Chaklei Hriamtlai Unau Thum Nih Kahdohnak Ah An Lung An Ṭhulh Lonak Kong An Thanh
===========
SAC chimnak nawlngeitu Zaw Min Htun nih Chaklei hriamtlai unau thum he biaruahnak kan ngei tiin a chim tlawmpal ah, chaklei hriamtlai unau thum nih 1027 Operation kong ah an lung an ṭhulh lonak kong an thanh ve.
Shan ramkulh chaklei SAC ralkap sakhan 4 le Chin ramkulh Paletwa ralkap sakhan 1 an laaknak kong cu Ta’ang ralkap TNLA, Rakhine ralkap AA le Kokang ralkap MNDAA unau thum nih nizan December 11 zanṭim ah an thanh i SAC nawlngeihnak a hram bongh ding in timhlamhnak an ngeihnak kong an langhter chih.
1027 Operation ni 46 tiang kahdohnak thawngpang khawmhsuatnak ngeih a si i Operation rak kalpi ni thawk in kahdohnak, a dikmi ramkhel chuahternak le Myanmar rammi nih i tinhmi SAC nawlngeihnak a hram bongh ding in kanmah unau thum nih lungṭhul lo in hmainor in kan kalpi ko, tiah hriamtlai phu unau thum nih an thanh.
Nizan December 11 cu 1027 Operation ni 46 tlinnak ni a si bantukin hramhram in tualchung mi a thatnawngtu SAC ralkap pawl sakhan vialte kan laak dih lai i, hriamnam chiah a duh lomi ralkap vialte zong an hram kan bongh dih hna hlan tiang kahdohnak ngol lo in kan kalpi lai, tiah unau thum nih cun an thanh.
Hriamnam chiah duh lo in a zaammi ralkap pawl cu kan kawl cuahmah hna i hriamnam he mipi sin ah aa fonhmi palik, ralkap le Pyituhsit pawl cu hriamtlai phu unau thum nih ṭha tein kan zohkhenh hna pinah kal an duhnak hmun cio ah humhimnak kan laakpiak hna, tiah an thanh chih.
SAC chimnak nawlngei Zaw Min Thun nih, China cozah bawmhnak thawng in chaklei hriamtlai phu thum he tonbiaruahnak kan ngei kho. A ralaimi December thla dongh ah kaphnih kar tonbiaruahnak ngeih ṭhan kan i tim i ramkhel phunglam he kahdaihnak kong ceihkhan ṭhan ding in timhlamhnak kan ngei, tiah a chim hnu in atu bantukin chaklei hriamtlai phu unau thum nih an thanh ve.
Pale-Gangaw Motor Lampi Ah Khualtlawng Mi 400 Hrawng An Taap .Sagaing ramṭhen, Pale-Gangaw motor lampi ah khualtlawng mi 400 hrawng cu zarhkhat leng an taap cang, tiah theih a si.
Magway ramṭhen, Gangaw peng le Htilin peng ah kahdohnak a um i Pale peng chung ah khualtlawng mi 400 hrawng cu zarkhat leng an taap cang. Eidin tirawl kong ah harnak an tonnak kong cu tualchung mi hna nih People’s Spring ah an chim.
Khualtlawng mi hna cu Pale peng chung ah an i dor chung i mi tam deuh cu Hakha, Kalay le Tamu khuami an si hna. Pale peng mi hna nih nikhat nihnih cu tirawl an rin ko hna nain zarhkhat leng an taap cang caah eidin tirawl a har cangnak kong Pale peng mizapi ukhruainak phu in ṭuanvo ngeitu nih a chim.
Khualtlawng mi a taapmi hna cu Pale peng mizapi ukhruainak phu, peng mi bawmchantu, Pah Ah Phah le Pah Kah Phah hna nih kyats sing 8 an bawmh hna, tiah theih a si.Credit : The Chin Post