Karen Hriamtlai Phu Dihlak Hmunkhat Ah I Fonh Ding In KNU Chairman Nih Sawmnak A Tuah.Karen tlangcung hriamtlai phu vialte hmun khat ah i fonh in lungrual tein rianṭuanṭi ṭhan ding in Karen National Union (KNU) Chairman Padoh Kwe Htoo Win nih Karen hriamtlai phu dang a sawm hna.
Karen National Union (KNU) nih rak hnon mi hriamtlai phu si hna seh, mahte in a chuak mi hriamtlai phu si hna seh hmun khat ah lungrual tein rianṭuanṭi ṭhan a duhnak cu KNU Chairman nih nizan February 20 ni ah mizapi theih ding in a chim.
Karen National Union (KNU) hruainak tang ah rianṭuanṭi cheukhat cu a ruang tampi ruang ah i hmuhthiam lonak tete a rak um ko nain zeibantuk ruang a si hmanh ah aa ṭhencheu mi Karen hriamtlai phu dihlak cu thinglung thar, ruahnak thar he tlukruannak pakhat tang ah um ṭhan dih ding in KNU Chairman nih a sawm hna.
KNU kuttang ah a um mi Karen National Liberation Army (KNLA) lawng si lo in Democratic Karen Buddhist Army (DKBA), KNU/KNLA-PC le BGF tiin Karen hriamtlai phu dihlak kan i ṭhenṭhek nain Karen miphunpi nih aa ruahchan mi a tlam a tlin khawh nakhnga kan ṭuan ko hna, tiah Padoh Kwe Htoo Win nih cun a chim nain Karen National Defence Organisation (KNDO) hruaitu hlun Saw Nerdah Mya hruai mi KTLA kong belte cu a telh in a chim chih lo.
Karen mizapi nih an duh i an i tinh mi chungmang a tlin khawh nakhnga Karen hriamtlai phu le tualchung hriamtlai phu dang vialte kan i fumtom hmasa lawng ah teinak kan hmuh khawh lai, tiah Padoh Kwe Htoo Win nih cun a chim chap.
Karen hriamtlai phu a si mi Karen National Union (KNU), Democratic Karen Buddhist Army (DKBA), KNU/KNLA-PC le BGF pawl i fumtom in hmun khat ah rianṭuanṭi ding in kum 10 leng ceihmainak an rak ngei cang nain nihin tiang an i fonh kho rih lo.Credit : The Chin Post