Gangaw Peng Myitta Dam SAC Ralkap Sakhan Kahnak Ah SAC Ralkap 4 An Thi Hriamnam An Lak Chih
===========
Magway ramṭhen, Gangaw peng um, Myitta Dam SAC ralkap sakhan cu December 22 zinglei ah Chin hriamtlai phu pawl nih an laak tiah theih a si.
Myitta Dam um SAC ralkap pawl hi Gangaw hrambunh LIB 50 ralkap pawl an si hna i an sakhan cu ZZLMS phu a si mi, CDF-Zophei, CDF-Zotung, CDF-Lautu, CDF-Mara, CDF-Senthang, CDF-Mindat, CNDF, CDF-KKG le Gangaw peng PDF, Unbroken Generation hna bawm in December 22 zing ah an kah i an laak. Sakhan in a zaam mi SAC ralkap pawl zong an dawi hna tiah theih a si.
Myitta Dam SAC ralkap sakhan kahdohnak ah SAC ralkap Fighter pathum nih bomb an thlak pin ah sakhan chung um ralkap nih hriamngan an kah ve hna. Chin hriamtlai phu lei in meithal zuun 4, Drone kahnak pakhat, bom, kutcheh bom, kuan le zen le RPF kuan zen an lak.CDF-Mindat ralkap mi 1 nih ram caah nunnak pek i hliamhma pum mi zong an um tiah ZZLMS he naihniam mi sin in theih a si.
Chin ramkulh, Matupi pengkomh, Rezua khua um SAC sakhan cu ZZLMS operation in Chin mipi ralkap ṭangṭi phu hna nih an kah hna i November 29 zing 10:00am an rak lak khawh.
November 25 ni ah Rezua SAC sakhaan hi kah hram an thawk i November 29 ni tiang ni 5 chung ah sakhaan an lak khawh hi a si. SAC lei nih Rezua khua lak kho lo ding in November 28 zanlei 3:00 pm le November 29 ni tiang vanlawng in bom 20 hrawng a thlak tiah mipi ralkap sin in theih a si.
Rezua kahnak ZZLMS operation ah CDF-Zophei, CDF-Zotung, CDF-Lautu, CDF-Mara, CDF-Senthang, CNA, Matupi( B-2), CDF- Hualngoram, CDF- Hakha, ThanTlang Drone team le CDF-Asho tiah Chin mipi ralkap ṭangṭi phu hna an i tel.
Chinland mipi ralkap ṭangṭi rual hna nih Chin-Magwe ramri um Hakha peng Bungzung sakhan zong December 18 ni ah an lak khawh i SAC ralkap Captain telh in 6 a nung in an tlaih hna , SAC ralkap 10 an thi tiah CDF-Hakha sin in theih a si.
Nyaunglaybin Pengkomh Nattankung Peng Cu Mipi Ralkap Uknak Tang Ah A Um Cang.Nichuah Bago ramkulh, Nyaunglaypin pengkomh chung um Nattankung peng-Myo cu KNU le PDF tangti mipi ralkap uknak tang ah a um cang tiah PDF no 2 Brigadier Deputy Commander nih a chim.
Sittaung tiva nichuah lei um Nattankung peng cu December 26 zing ah KNU le PDF ṭangṭi mipi ralkap nih an lak cang tiah PDF No. 2 Brigadier Deputy Commander nih a chim.
Bago ramkulh, Kyuakkyi pengkomh Nattankung peng cu mipi ralkap nih an lak i SAC lei nih vanlawng zong in bom a thlak len tiah theih a si.
December 26 zing ah Nantankung khua cu mipi ralkap nih an lak khawh. Nattankung khua lak nak ah KNLA, PDF hna an i bawm. Nattankung khuachung um palek sakhan zong an lak chih. A tu hi Khuapi chung thianhlimhnak an tuah lio a si tiah Yangonn Khit Thit Media sin in theih a si.Credit: The ChinLand Post