MNDAA Nih SAC Ralkap Tank 2 An Hrawh Khawh
========
Operation 1027 chung, Chin-shwe-haw hmunhma ah MNDAA nih SAC ralkap Tank 2 an hrawh khawh tiah The Kokang Post nih a langhter. Operation 1027, Nihnih Chung Kahdohnak Ah SAC Sakhaan 30 Leng Kan Lak Tiah MNDAA Nih A Thanh.
Kokang ralkap-MNDAA le unau hawikom ralkap phu hna nih October 27 in an thawk mi Operation 1027 min in nihnih chung kahdohnak ah SAC sakhaan 30 leng an lak khawh tiah MNDAA biachimnak nawl ngeitu Lykharwin nih October 28 ah a chim.
Unau hawikom phu hna nih Chin-shwe-haw, Ho-pan, Kuan-lung, Mone-koe, Lashio, Thein-di, Nant-kyuan, peng telh in chaklei Shan ram um SAC sakhaan hmun tampi ah kahdohnak tuah in sakhaan laknak tiang an tuah khawh.
October 28 ni ah mipi ralkap PDF cheukhat bu he bawm in kahdohnak an tuah ṭhan. PDF-Mandalay le Ta’ang TNLA ralkap bawm in Naungcho peng um SAC sakhaan pakhat an doh lio a si. Nitlak Tanlwin tiva pawngkam um SAC sakhaan pathum an lak chap khawh tiah MNDAA lei nih an chim chap.
Cun Ho Pan khua Kuan-Lung le Chin–shwe-haw lam cung ah a um mi SAC ralkap pawl cu MNDAA lei nih an kah hna i SAC ralkap 10 nak tlawm lo an thi, hriamnam, kuan/zen tampi an lak khawh. Nihnih chung kahdohnak ah ralhrang lei sakhaan 30 leng an lak tiah October 28 zaanlei 2:40pm ah MNDAA lei in LyKyarwin nih a chim. SAC lei nih vanlawng kahnak, Hriamngam kahnak le rocket bomb kahnak a tuah ko nain unau hawikom lei nih SAC sakhaan pakhat hnu pakhat in an lak khawh tiah People Spring news nih a ṭial.
Letphettaungywar Tower Tung Hngak SAC Sakhaan Kahdohnak Ah Ralbawi Telh In 22 An Tli/Zaam Dih Caah Fawi Tuk In Sakhan An Lak Khawh. Naypitaw Council uknak tang ah a um mi, Pyinmana peng, Pyithaungku khuakomh, Letphettaung khua ah hmunhma a khuar mi SAC ralkap pawl kahdohnak ah meithal thawng an theih bak in ralkap pawl an zaam dih caah SAC ralkap lei a thi mi um lo in sakhaan fawi tein an lak khawhnak kong cu Kyartanlung operation- Chalei Tantaung special mipi ralkap nih Yangon Khit Thit ah an chim.
October 23 zinglei ah Pyinmana peng, Letphettaung khua, Tower tung ah hmunhma a khuar mi SAC ralkap sakhaan cu Kyartalung operation le PDF bu hna nih an va kah hna. Meithal thawng an theih bak in sakhaan um SAC ralbawi telh in ralkap 22, sakhaan chung ralkap dihlak an zaam dih caah sakhaan fawi tuk in an lak khawh. A tli mi ralbawi pakhat zong SAC lei nih an tlaih khawh than tiah theih a si.
AA, TNLA, MNDAA Phu Pawl Nih SAC Ralkap Sakhaan Tampi An Lak, Hriam Tamlak Te Zong An Lak Khawh. Arakan Army (AA) telh in unau hawikom phu a si mi Myanmar National Democratic Alliance Army (MNDAA), Ta’ang National Liberation Army (TNLA) hna nih SAC ralkap sakhaan pawl an lak khawh i hriam tampi zong an lak khawh tiah The Kokang nih a langhter.
Operation 1027 min in Shan ram chaklei ah a um mi SAC ralkap sakhaan tampi cu AA, TNLA, MNDAA le dothlennak phu fonh pawl nih kahdohnak an tuah i an lak khawh. Hriam tampi zong an lak khawh tiah cathanh chung ah an langhter. October 17 zinglei sml 7:40am ah SAC kuttang Lung-htang Pyithusit sakhaan pakhat an lak khawh i October 17 zaanlei tiang ah SAC ralkap sakhaan tampi cu MNDAA unau hawikom phu nih an kah tiah an langhter.
The Kokang nih a thanh ning ah, Chin-shwe-haw hlei, Ho-pan hmunhma Chun-hup khua, Kuan-lung, Mone-koe le Lashio khua ah a um mi SAC ralkap sakhaan tampi cu an lak khawh i Mone-koe pengkomh Shi-gyi-kya tlang, Kokang pengkomh Shan-wan hmunhma Shauk-tin-pa khua, Kokang pengkomh Shi-shan hmunhma Kan-wan-htan khua le Khu-ma khua, Chin-shwe-haw hmunhma Nan-pha-shan tlang ah a um mi SAC ralkap sakhaan pawl zong ah pehzulh in kahdohnak an tuah khawh.
AA aa telnak unau hawikom phu nih SAC ralkap pawl kahdohnak an thawk in sml 5 hrawng a rauh hnu ah Chin-shwe-haw hlei, Ho-pan hmunhma Chun-hup khua, Kwan-lone, Mone-koe le Lashio khua ah a um mi sakhaan tampi an lak khawh. October 27 zinglei sml 4:00am ah, Shan ram, Lauk-kai peng, Chin-shwe-haw khua sakhaan lak kahdohnak ah SAC lei Battalion Commander a thi tiah Western News nih a langhter fawn.
Tutan Operation 1027 ah Burma People’s Liberation Army (BPLA) zong kahdohnak chung ah aa tel ve tiah theih a si. October 27 zinglei ah AA telh in unau hawikom phu nih SAC ralkap sakhaan pawl an kahnak ah SAC ralkap lei tamlak te an thi tiah theih a si.
https://fb.watch/nYRJJ9gfkJ/