New Mon State Party (NMSP) Le NUG Cu Ṭangṭi Ding In Hnatlaknak An Ngei.New Mon State Party (NMSP) le National Unity Government (NUG) cu ṭangṭi in hmunkhat ah rianṭuanṭi ding in kaphnih kar hnatlaknak an ngeihnak kong NUG in ṭuanvo ngei nih an chim.
A fekfuan mi i pehtlaihnak he ṭangṭi in ramkhel, kahdohnak le a dang dang kong ah hmunkhat ah rianṭuanṭi ding in nizan February 22 ah Online in an i ceihmai hnu ah kaphnih kar hnatlaknak an ngeihnak cu NUG nih an chim.
New Mon State Party (NMSP) lei zong nih SAC ralkap nawlngeihnak le uknak ṭha lo a hram bongh ding le Federal Democracy ramkomh ser ding ah NUG he hnatlaknak an ngeih kong an thanh ve.
Online in biaruahnak le i ceihmainak ah cun
New Mon State Party (NMSP) hruaitu Naing Zeya, Naing Banya Le, Layih Kaung le Naing Banya Mon an i tel i, NUG lei in Daw Zin Ma Aung le U Naing Htoo Aung hna an i tel.
New Mon State Party (NMSP) nih cun SAC he tonbiaruahnak ngei ti lo in dohthleng phu hna he ṭangṭi in hramhram in nawlngeihnak a latu SAC ralkap kan kahdoh ve cang hna lai, tiah a luancia February 14 ni ah an rak thanh.
New Mon State Party (NMSP) cu ram pumpi kahdaihnak hnatlaknak (NCA) a cohlang mi a rak si bantukin ramkhel buainak cu ramkhel phunglam in tawlrel si seh tiah SAC he voi thum tiang tonbiaruahnak an ngei nain an i tinh ning bantukin thil a can lonak kong NMSP nih an thanh mi ah an langhter.
“Atu bantukin kan i tinh ning in thil a can lo tik ah kan duh mi a phichuak kan hmuh khawh lo caah SAC ralkap uknak ṭha lo a hram bongh hnu lawng ah kan i tinh mi kan phan kho lai,” tiah NMSP hruaitu Naing Banya Le nih RFA ah a chim.
Kalaymyo Kiangkap Thawngpang
Kalaymyo le a kiangkap hrawng kahdohnak ruangah ah Kanthayar khua mi hna cu ralhrial in an zaam hna i kahdohnak ah SAC lei in ralkap pathum an thi, tiah Kanthayar khua mi nih an chim.
Kanthayar khua mi pakhat nih cun, “Kahdohnak ruangah kan khua mi cu kan zaam dih hna i a zaam mi hi a za in kan si lai, khua hngak cu pakhat hnih an um ve. A zaam mi pawl min cazin zong fiang in hngalh khawh a si rih lo,” tiah The Chin Post ah a chim.
“Kan zaamnak hi kan khua pawng ah a si i nihin February 23 zinglei in kan zaam dih hna. Kahdohnak ah SAC lei in ralkap lei in pathum an thi tiah a thi mi he naihniam in a um mi nih an chim,” tiah a chim chap.Kahdohnak kong he pehtlai in tualchung hriamtlai phu nih thawng fiang thanhnak an tuah mi a um rih lo.Credit : The Chin Post