Paletwa Peng Vialte Cu AA Nih A Lakdih Mi Dirhmun Ah A Phan. “Paletwa khuapi an lak ahcun Kyauktaw le cunglei vialte, India ramri tiang SAC ralkap an um ti lo”.
Chin ramkulh, Paletwa peng chung um SAC ralkap sakhan le byuha kung vialte cu Arakan Army AA nih pakhat hnu pakhat in a lak thluahmah cang le nihin ah Paletwa peng vialte cu AA laknak tang ah a um ko cang tiah Rakhine lei thawngzamhnak in theih a si.
Paletwa-Kyauktaw ramri– Miwa SAC byuha sakhan cu AA nih nizaan ah a lak. Miwa a lak dih hnu cun mah lei kalnak lampi vialte cu SAC umlonak hmun a si cang. Paletwa ram vialte cu SAC umlonak hmun ah a si cang ko ti khawh a si.
Naite ah tinma a lak. A tu miwa a lak chap. A hlan ah SAC sakhan hme tete an i fonh dih. Miwa le Tinma ah an i fonh sakhan an lak cang caah Kyauktaw peng cunglei SAC an um ti lo. Paletwa hnu lei an lak dih hnu ah a tang SAC sakhan cheukhat cu pehzulh in kan doh hna lai AA nih ralrinnak a pek hnu ah Miwa sakhan telh in Paletwa ram SAC Byuha kung 2 cu nizaan ah an lak khawh cang.
Paletwa ni chuahlei um mi SAC sakhan tlawmte lawng a tang mi cu nihin ah kan lak cang tiah AA nih thawngthanhnak a tuah.Paletwa cu SAC umlonak hmun a si ko cang tiah cheukhat nih an chim. Cheukhat nih mi tlawnte lawng an tang rih tiah an chim. Paletwa khua an lak khawh ahcun Kyauktaw le cunglei India ramri kam vialte cu SAC um lonak hmun an si dih cang ko tiah People’s Spring nih a langhter.
Thawngpang Dang Rak Rel Chih ! Laukkaing ROC In Hriamnamchiahtak In A Sung Pek Mi Brigadier Colonel 6 He Pehtlai In Colonel 6 Tlaihchap An Si.Chaklei Shan ram, Laukkaing peng ah MNDAA sin ah hriamchiahtak in a sungpek mi Laukkaing Regional Operation Command in Brigadier colonel 6 kong he pehtlai in Colonel 6 zong SAC nih an tlaih chap hna tiah theih a si.
SAC Ralhrang nih MNDAA sin ah hriamchiahtak in a sungpek mi Laukkaing uktu bawi President ah Brigadier Colonel Tun Tun Myint, Laukkaing ROC Commander Brigadier Colonel Moe Kyaw Tu, LIB 55 Commander Brigadier Colonel Zaw Myo Win, MOC 16 Commander Brigadier Colonel Taw Zin U, MOC Commander 12 Brigadier Colonel Aung Zaw Lin, MOC 14 Commander Brigadier Colonel Aye Min U hna cu cunglei rianpek mi nawl zulh lo ruang le dohkalhnak le a zizut ding timhtuah lio ah Colonel rank ralbawi 6 zong tlaih chap an si tiah theih a si.
“Tlaih mi hna lak ah Deputy Commander ROC Colonel, Byuhahmu 5 zong tlaih an si ṭhan. Brigadier Colonel 6 le Colonel rawlbawi 6 he tiah an dihlak ralbawi 12 cu ralkap biaceih zung ah an kong chuahpi an si lai. January 13 ah North Eastern Deputy Commander Brigadier Colonel Kyaw Kyaw Tun nih Chairman le hruaitu ṭuan in a rannak in an kong ceih zok in a zizut ding in cunglei bawi hna nih nawl an pek” tiah Khei Thit media sin in theih a si.
Cun, Laukkai chuahtak in Lashio a phan mi ralkap bawino le ralkap chungkhar pawl cu battalion chung ah khumh in zoh peng ding, hriamnam pek lo ding, aleng chuahnak nawl pek lo ding in cunglei bawi nih nawl an chuah, cheukhat ralkap le bawino hna cu hriamnam he an tlau mi pawl zong an kawl cuahmah hna tiah theih a si.
AA lei nih cun Paletwa, Rakhine ramkulh Kyauktaw, Mouk–U, Poahtaw, Yangpye, Kyaukphyu, Butitaung khua um SAC ralkap cu an kah cuahmah hna lio a si. SAC lei nih cun ramchung mipi kah le tlaihnak a tuah hna tiah theih a si.Credit : The Chin Post