KNU Brigade 5 Hmunhma Chung Ah Ralkap Nih Kum 27 Chung Hmunhma An Khuarnak An Lak.NU Brigade 5 hmunhma chung, Nyaunglaybin ah SAC ralkap nih kum 27 chung hmunhma an khuarnak Mawphu sakhaan cu KNLA hruainak in FFD Drone phu nih February 24 ah an lak khawh tiah FFD nih thawng a thanh.
FFD Drone phu nih February 17 thawk in sml 24 chung Mawphu sakhaan cu Drone in bom lung 40 leng an thlak hnawh hna i KNLA Sniper phu hna zong nih an kah hna caah zarhkhat a rauh hnu Feb 24 zing ah thazang 40 hrawng ralkap pawl nih sakhaan an zaamtak tiah theih a si.IB 349 nih hram an bunhnak Mawphu sakhaan a zaam tak mi ralkap pawl nih Nyaunglaybin pengkomh, Luthaw peng, Hpalatkhu khua um Ku-khu sakhaan zong an zaamtak chih tiah theih a si.
KNLA le FFD phu nih Mawphu sakhaan cu an thianh i 60MM lung 60 le bomrap lung 3 an lak khawh.SAC ralkap Mawphu sakhaan hi KNU Headquarters, Ma-ne-pa-law sakhaan an kaltak hnu kum 2 a rauh hnu, 1997 thawk in kum 27 bak SAC ralkap nih hmunhma an rak khuarnak a si tiah theih a si.
Thawngpang Dang Rak Rel Chih :Hpa An-Myawaddy le Kawkareik Khuachung Kahdohnak Ah SAC Ralkap 30 Leng An Thi, 14 Nih A Sung An Pek.Karen ram, Hpa An-Myawaddy le Kawkareik khuachung kahdohnak ah SAC ralkap sakhaan pawl an lak khawh i ralkap 30 an thi, a sungpe mi ralkap 14 an um i hriam zuun 46 an lak khawh tiah Khit Thit nih a langhter.
2023 December 1 thawk in KNU Brigade 6 hmunhma, Hpa An Myawaddy lam, Kawkareik khuachung um SAC ralkap sakhaan pawl, Gate pawl cu KNLA, PDF, SOF le Drone phu hna bawm in kahdohnak an tuah i nihin tiang hriam a chia mi ralkap 14 an um i a thi mi 30 an phan, dothlennak phu lei in hriamtlai 7 an nunnak a liam. SAC ralkap nih bom a thlak ruang ah mipi 3 an thi ve tiah theih a si.
2023 December 1 ah Kawkareik thlanglei um Kawnuai sakhaan le Hliangwa hlei gate, Kyapan gate, 2023 December 4 ah Kawkreik chaklei um sakhaan No. 3, 2023 December 6 ah Hpa An um Ka-maing-kone ah ralkap nih hmunhma an khuarnak sakhaan hna cu an kah i an lak beh.
2023 December 27 ah Kawkareik, Chaung-ṭaung sang um sianginn ah hmunhma an khuarnak, December 28 ah Taung-kya-inn palek sakhaan, 2024 February 2 ah Hpa An-Myawaddy lam um SAC ralkap sakhaan a si mi Ye-ku-kan le Hsihseng sakhaan pawl an lak khawh tiah theih a si.
Good News :Ramree Kahdohnak Ah Ralkap 60 Leng An Thi.Khuachung kahdoh a fahnak Rakhine ram, Ramree khua ah ralkap 60 leng cu February 24 le 25 ah an thah khawh hna tiah AA nih an thanh.Helicopter 5 in voi 7 tiang ralkap bawmhnak a rak pek mi SAC ralkap battalion 2 in thazang 120 hrawng a si mi SAC ralkap pawl cu an kah hna i 60 leng an thah khawh hna i a tang mi SAC ralkap battalion pawl zong an kah thluahmah hna tiah AA nih a thanh.
Ramree kahdohnak ah a sung tuk mi SAC ralkap pawl cu Southwestern Command kuttang Irrawaddy ramṭhen, Kyonpyaw khua hrambunh LIB 36 battalion le Western Command kuttang Ann khua hrambunh IB 377 nih Helicopter 4 in voi 7 tiang Ramree khua ah thazang a chap hna tiah an thanh.Ramree khua kahdohnak chung in SAC ralkap ruak le kuanzen pawl zong tampi an lak khawh tiah AA nih an thanh.Credit : The Chinland Post