Hakha ah SAC Ralkap nih Tlaih Mi an Um ahcun HCC ah Thawngthanh Ding. SAC ralkap nih rammi kumtling ralkap tlaknak upadi a chuah mi kong he pehtlai in Hakha ah tlaih a tong mi an um ahcun Hakha Circle Council (HCC) ah theihter ding in HCC nih thawng a chuah.
SAC nih February 10 ah an chuah mi rammi kumtling ralkap tlaknak upadi (Mandatory Conscription Law) in zeitindah kan in ven lai ti mi kong he pehtlai in HCC nih a tanglei bantuk in a langhter.
“Innpa chakthlang ah SAC nih tlaih mi an um sual ahcun a rannak in HCC ah thawngthanh colh ding; Khuachung lamlennak le umkalnak ah SAC nih mi an tlaih mi hmuh ahcun khoi ka sang, hmun le caan tibantuk he HCC ah thawng peknak ngeih colh ding; SAC ralhrang a bu in an cawlcanghnak hmuh le ton lecangka in HCC ah thawng thanh colh ding” tiah an langhter.
SAC nih rammi kumtling ralkap tlaknak upadi an chuah hnu in Sagaing ramṭhen, Yangon ramṭhen le Mandalay ṭhen ah innchungkhar cazin laaknak le mino hramhram in tlaihnak tibantuk a hun um thluahmah, tiah Kawl Media pawl nih an langhter. The Hakha Post
Thawngpang dang: Kyauktaw Khuapi Cu AA Nih An Laak Khawh Dih I Hriamthil Tam Ngai Zong An Laak Chih. Rakhine ramkulh, Kyauktaw khuapi chung um SAC ralhrang Khah-mah-yiah 374, Khah-mah-yiah 375, Khah-mah-yiah 376 le Sah-kah-khah 9 hna cu Rakhine ralkap AA nih tlamtlingte in an laak khawh dih cang i an humhak cang, tiah AA nih nihin 2024, February 14 ah thawng an thanh.
Cu kahdohnak ah SAC ralhrang bawi ngan (Brigadier General) 2 zong kan tlaih hna pinah hriamthil tam ngai zong kan laak khawh chih, tiah Rakhine ralkap AA nih an langhter. Lungmili Post