Kutkai Um Ralkap le Pyithusit Sakhaan TNLA Nih An Lak
========
Shan ram chaklei, Kutkai khua ah a um mi ralkap le pyithusit phufonh sakhaan cu an lak khawh i hriam tampi an lak khawh tiah TNLA nih thawng an thanh.
Kutkai khua, Myothit sang ah a um mi ralkap le pyithusit sakhaan cu December 10 zaan sml 8:30pm hrawng ah TNLA nih an lak khawh hi a si i cu sakhaan chung in ralkap 7 an tlaih hna i pistol 2 telh in hriam phun 58 le kahdohnak thilri pawl an lak khawh tiah an thanh.
Cu sakhaan telh in Operation 1027 chung ah ralkap sakhaan, palek sakhaan le pyithusit sakhaan 55 nak tlawm lo an lak khawh cang tiah thawng theih a si.
Tamu Ah Ralkap Sakhaan 1 An Lak Khawh I Ralkap Lei Minung 6 An Tlaih Hna. Sagaing ramášhen, Tamu peng chaklei, Aungzeyar khuate ah a um mi ralkap ralkap sakhaan pakhat an lak khawh i ralkap lei thawng petu 6 an tlaih hna tiah KNA-Burma sin in thawng theih a si.
December 10 zinglei sml 8:30am hrawng ah Tamu peng chaklei, Aungzeyar khuate ah a um mi ralkap sakhaan pakhat cu dothlennak phu pawl nih an lak khawh hi a si.Ralkap lei thawng petu tiah ruah mi minung 6 zong an tlaih hna.Cu ralkap sakhaan cu KNA-Burma le dothlennak phu pawl nih December 7 in kah hram an thawk i December 10 ah an lak khawh hi a si.
Kahdohnak chung ah KNA-Burma in kum 25 hriamtlai Lettinpao le pengkomh PDF in kum 22 a si mi hriamtlai 1 nih ram le miphun caah an nunnak an pek i adang hriamtlai 12 an i hliam tiah theih a si.
Mu Khua Kahdohnak Ah Ralkap 120 An Thi, 50 An I Hliam. Mu khuachung kahdohnak ah ralkap 120 an thi i 50 an i hliam tiah KNU nih an fehter.
KNU Brigade 3 hmunhma, Mu peng chung, 2023 December 2 zaan sml 11:00pm ah KNLA le dothlennak phufonh nih Mu khuachung ah a um mi ralkap sakhaan pawl an kah hna hi a si.
Operation an thawk ni December 2 in December 7 tiang chung ah ralkap nih hmunhma an khuarnak IB 590 Headquarters, Mu khua myoma palek sakhaan le Kawpin palek sakhaan hna an lak khawh i IB 599 Headquaters le Muthasi hlei hna cu an hrawh khawh.Kahdohnak pawl chung ah ralkap 120 an thi i 50 an i hliam tiah KNU kahdohnak lei thawngzamh nih a langhter.Credit: The Chinland Post