Rakhine Ramkulh Ramree Kahdohnak Ah SAC Ralkap 60 Leng An Thi.Rakhine ramkulh, Ramree ah Helicopter 4 in kahdoh bawm ding in an chiah mi SAC ralkap 120 hrawng cu Rakhine ralkap AA nih an kah hna i minung 60 leng an thih pin ah hriamnam tam ngai an laaknak kong AA nih an thanh.
February 24 ni ah Helicopter 4 in kahdoh bawm ding in a kal mi Ayeyarwady ramṭhen Kyonpyaw khuapi hrambunh Khah-Lah-Yah 36 le Ann khuapi hrambunh Khah-Mah-Yah 373 in ralkap thazaang 120 hrawng cu Rakhine ralkap AA nih an kah hna i minung 60 leng an thi, a taang mi SAC ralkap pawl zong pehzulh in an kah hna, tiah theih a si.
Cu kahdohnak ah cun SAC ralkap nih chun nitlak ti tluk in vanlawng in kahdohnak an tuah nain AA nih hriamnam tam ngai an laak khawh ṭhiam kong an thanh.
Rak Rel Chih: HBA Nih Reverend Ordination 6, Pension 1 Le Kum 25 Cung Pastor Rian Ṭuan Mi Upat Peknak An Tuah.
Hakha Baptist Association(HBA) nih reverend ordination, pension le pastor peknak an tuah pinah kum 25 pastor rian a ṭuan mi upat peknak an tuah, tiah theih a si.
A voi 22nak HBA Triennial General Meeting le Peng Pumhpi ah reverend ordination peknak an tuah i ordination an pek mi hna hi Pastor Van Sui Hnin(HBC), Pastor Par Hluan(BABC), Pastor Thla Zing(TBC), Pastor Biak Hlei Sang(NBC), Pastor Hrang Awi(ZABC) le Pastor Sang Tin Uk(GBC) hna an si, tiah HBA he naihniam in a um mi pakhat nih The Chin Post ah a chim.
Cu pin ah HBA nih Saya Ceu Ṭha Awi(TBC) zong pastor an pek i Rev. Dr. Stephen Lian Hup Ling(HBC) zong pension an pek, tiah a chim chap.Atutan a voi 22nak HBA Triennial General Meeting le Peng Pumhpi ah kum 30 Pathian rian a ṭuan mi Rev. Ceu Nawl(MABC) zong upat peknak an tuah.
Kum 25 Pathian rian a ṭuan mi Rev. Tluang Hre Hmung, Pastor Dawt Chin, Pastor Par Hluan, Rev. Chan Peng Hmung, Rev. Ni Tin Par, Pastor Gracy, Rev. Khua Er, Rev. William Khen Chum Bik le Rev. Dr. Than Ṭhio zong upat peknak an ngeih hna.
A voi 22nak HBA Triennial General Meeting Le Peng Pumhpi cu Agape Baptist Church ah an tuah i tlamtling tein an lim pin ah Agape Baptist Church kum 10 tlin ‘Tin Jubilee’ zong sunglawi ngai in an hmang, tiah theih a si.Credit : The Chin Post