Minbya Khuapi Kahdohnak Ah SAC Ralkap 60 Leng Arakan Army (AA) Sin Ah An I Ap.Rakhine ramkulh, Minbya khuapi kahdohnak ah SAC ralkap 60 leng cu nihin February 6 zinglei ah Rakhine ralkap AA sin ah an i ap i motor pathum in an kalpi hna, tiah Minbya khuapi tualchung mi hna nih an chim.
Minbya hrambunh SAC ralkap Khah-Mah-Yah 380 Battalion cu a luancia January 28 ni ah Rakhine ralkap AA nih an rak laak cang i Minbya ah a taang rih mi Khah-Mah-Yah 379 le Khah-Mah-Yah 541 sakhan cu AA nih pehzulh in an kah, tiah theih a si.SAC ralkap nih umhmun an khuarnak Minbya hrambunh 379 le 541 sakhan cu nihin February 6 zinglei ah AA nih an laak tiah thawngpang a leng nain fehternak a um rih lo.
SAC ralkap le AA kar kahdohnak a fah ruang ah Minbya khuapi le Mrauk-U khuapi ah nizan February 5 zinglei suimilam 9:30 hrawng in SAC ralkap nih raltuknak vanlawng Jet Fighter le Helicopter in voi 30 hrawng bomb an thlak, tiah tualchung mi nih an chim.
Rak Rel Chih Tha Tuk :SAC Nih Tuah Timh Mi Thimnak Ah Mipi I Tel Lo Ding In KIO Chairman Nih Ralrin Peknak Bia A Chim.SAC an nawlngeihnak pehzulh in a hmunh khawh nakhnga kum 2008 phunghrampi chirhchan in thimnak tuah an timh mi ah i tel lo ding in le miphun pakhat le pakhat kar buainak a chuahter khotu Pyituhsit cawlcanghnak ah mipi i tel lo ding in nizan February 5, Kachin dohthlennak kum 63 tlin camtuak an tuah mi biachimnak ah Kachin Independence Organisation (KIO) Chairman, General N’Ban La nih a chim.
SAC an sungh hnu zong ah phu khat le phu khat kar ah buainak a chuak kho mi a si caah SAC ralkap a dohtu phu khat le phu khat kar ah lung i khahnak le lung i hmuhthiamnak cu a herh ngaingai mi a si i, SAC ralkap nawlngeihnak a um ti lo hnu ah daihnak a chuah khawh ṭhan nakhnga ram mi dihlak nih ṭuanvo kan ngei cio, tiah General N’Ban La nih cun a chim.
Kachin Independence Organisation (KIO) zong SAC ralkap a dohtu phu vialte he tonbiaruahnak kan ngei i, hriamtlai in kahdohnak ah aa tel mi phu hna he a herh ning in tonbiaruahnak ngei kho peng ding in timhlamhnak kan ngei. Cu pin ah a sung cuahmah mi SAC ralkap nawlngeihnak a dongh sin in mipi humhimnak, zalong tein khuasaknak le phungning tein i ukhruainak hna cu papek in kan kalpi hna lai, tiah KIO Chairman nih cun forhfialnak a tuah.
Pau dohthlen caan chung ah tualchung hriamtlai phu le mipi lungrualnak, ṭanrualnak thawng in hramhram nawlngeihnak a dihdongh deng cang caah SAC hruaitu hna le SAC ralkap pawl zong an lung a zor ning cu zapi nih hmuh khawh a si ko, tiah General N’Ban La nih cun a chim chap.Credit : The Chin Post