Shadaw Peng Ah Ngakchia 3, Naupawi Mi Nu 1 Telh In Tualchung Mi 7 Thattu SAC Ralhrang Pawl An Tlaih Hna
=========
Shan-Karenni ramri um Shadaw pengchung ah ngakchia 3 le naupawi lio mi nu 1 telh in tualchung mi 7 thattu hna SAC ralhrang pawl cu kan tlaih hna, tiah Karenni Nationalities Defence Force (KNDF) ralkap in Deputy Chief of Staff Maweai nih theihternak a tuah.
“Ralhrial mi chungkhar hna thattu SAC ralhrang pawl cu kan tlaih hna i nunnak liammi ngakchia hna muihmai hmanh an zoh ngam lo. Zeibantuk muisam keng mi ralhrang dah an si timi cu ka van langhter. An chungkhar pawl zong nih rak hmu ve hna seh, angki sen aa hruk mi hi SAC ralhrang a si i angki ṭial aa hruk mi khi SAC ralhrang bothum a si.
A tlaitu mizapi ralkap hna cu kan upat tuk hna. That hna uh tiin rak kan ti hlah uh! Nunnak liammi ngakchia hna nih an taantaak mi an nu le pa hna caah kawl/hawl an hau. Mah ralhrang pawl hi thih sawhsawh an ngah lo i an pathian simi Min Aung Hlaing zong kalpi a hau” tiah KNDF ralkap in Deputy Chief of Staff Maweai nih Social Network ah a ṭial.
2024, February 4 ah dum/lo chung ah a riak mi ralhrial chungkhar 3 hna cu SAC ralhrang thazaang 60 leng nih an tlaih hna i ralphaw ah an hman hna hnu February 5 ah ngakhia 3 le naupawi lio mi nu 1 telh in an dihlak minung 7 hna cu atu bantuk in an thah hna hi a si.
Shadaw khuapi cu February 12 ah Karenni National People’s Liberation Front (KNPL), Karenni Army (KA) le Karenni Nationalities Defence Force (KNDF) hna nih an kahdoh i tlamtlingte in an laak khawh pinah SAC ralhrang sin in meithal zuun 150 leng le SAC ralhrang 40 reng lo zong an tlaih hna, tiah theih a si.Crd: Lungmili Post