Mindat Khuapi Chung Kahdohnak Ah SAC Ralbawi Pakhat A Thi
================
Chinram, Mindat khuapi chung ah CDF-Mindat le SAC ralkap karah January 1 ah kahdohnak a chuak i SAC ralbawi pakhat a thi, tiah theih a si.
SAC ralkap le CDF-Mindat cu Mindat khuapi Ashipin sang ah an i kap i, SAC ralkap lei in ralbawi Major pakhat cu sniper in an kah. Kahdohnak a daih in tualchung mi umnak inn pahnih cu SAC ralkap nih an khangh i hriamngan zong in an kah ruangah tualchung mi 3 hliamhma faak ngai an putnak kong cu CDF-Mindat nih an langhter.
SAC ralkap faak piin an doh khawh nakding ah Project Mindat 2024 Campaign ah mizapi i tel ve cio dingin CDF-Mindat nih sawmnak an tuah.
CDF-Mindat cu a luancia kum December thla lio zong ah Chinram le Magway ramṭhen um SAC ralkap sakhan laak kahdohnak ah an rak i tel i, anmah lei in ralkap 4 nih ram le miphun ca ah nunnak an rak pek ve.
Paletwa Peng Um Khamaungwa SAC Ralkap Sakhan AA Nih An Laak.Chinram, Paletwa peng chung um Khamaungwa SAC ralkap sakhan cu AA nih laak i, hriamnam a chia duh lomi sakhan zong tuzarh chung ah laak ding in an timhnak kong chaklei hriamtlai ṭangṭi phu thum nih January 2 ah an langhter.
Rakhine ramkulh Tinma khua pawng um Shetaung beohar kone sakhan cu AA nih an tuk i SAC ralkap Fighter pahnih nih faak ngai in kahdohnak an tuah ve.
Minpyia, Kyingtaung hrambunh Khah Mah Yah 380, 379 le 541 Battalion in SAC ralkap nih Minpyia khuapi ah hriamngan in voi 30 nak tlawm lo an kah i Pyidawthar sang ah hriamngan kuan lung 3 a tla i tualchung mi inn 3 le siangniamrun sianginn zong a rawk dih, tiah theih a si.
Cu pinah Kyaukdaw peng, Myotaung khua ah SAC ralkap nih Bomb voi thum an thlak ruangah kum 3 tluk ngakchia pakhat le kum 22 tluk siangngakchia pa pakhat zong an nunnak a liam i pa pakhat le nu pathum zong hliam an tuar, tiah theih a si.
Kokang hmunram chung zong ah hriamnam a chia duh lomi SAC ralkap pawl zong nih tualchung mi hna cu timh ciammam in an kah hna, tiah an langhter.
Chinland Defense Committee Dirh Dingin ICNCC Nih Thanh.Chinram, peng kip cio aiawhtu ramkhel hruaitu hna he Chinland Defense Committee dirh dingin le Chin mizapi hna ca ah thil ṭha tuah ding a ummi zong ral ṭha tein tuah ding kong Interim Chin National Consultative Council(ICNCC) nih January 1 ah an thanh.
ICNCC nih an langhter ning ah 2023 kum hi Chinram sersiamnak ca ah a har ngai kum a si ko nain mizapi nih ruahnak pek ningin rampi thlennak tampi an tuah khawh kum a sinak zong an langhter.
Chin mizapi nih an herhmi tuah ding, dohthlennak lamthluan ah hlawhtlinnak hmuh ding le mahte khuankan lairelnak a ummi Federal Democracy rampi ser khawh ding an i zuamnak kong zong an langhter.
Zei bantuk Council le zei bantuk organization zong nih ICNCC an hrawh khawh lonak kong le ICNCC a rianhma vialte pek an timh hna lonak zong an thanh.
CNC- Mindat/ CDF- Mindat, CNO/CNDF le ZFU/PDF-Zoland cu ramkhel le ral lei kong ah ṭangṭi phu si dingin December 30 ah hnatlaknak an rak ngei i cathanh zong an rak chuah.Credit : The Chin Post