Khampat Khuapi Kahdohnak Ah SAC Ralkap 30 An Thi, Minung 2 An Tlaih Hna
============
Sagaing ramṭhen, Khampat khuapi kahdohnak SAC ralkap 30 an thi i minung 2 an tlaih hna, tiah NUG Ministry of Defence nih an thanh.
A luancia December 10-16 tiang Kalay peng in Tamu peng, Khampat khuapi lei ah rallam a sialmi no. 77 Division Headquater kuttang Khah-Mah-Yah 391 le Khah-Lah-Yah 228 in Major Aung Soe Tu hruaimi SAC ralkap pawl cu tualchung hriamtlai ṭangṭi phu nih nihin December 16, zinglei ah an kah hna i ralkap 30 an thi, 18 hliam an pu i minung 2 an tlaih hna, hriamnam tam ngai an laak khawh, tiah NUG Ministry of Defence nih an fehter.
Khampat khuapi kahdohnak ah cun Sagaing ramṭhen PDF in Special Battalion, pengkomh Battalion, Pah-Kah-Phah, RCDF le CNDF hna an ṭangṭi, tiah NUG Ministry of Defence nih cun an langhter.
Khampat Khuapi Pawng Kahdohnak Ah SAC Ralkap 10 Leng An Thi, Hriamnam Phun 17 an laak khawh.Sagaing ramṭhen, Tamu peng Khampat khuapi lei ah rallam a sialmi SAC ralkap le tualchung hriamtlai ṭangṭi phu kar kahdohnak ah ralkap 10 leng an thi i ṭangṭi phu nih hriamnam phun 17 an laak khawhnak kong NUG Ministry of Defence sin in theih a si.
Sagaing ramṭhen, Tamu pengkomh, Khampat khuapi lei ah SAC ralkap 200 hrawng rallam sial in a kalmi le tualchung hriamtlai ṭangṭi phu cu nihin December 16 zinglei ah an i kap i ralkap hruaitu pakhat telh in minung 10 hrawng an thih pinah SAC lei cu hnu an tolh. Cu kahdohnak ah cun ṭangṭi phu nih MA-10 RPG 7 meithal 1, MG-3 meithal 1, MA-S1 MK2 meithal 1 telh in hriamnam phun 17 an laak khawh, tiah NUG ministry of defense nih an thanh.
Khampat khua pawng kahdohnak ah cun Sagaing ramṭhen PDF in Special Battalion, pengkomh Battalion, Pah-Kah-Phah, RCDF le CNDF hna an ṭangṭi, tiah NUG Ministry of Defence nih an langhter.
SAC Nih Raltuknak Vanlawng Pahnih An Cawk Chap.SAC nih nizan December 15 ah raltuknak vanlawng pahnih an cawk chap i cunglei kahdohnak thazaang chap an i timhnak kong cu SAC tlaihmi Media nih an langhter.
SAC nih raltuknak vanlawng pahnih an cawkmi cu SU-30 SME a si i SAC van ralkap phu an dirh kum 76 tlin lawmhnak an tuah ni ah atu bantukin an langhter.
Van ralkap phu an dirh kum 76 tlin lawmhnak cu nizan December 15, zinglei ah Naypyidaw van ralkap Headquater ah an tuah i SAC Chairman Min Aung Hlaing le Vice Chairman Soe Win hna nih an telpi hna.
A luancia October thla dongh lei ah Shan ramkulh chaklei, Karenni ramkulh, Chin ramkulh le Sagaing ramṭhen telh in Myanmar ram hmunkip ah ralkap sakhan cu tualchung hriamtlai phu nih tam ngai an laak cang ruang ah SAC nih a hlan nakin raltuknak vanlawng tam deuh hman an timh i atu bantukin vanlawng pahnih an cawk chapnak kong an langhter.
Myanmar ram chung hmunkip ah SAC ralkap nih vanlawng hmang in kahdohnak an tuah lengmang ruang ah tualchung mi chung in thi le hliam an tam i inn tam ngai a rawh ruang ah mah khua chuahtak in a zaammi an tam ngaingai cang. Cu pin ah rampi chawlehnak ṭumchuk lei a panh ruang ah a hlan nakin thilman a kai hlei ah eidin lawng si loin datsi le diesel kong ah tualchung mi an lungre a thei ngaingai.
Van ralkap phu dirh kum 76 tlin lawmhnak ni ah cun SAC nih 2022 lioah an rak cawkmi Russia ram ser SU-30, China le Pakistan ser FTC 2000G, KA 28 raltuknak vanlawng le Helicopter hmuhsaknak an ngei i tukum 2023 chung ah an cawk chapmi SU-30 pahnih zong mizapi hmuh ah an langhter.Credit: The Chin Post