Shwego hrambunh SAC IB 602 le LIB 56 Sakhaan 2 KIA Nih An Lak, Hriam Tampi Zong An Lak Khawh!
===========
Kachin ram, Shwego peng hrambunh SAC IB 602 le LIB 56 sakhaan 2 cu KIA nih an kah i sakhaan an lak khawh leng ah hriam tampi zong an lak khawh tiah KIA thawngzamh lei sin in thawng theih a si. October 18 zinglei sml 6:00am hrawng ah SAC IB 602 le LIB 56 sakhaan 2 cu KIA Battalion 17 nih an kah i sakhaan an lak khawh. Kahdohnak chung ah a thi mi ralkap an tam bantuk in a zaam mi zong an tampi tiah theih a si.
“Shwego hmunhma ah SAC IB 602 le le LIB 56 sakhaan 2 cu KIA nih an lak. Hriam tampi zong an lak khawh. Ralkap a thi mi an tam. A zat a fiang in theih a si rih lo. Cheukhat cu thi lo nung lo in an zaam” tiah KIA lei thawng petu nih Khit Thit ah a chim.
Ayadaw Ah PDF Sakhaan Pakhat An Luhhnawh Hna I Company Commander Telh In 3 An Thah Hna. Sagaing ramṭhen, Ayadaw peng PDF sakhaan pakhat cu October 16 ah SAC ralkap pawl nih an luhhnawh hna caah kahdohnak a chuak i PDF chungtel 3 an thah hna tiah Ayadaw peng PDF phu sin in thawng theih a si.
Thah a tong mi hna hi Ayadaw peng le Monywa peng ranri ah hmunhma a khuar mi Monywa pengkomh B27, C04 in Company Commander telh in nu 1 le pakhat an si tiah theih a si. October 16 zinglei ah SAC ralkap 70 leng nih an rak luh hnawh hna caah kahdohnak a chuak i atu bantuk in PDF chungtel 3 an nunnak a liam hi a si. Sakhaan i minung umnak buk 2 zong an khangh i hriam pawl zong an kalpi tiah theih a si.
Nattalin Ah SAC Ralkap Pawl Bomrap An Puah Hnawh Hna I 6 An Thi. Bago ramṭhen, Nattalin peng ah SAC ralkap pawl bomrap an puah hnawh hna i Sniper in an kah chap hna caah 6 an thi tiah Phonex D F nih thawng an thanh.
October 17 zinglei sml 8:22am hrawng ah Nattalin peng, Thapaybin in a rak chuak mi SAC ralkap 40 hrawng cu bomrap an puah hnawh hna i 2 an thi, tampi an i hliam. SAC ralkap pawl nih a pawngkam ah um mi minung pawl kha khamnak hmang in bomrap kual cu an rak lonh tiah theih a si.
Bomrap kual an rak lonh hnu chun sml 12:00pm hrawng ah, Nyeinlaybo-te kone an phak ah PDF pawl nih Sniper in an kah hna caah SAC ralkap 1 a thi. Cu SAC ralkap pawl Sangyi khua an phak ah bomrap an puah hnawh ṭhan hna i SAC ralkap 3 an thi chap, tampi hliam an tuar tiah Phoenex D F thawngthanhnak in theih a si.
Khin U Khuachung Ah SAC Ralkap Pawl PDF Nih An Kah Hna, 3 An Thi I Meithal Zuun 2 An Lak Khawh. Sagaing ramṭhen, Khin U khuachung ah SAC ralkap pawl cu PDF nih an kah hna i ralkap 3 an thi MA-1 zuun 2 an lak khawh tiah Khin U PDO nih an thanh.
October 17 zinglei ah Khin U PDO nih ralkap pawl an kah hna, meithal zuun 2 an lak khawh, Khin U khuachung Min-taih inn ah hmunhma a khuar mi SAC ralkap 3 cu Khin U-Ye U lam lei an rak chuah lio ah PDO pawl nih lam-orh in an rak kah hna hi a si i a hmun ah ralkap 2 an thi i aa hliam mi pawl an zaam i cu chung ah pakhat cu sizung ah a thi tiah theih a si. Khin U khuachung ah kahdohnak an tuah dih hnu in dothlennak phu pawl him tein an kir ṭhan kho, SAC ralkap nih hriam an thlah thlorh ruang ah mipi cheukhat an thi tiah theih a si.
KNU Brigades 5 Hmunhma, October Thlacheu Chung Kahdohnak Ah SAC Ralkap 13 An Thi. Karen ram, KNU Brigade 5 hmunhma, October thlacheu chung kahdohnak ah SAC ralkap lei 13 an thi tiah KNU Mutraw News nih thawng a thanh. October 1 in October 15 tiang KNLA Brigade 5 le SAC ralkap pawl karlak ah kahdohnak voi 38 a chuak i cu chung ah SAC ralkap lei 13 an thi i 29 an i hliam. KNU Brigade 5 lei in ralkap 1 aa hliam ve tiah theih a si.
October 15 tiang ah SAC ralkap nih 120MM, 122 MM lung 10 bak te Hpapun khua No. 3 sang ah an kah, October 5 ah SAC ralkap nih Bawleday khua ah Cluster Bomb lung 2 a rak thlak nain mipi pawl hliam a tuar mi an um lo tiah theih a si.