin ram, Momauk pengkomh, Waingmaw peng, Nansanyang khua lei a rak kai mi SAC motor tlar tampi cu KIA nih September 10 ah an kah hna i motor tampi a rawk tiah Kachin lei media nih an chim.
Dotphonyang lei in motor rum 25 a rak kai mi cu KIA nih lampi bawh kharkhumh in hriamngan in an kah hna caah SAC hriamnan phur mi motor pakhat cu a kang i a puak dih. Mah motor tlar kahnak ah “Motor 15 a rawk dih, a tang mi motor 10 cu battatlion 124 (Dotphonyang hrambumh) lei ah an kir ṭhan. Motor 25 ah 15 a rawk tiah Kachin ral lei thawngpang latu sin in theih a si” tiah People’s Spring nih a langhter.
“Waingmaw peng, Nansanyang khua pawng, Aungja khua ah kahdohnak cu September 9, zing sml 8:00am in a chuak. Aungjashi in SAC ralkap a rak kai mi 30 cu KIA nih an rak kah hna. SAC lei 27 an thi, 3 a thli/zaam kho, a thi mi 27 an ruak cu aa pong ko, hriamnan an lak khawh mi a tam” tiah Kachin lei KNG media nih a chim.
KIA Headquarter pawng Nansanyang khua kahdohnak hi July thla hramthawk in kahdohnak a chuak. SAC ralkap lei in kahdohnak a tuah duh lo mi Commander LIB 88 kuttang um battalion 12, 13, 411, 37, 387 phu ralbawi hna cu Northern Command lei in an rak tlaih hna.
“Raldoh ding in lamsial an fial hna. Kal duh lo in hnulei an kir caah nawl ngai lo case in tlaih an tong. Tlaih a tong mi Battalion Commander hna chung in Battalion 13 Commander cu Bamaw hrambunh Military Operations Commands MOC 20-အမှတ် (၂၁) စစ်ဆင်ရေးကွပ်ကဲမှုဌာနချုပ်(စကခ-၂၁) hrem biahalnak ah a thi tiah thawng kan theih” tiah Kachin Wave nih a rak chim. July 3 in Nansanyang kahdohnak ah SAC lei kekal ralkap bu Battalion 13, 17, 103, 236, 83, 77, 318, 385 phu 8 an rak si nain Battalion adangdang an hun chap ṭhan hi a si. Credit: The Chinland Post