Tamu Peng Ah Mipi Ralkap Nih Pyusawhti Ralhrang 4 An Tlaih Hna!
=========
Sagaing ramṭhen, Tamu peng, ThanTaPyin ထန်းတပင် khua ah a ummi Pyusawhti ralhrang cu mipi ralkap Tamu PDF battalion 4 le ṭangṭi phufonh nih luhhnawh in an kah hna i, Pyusawhti ralhrang 5 an tlaih hna, culak ah 1 cu ralthuam he a zaam caah an kah thah, tiah theih a si.
November 21, zaanlei suimilam 1:30 tluk khan Tamu PDF nih Pyusawhti ralhrang thazaang 50 tluk umnak sakhan cu luhhnawh in an va kah ralhrang 2 an thi, tiah Tamu PDF battalion 4 chungin ṭuanvo ngeitu pakhat nih a chim. Kahdohnak hmun in, hliamhma zeihmenh tuar lo in a rak kir mi mipi ralkap cu tualchung mipi nih lunglawm tein an rak don hna tiah theih a si.
Tamu Pengkomh, Thanan Khua SAC Sakhan 2 Cu Tualchung Hriamtlai Ṭangṭi Phu Hna Nih An Laak. Sagaing ramṭhen, Tamu pengkomh, Tha-nan khua um SAC ralhrang sakhan 2 cu tualchung hriamtlai ṭangṭi phu hna le Kuki National Army(KNA) phu fonh nih November 22 ah luhhnawh in an kahdoh i an laak khawh, tiah tualchung mi pakhat nih a chim.
“Zing suimilam 8:00 tluk in Tha-nan khua um SAC ralhrang sakhan cu kahdoh hram an thok i zanlei suimilam 5:00 tluk ah Thanan khua um Shanni hriamtlai phu (SNA) le Kathe hriamtlai phu hna nih umhmun an khuarnak sakhan zong an laak khawh” tiah anmah he naihniam in a ummi pakhat nih Zalen ah a chim.
Kahdohnak ah Kathe hriamtlai phu chung in pakhat a thih i, 5 nih hliam faak an tuar ti ah Manipur ramkulh, Imphal thawngzamhnak nihcun a chim nain kahdohnak hmun ah a thimi kong cu theih fiang a si rih lo. “Atu bantuk in kahdohnak a chuah caah tualchung mi hna cu an ngeihmi thilri le inn chuahtaak in ral an hrial hna” tiah ralhial mi pakhat nih a chim ve. Thanan khua hi Tamu khuapi in meng 30 hrawng aa hlatnak hmun ah a ummi a si i Shanni hriamtlai phu (SNA) le Manipur, Kathe hriamtlai phu hna an cawlcanghnak hmunram pakhat a si, tiah theih a si.
Shwebo Peng, SAC Ralhrang Rallamsialmi Mipi Ralkap Nih Bomb An Puahhnawh Hna 3 An Thi, 5 Hliam An Tuar. Sagaing ramṭhen, Shwebo peng ah SAC ralhrang rallamsialin a rak chuak micu mipi ralkap nih bomb an puahhnawh hna caah ralhrang 3 an thi, tiah Sain Nain စိုင်နိုင် peng (Siddhisin) PDF Pah Kah Phah chungin ṭuanvo ngeitu pakhat Siddhi သိဒ္ဓိ nih Yangon Khit Thit Media ah a chim.
November 22, zaanlei suimilam 12:5 tluk khan Shwebo khuapi SAC ralhrang training No. 8 hmunhma in motor 4 nih a rak phurh mi hna ralhrang thazaang 100 tluk cu Shwebo thlanglei hmunram ah rallamsial dingin a chiahtaak hna tiah theih a si.
Rallamsialmi SAC ralhrang cu Shwebo peng, Bonebweit ဘုန်းဘွဲ့ khua pawng an phak ah, mipi ralkap nih bomb puahhnawh in an rak kah hna caah ralhrang 3 an thi, 5 nih hliam an tuar, tiah theih a si. Bomb puahhnawh naak hmun ah a thimi ralhrang 3 hna ruak cu SAC ralhrang nih motor in an phurh hna i, Shwebo khuapi pawng ah an vui colh hna. Mi dang hliamtuar 5 zong SAC ralhrang training No.8 hmunhma pawng sii-inn ah an chiah hna tiah theih a si.
Kalay Khuapi Ah Tualchungmi 2 Konglam Theih Loin An Tlau. Sagaing ramṭhen, Kalay peng Taungphila ah a ummi Thang Keuh le Joseph Lian cu konglam theih loin an tlau tiah theih a si. November 21, zaanlei khan an chuak i tuni tiang an konglam theih a si rih lo November 21, ni cu Varpui le Thanglui hmunhma an i kah caah Tahan bazar zong khar a rak si tualchungmi 4 nunnak tiang a rak liam. Mipi nih mitlau Thang Keuh le Joseph Lian a hmumi nan um sual si ahcun a tanglei pehtlaihnak number ah hin theihternak tuah khawh cio i zuam hna u sih.
Ralkap Mai-Jet Sakhaan TNLA Nih An Lak. Lashio peng, Mai-yaw hmunhma, Mai-jet khua pawng ah a um mi ralkap Mai-jet sakhaan cu TNLA nih an lak tiah thawng an thanh. November 23 zaanṭim ah sakhaan an lak khawh hi a si Operation 1027 min in TNLA nih October 27 thawk in an rak kah cang ve mi sakhaan a si.
Mai-jet sakhaan kahdohnak lio ah ralkap lei nih vanlawng in kahdoh an bawmh hna leng ah pehzulh in kahdohnak a fah caah kaphnih lei a thi mi an um. Ralkap lei nih bawmhnak an tlhak mi hriam kuang zong TNLA nih an lak khawh tiah theih a si.
Lashio peng, Mai-jet sakhaan leng ah, Ṭing-ṭan sakhaan zong Operation 1027 an thawk bak in TNLA nih an kah i cu sakhaan zong cu October 28 ah an lak khawh ve. November 28 zaanṭim ah kahdoh a fahnak Muse peng, Se-lan khua ah ralkap nih vanlawng in kahdohnak a tuah bantuk in Namhkham peng, Tayakone sang zong ah hriamngan a tla tiah TNLA nih an thanh.