Shan Ramkulh, Mondon Khuapi Um SAC Ralkap Sakhan Ah TNLA Nih Hriamnam Tam Ngai An Laak
==========
Shan ramkulh, Mandon khuapi chung um, Khah-Lah-Yah 130 ralkap sakhan cu TNLA nih an laak hnu ah hmunram thianhfelnak an tuah i hriamnam tam ngai an laaknak kong TNLA nih an thanh.
Mandon khuapi chung SAC ralkap sakhan cu Ta’ang ralkap TNLA nih a luancia December 22 ni ah an rak laak. Cu sakhan kahdohnak ah cun Honwitzer hriamngan telh in hriamnam dang tam ngai zong an rak laak. Cun, nizan December 25 ni ah sakhan an laakmi thianhfelnak an tuahnak ah hriamnam dang tam ngai an laak ṭhan, tiah theih a si.
Nizan December 25, zinglei suimilam 11:05 hrawng ah Namatu khuapi chung um SAC ralkap le Ta’ang ralkap TNLA kar kahdohnak a chuak ṭhan i SAC lei nih Namatu khuachung le a kiangkap ah Y12 raltuknak vanlawng hmang in bomb lung 28 an thlak ruang ah tualchung mi pahnih nunnak a liam. Cu pin ah Namatu hrambunh ralkap Battalion 324 nih hriamngan voi 19 an kah ruang ah Narlin khua inn pakhat a kaang i tangka kyats sing 20 zong a kaang chih, tiah theih a si.
Khampat Khuapi Cu PDF Le Ṭangṭi Phu Nih An Laak Ṭhan I Ralhrial Hna Zong An Kir Cang.Sagaing ramṭhen, Tamu peng Khampat khuapi cu SAC ralkap nih December 5 thawk in an rak fuh i tualchung mi hna cu ralhrial in an rak zaam dih. SAC ralkap pawl cu PDF nih faak ngai in an kah ve hna caah hnu an kir ṭhan i PDF le ṭangṭi phu nih Khampat khuapi cu an laak khawh ṭhan cang hnu ah ralhrial in a zaammi hna zong an kir cang, tiah theih a si.
PDF le ṭangṭi phu nih Khampat khuapi an laak khawh ṭhannak, tualchung mi ral a hrialmi hna zong December 20 thawk in khuachung ah an kir cangnak le SAC ralkap nih vanlawng in kahdohnak an tuahmi kong ah innlo a rawkmi a tamnak kong cu Chin hriamtlai Salai Van Kio nih Ayeyarwaddy Times ah a chim.
Khampat khuapi la ṭhan dingin rallam a sialmi SAC ralkap pawl cu PDF le ṭangṭi phu nih faak ngai in an kah hna caah December 16 ah SAC ralkap pawl cu hnu an kir. PDF le ṭangṭi phu nih hmunhma thianhhlimnak an tuah lioah ralkap ruak 10 hrawng zong an char, tiah theih a si.
Khampat khuapi cu November 7 ah KIA, PDF Tamu pengkomh Battalion 2, military region 2, No. 1 Battalion, CNDF, TDA, RKDF le KNA-Burma hna i bawm in an rak laak hnuah SAC ralkap 200 leng nih Khampat khuapi cu an fuh ṭhan nain an laa kho lo.Credit : The Chin post