Sagaing Ramṭhen, Mawlu Khuapi Cu Tualchung Hriamtlai Ṭangṭi Phu Nih An Laak
==========
Sagaing ramṭhen, Katha pengkomh, Indaw peng, Mawlu khuapi cu nizan December 13, zing suimilam 2:30 hrawng ah tualchung hriamtlai ṭangṭi phu nih an laak. Cu kahdohnak ah cun SAC ralkap 17 an thi i, 7 an tlaih hna pinah hriamnam tam ngai an laak khawhnak kong ABSDF hriamtlai phu nih an thanh.
Mawlu palik sakhan kah lioah Moehngin peng, Nyaungkai khua pawng ah umhmun a khuarmi SAC ralkap Ah-Mah-Tah 904 nih Honwitzer hriamngan he pehtlai in an kah pin ah vanlawng in kahdohnak an tuah ruang ah Mawlu khuapi chung um mi 10,000 hrawng cu a himnak hmun kawl in an zaam dih, tiah theih a si.
Cu kahdohnak ah cun ABSDF, KIA, KPDF, Pah-Kah-Phah, Pah-Ah-Phah le Pah-Lah-Ah palik ṭangṭi phu hna an i fonh i ṭangṭi phu in PDF ralkap pahnih nunnak a liam pinah pakhat hliam a pu ve. SAC ralkap hna cu a caan um liote ah hriamnam chia in mipi sin ah i fonh ding in ABSDF hriamtlai phu nih an thanhnak hna. Credit: The Chin Post