Mandalay Palace Chung Um Mandalay Ramṭhen Uktu Le Uktu Chang Umnak Cu PDF Nih Hriamngan In An Kah
======
Mandalay khuapi, Aungmaytharsan peng, Mandalay Palace chung ah hram a bunhmi Central Command Headquarter cu nihin December 21 zinglei ah hriamngan in an kahnak kong PDF le Palace pawng ummi hna nih an chim.
Cu kahdohnak ah cun Brave Warriors For Myanmar (BWM) in ṭuanvo ngeitu pakhat nih, Mandalay Palace chung ah a ummi Central Command Headquarter uktu le a changtu umnak zong ṭha te i tinh in hriamngan 107mm lung 6 in an kahnak le lung 5 cu tlamtling tein a puahnak kong RFA ah a chim.
Kahdohnak ah a thimi le aa hliammi an um le um lo hngalh a si lo i Mandalay Palace kah hnu ah SAC ralkap pawl cu khuachung ah chekhlatnak an tuah, tiah theih a si.
Mandalay Palace kahdohnak ah Mandalay Security and Special Task Force (MDY-SSTF), Pyin Oo Lwin pengkomh Pah Kah Phah, No More Dictatorship NMD-PDF le Brave Warriors for Myanmar (BWM) hna i bawm in an kah, tiah theih a si.
December 20 zong ah Shwepyisoe operation min in Mandalay Palace, Obo thonginn laifang telh in Mandalay khuapi um palik sakhan cheukhat cu Mandalay PDF nih drone in an rak kah cang.
Vanlawng Kahdohnak Ruang Le Kaphnih In Kahdohnak Ruangah Khampat Khuapi Inn 50 Leng A Kaang.Sagaing ramṭhen, Tamu pengkomh Khampat khuachung ah December 20 hrawng in SAC ralkap nih vanlawng in kahdohnak an tuah ruang ah le SAC ralkap le PDF kar kahdohnak ruangah inn 50 leng a kaang, tiah theih a si.
Palik sakhan he naihniam in a ummi inn pawl a kaangmi an tam nain vanlawng kahdohnak ruangah a kaangmi a tam deuh kong Khampat khuami pakhat nih a chim.
Khampat khua cu a luanci November 7 thawk in PDF nih an rak laak i thla khat leng a rauh hnu December 7 thawk in laak ṭhan ding ah Kalay hrambunh SAC ralkap le Mawleik hrambunh SAC ralkap pawl nih an rak panh ṭhan i PDF he kahdohnak a zual.
Khampat khuapi la ṭhan ding in SAC nih cunglei le tanglei he kahdohnak an tuah nain PDF nih faak ngai in an kah hna i an kham ve hna caah December 16 ah SAC ralkap pawl cu hnu an kir ṭhan, tiah tualchung mi hna sinin theih a si.
Khampat khua chung kahdohnak ruangah ralhrial in a zaammi hna cu December 20 thawk in khuachung an panh ṭhan i No. 1 le 2 sang ah a ummi hna cu an inn an panh ngam rih lo, tiah theih a si.Credit : The Chin Post