SAC Ralkap Le Pyituhsit Tam Ngai Nih MNDAA Sin Ah An Hriamnam An Chiah!
=========
Shan ramkulh chaklei, Laukkai khuapi chung ah Kokang ralkap MNDAA pawl lut in ralkap sakhan an laak hnu in SAC ralkap le Pyituhsit tam ngai nih an hriamnam an chiah, tiah China-Myanmar ramri um ṭuanvo ngeitu sin in theih a si.
“Laukkai khuapi hngaktu ralkap pawl le Pyituhsit dihlak nih an hriamnam an chiah. Kokang Pyituhsit an zate ti tluk nih an hriamnam an chiah ve. Kahdoh bawm ding in a rami Division 55 ralkap pawl zong nih an hriamnam an chiah ve fawn.
Laukkai khuapi le a kiangkap cu MNDAA nih an uk dih ngawt cang i Dah-Kah-Sah lawng a taang cang,” tiah China-Myanmar ramri um ṭuanvo ngeitu nih an chim. Laukkai khuapi chung kahdohnak ah SAC ralkap hmanmi hriamngan ruang ah tualchung mi 8 an thi i minung 25 hliam an pu ve, tiah MNDAA nih nizan December 26 ni ah an thanh.
Nat Than Kwin Khuapi SAC Ralkap Sakhan 3 KNLA Hruainak In Tualchung Hriamtlai Phu Nih An Laak. Bago ramṭhen, Kyaukgyi peng, Nat Than Kwin khuapi chung SAC ralkap sakhan 3 cu KNLA hruainak in tualchung hriamtlai nih an laak. Cu sakhan kahdohnak ah cun ralkap 20 an thi i hriamnam phun 19 an laak khawh, tiah KNU Headquater nih an thanh.
Nat Than Kwin khuapi chung SAC sakhan 3 kahdohnak ah cun ralkap 20 an thih pin ah hriamnam phun 19 le hriamnam dang zeimawzat cu KNLA hruainak in tualchung hriamtlai ṭangṭi phu hna nih cun an laak. Cu kaphnih kar i kahdohnak ah cun tualchung hriamtlai phu lei in nunnak liammi le hliamtuar zong an um ve, tiah theih a si. KNLA le tualchung hriamtlai phu nih, cu ralkap sakhan 3 an laak hnu ah kaphnih kar kahdohnak a fak i SAC ralkap nih vanlawng hmang in kahdohnak zong an tuah, tiah theih a si.
Mrauk-U Pengkomh Palik Sakhan AA Nih An Laak. Rakhine ramkulh, Mrauk-U pengkomh palik sakhan cu nizan December 27, zan suimilam 9:00 hrawng ah AA nih an laak i Chinram chung Paletwa peng Khawe (ခဝဲ) Byuha sakhan laak ṭhan ding in timhlamhnak an ngeihnak kong cu Rakhine ralkap AA nih an thanh.
Mrauk-U khuapi SAC ralkap sakhan vialte cu December 24 zinglei thawk in AA nih an kah i nizan December 26, zan ah pengkomh palik sakhan an laak khawhnak kong le Chinram chung Paletwa peng Khawe (ခဝဲ) Byuha sakhan laak ṭhan an i timhnak kong cu chaklei hriamtlai phu unau thum nih nihin December 27, zinglei ah an thanh ve.
Mrauk-U khuapi kahdohnak ah cun SAC ralkap nih khuachung ah hriamngan an kah ruang ah ngakchia telh in tualchung mi 22 tluk an nunnak a liam i 16 hrawng hliam an pu, tiah chaklei hriamtlai phu unau thum nih cun an thanh.
Mrauk-U khuapi cu Rakhine miphun hna nih an sunhlawih i an pupa ro pakhat bantuk i an ruahmi a si bantukin SAC ralkap nih an hrawh khawh ti lo nakhnga a lamkip in kan cawlcang lai i dohthlennak a tuahtu phu kip i fonh in kan dohṭi lai, tiah NUG Ministry of Defense nih December 26 ah an rak thanh ve.
PDF Nih Mandalay Palace Chung An Rak Kah Lioah SAC Ralbawi Brigadier General Pa Nupi A Thi. Mandalay khuapi, Mandalay Palace chung cu PDF nih hriamngan 107mm lung 6 in an rak kah i Central Command uktu Brigadier General Kyi Khine i a nupi cu a lau tuk caah lungzawtnak in a rak thi, tiah Central Command chung ummi hna nih an chim. December 21 zinglei suimilam 2:30 ah Mandalay Palace chung um Central Command Headquater pi cu PDF hriamtlai ṭangṭi phu nih hriamnagn 107mm in an rak kah.
Central Command uktu pa ralbawi Kyi Khine nupi hi lungzawtnak a ngei mi a si, tiah an chim. PDF ṭangṭi phu nih hriamngan an hmanmi hi thazaang a ṭhawng ngaimi a si i, hmuitinh zong tlamtling tein a khen caah a puah ning zong a fak ngai lai, tiah zumh a si.
Kalaymyo Ah SAC Ralkap Meithal Kahnak In Tualchung Mi Pakhat Thi, Minung Pahnih Hliam An Pu. Sagaing ramṭhen, Kalaymyo khuachung siizungpi pawng ah nihin December 27, zinglei suimilam 9:00 hrawng ah SAC ralkap nih sualnak ngei lo tualchung mi meithal in an kah hna ruang ah pa pakhat a thi i kum 6 nu ngakchia le nu pakhat nih hliam an tuar, tiah theih a si.
“Nihin zinglei sumilam 9:00 hrawng ah a si men lai, SAC ralkap pawl nih Kalaymyo siizungpi pawng ah chekhlatnak an tuah lioah pa pakhat cu a motorcycle dirter ding in an fial nain a duh lo ruang ah an kah i a hmun ah a thi colh. A pawng i motorcycle he a kal ve mi nufa hna zong fak ngaiin an i hliam i ralkap pawl nih an fimhlawm hna. A thimi pa ruak tu cu zeitindah an tuah kan hngal lo,” tiah Kalaymyo khuasa tualchung mi pakhat nih The Chin Post ah a chim.
“Kalaymyo khuachung cu a hlan nakin a zual chin lengmang i a him lo ngaingai, SAC ralkap pawl nih hramhram in tualchung mi thil an chuh hna chel, inn boh in mi thil an fir chel, sualnak ngei lo tualchung mi hramhram in tlaihkhih le thahnawn tiang an tuah tawn ruang ah um ngam hmanh a si tuk ti lo. Zan tlai hnu zong ah khual cazin check tibantuk zong an tuah tawn” tiah Kalaymyo khuasa tualchung mi pakhat nih cun a chim.