Chaklei Hriamtlai Phu Unau Thum Nih SAC Ralkap Sakhan 422 le Khuapi 7 An Laak Khawh Cang
==========
Chaklei hriamtlai phu Kokang ralkap MNDAA, Ta’ang ralkap TNLA le Rakhine ralkap AA nih Rakhine ramkulh le Shan ramkulh chaklei ah SAC ralkap sakhan 422 le khuapi 7 an laak khawhnak kong cu chaklei hriamtlai phu nih fehter in an thanh.
Chaklei hriamtlai phu unau thum nih Shan ramkulh ah 1027 Operation an kalpi hnu ni 47 chung ah ralkap sakhan 280 leng le ralkap nih an ukmi khuapi cheukhat telh in China-Myanmar ramri chawlehnak Gate cheukhat zong an laak khawh.
Chinshwehaw, Phaungsai, Pansai, Monekoe, Kwanlone, Konekyan le Theinni khuapi 7 cu chaklei hriamtlai phu thum nih an laak i Muse meng 105 sakhan telh in Shanram chaklei sakhan zong an kah lio kong cu phungning tein an thanh. Nizan December 14 ah Shanram chung le Rakhine ramkulh hna ah kaphnih kar kahdohnak a fak ngai, tiah theih a si.
Chin ramkulh chung Paletwa ralkap sakhan telh in Rakhine ramkulh ah 1027 Operation thawk ni October 27 in December 10 tiang, ni 45 chung ah SAC ralkap sakhan 142 kan laak khawh, tiah Rakhine ralkap AA nih sakhan an laak cangmi min cazin langhter in phungning tein December 13 ah an thanh ve.
Western Union In Tangka Kuatmi Paoh Hakha KBZ Bank Ah Fawi Tein In Chuah Khawh A Si Ti Lo.Chin ramkulh, Hakha KBZ bank ah Western Union in tangka kuatmi paoh cu duh paoh in chuah khawh a si lo, tiah tualchung mi hna sinin theih a si.
Wester Union in tangka kuatmi chuah duh ahcun zanlei suimilam 1:00 in KBZ nih pehtlaihnak ca ah an chiah mi phone number ah chawnh cio a si. Cu hmanh ahcun token ca lawng a si rih. Phone number pekmi a chawn khotu lawng nih token an ngei kho i a thaizing ah tangka va chuah a si, tiah Western Union in tangka a chuah kho lomi pakhat nih The Chin Post ah a chim.
Western Union in tangka chuah duh ahcun zanlei suimilam 1:00 in chawnh khawh a si an ti nain 2:40 tiang hmanh ah an phone a lawng lo, tiah a chim chap. Cu pinah Hakha KBZ bank ah a tam bik tangka kyats sing 3 lawng chuah a khawh a si i SAC kuttang Myanmar Economics Bank ah a tam bik kyats sing 20 lawng chuah khawh a si, tiah theih a si.
SAC Nih Nawlngeihnak An Laak Hnu In Tualchung Mi Inn 80,000 Deng An Khangh Cang.SAC nih nawlngeihnak an laak hnu in SAC ralkap le an kuttang mi hna nih 2023 November 30 tiang ah inn 77,274 an khangh cang, tiah Data For Myanmar nih December 13 ah an thanh.
Data For Myanmar nih an laakmi cazin ning ah 2023 January thla in inn khangh a tlawm deuh. 2021 February 1 in 2023 July 31 tiang ah Sagaing ramṭhen chung ah inn 57,503 an khangh i ramṭhen le ramkulh ah khangh tam bik a si, tiah an langhter.
2023 kum thawk in SAC ralkap nih inn an khanghmi a tlawm deuh cangnak a ruang hi ralkap thazaang a zor tuk cang caah a si tiin a zumhnak kong Welet peng PDF ṭuanvo ngeitu nih RFA ah a chim.
SAC nih nawlngeihnak an laak hnu in 2023 July 31 tiang ah SAC ralkap le an kuttang nih tualchung mi inn 74,074 an khangh tiin August 9 ah Data For Myanmar nih cun an rak langhter cang. Cu an langhter mi ningin tuak tikah 2023 November 30 tiang thla li chung lawng ah inn 2,400 an khangh chap.
SAC ralkap nih inn 80,000 deng an khangh cang nain chimphuannak nawlngeitu Zaw Min Tun nih cun SAC ralkap nih inn pakhat hmanh an khang lo i tualchung mi inn lo tu an runven tiah a chim.Credit: The Chin Post