SAC Nih Ralkap Tlakternak Upadi An Ser Hnu Ah Mino Tampi Hriamtlai Phu Sin Ah An Lut. SAC nih ram mi ralkap tlakternak upadi an ser hnu ah mino tampi cu dohthlennak hriamtlai phu PDF sin ah a lut mi an tam, tiah PDF nih an chim.
SAC nih upadi an ser hnu in NUG Kuttang PDF, Black panther Column, MDY-PDF, BLDF, Hinthata PDF, Ayeyarwaddy Revolution Front, ATC, BNRA le KNLA nih dohthlennak ralkap thar ca ah auhnak an tuah ve i a sok mi an tam, tiah theih a si.
Dohthlennak hriamtlai phu a si mi BLDF sin ah mino 200 hrawng min an i pe i, a dang PDF sin ah zong ah mino tampi min an i pe, tiah theih a si.
BLDF page in dohthlennak hriamtlai phu sin ah luh a duh mi sok khawh a si tiin thawng kan thanh sin tein ni khat chung ah mino 200 hrawng min an i pe colh. Dohthlennak kum thum chung ah mizapi dohthlennak ah an i tel ko ti a langhnak a si, tiah BLDF ṭuanvo ngeitu nih Ayeyarwaddy Times ah a chim.
Ramkulh le ramṭhen ah a um mi PDF Battalion sakhan ah mino tampi an lut cang i humhimnak ruangah an luhnak sakhan le hmunhma cu kan thanh rih lo, tiah PDF nih cun an chim.Crd:The Chin Post
Thawngpang dang: February 16, ah Hakha City Council nih SAC ralhrang nih February 10, ah cathanh an chuahmi ” People´s Military Service Law Of 2010 “, kumtling mizapi ralkap luh ding timi phung thar cu kan doh, hi bantuk in mizapi zalonak le himnak a hnorsuangtu ralhrang rianṭuannak phung cu kan cohlang lo tiah cathanh an chuah.
Hakha City Council nih mizapi humhimnak le dirkamhnak kong he pehtlai in a tanglei bantuk in sawmnak le theihternak an langhter.
CDF-Hakha, Brigade 4 le HCC rianṭuannak nih lungthin a thlek kho cangmi mino hna lunglawm tein kan in don hna. Miphun le ram nih na sining le na thazaang a herh zungzal. 2. Himnak hmuh ding lam a kawlmi nan caah cawlcangh ning, ṭhutdirnak le kalumnak kong hna zong timhlamh a si.
Hi rianṭuannak he pehtlai in a lam kip in bawmh a herh lai caah pumpak, chungkhar, bu le phu in dirkamh ding zong kan in sawm hna.Crd:LMP