Gangaw Peng Ah I Thup Dingin A Rak Chuak Mi SAC Ralhrang An Kah Hna 6 An Thi
=========
Magway ramṭhen, Gangaw peng chaklei ah i thup dingin a rak chuakmi SAC ralhrang an kah hna 6 an thi, tiah Chinland Defense Force – Kalay Kabaw Gangaw – CDF KKG sin in kan theih. December 21, zinglei sangah Gangaw peng chaklei hmunram Tawlay khua ah a ummi SAC ralhrang hna i thup dingin a rak chuakmi cu mipi ralkap phufonh nih an kah hna 6 an thi, tiah kan theih.
Kahdohnak ah aa telmi hriamtlai phufonh hna cu CDF – KKG battalion 4 hriamtlaiphu le Gangaw peng Pah Kah Phah ṭangṭi phufonh hna an si, mipi ralkap hliamtuar loin hnu an kir tiah an langhter.
Gangaw Peng Myint Thar Dam SAC Ralkap Sakhan Cu Chin Hriamtlai Phu Nih An Laak. Magway ramṭhen, Gangaw peng um Myint Thar Dam SAC ralkap sakhan cu nizan December 22 zinglei ah Chin hriamtlai phu nih an laak, tiah theih a si.
Myin Thar Dam um SAC ralkap pawl cu Gangaw hrambunh Khah Lah Yah 50 an si i an sakhan cu ZZLMS; CDF-Mindat, CNDF, CDF-KKG le PDF hna i bawm in an kah i an laak. Sakhan in a zaammi SAC ralkap pawl zong an dawi hna, tiah theih a si.
Myint Thar Dam SAC ralkap sakhan kahdohnak ah SAC ralkap Fighter pathum nih bomb an thlak pinah sakhan chung um ralkap nih hriamngan an kah i, Chin hriamtlai phu lei in hliamhma pumi an umnak kong CDF – KKG he naihniam in a ummi pakhat nih The Chin Post ah a chim.
!
Myint Thar Dam kahdohnak ah CDF Mindat in rallam hruaitu pakhat a nunnak a liam, tiah theih a si. Myint Thar Dam um SAC ralkap hi kum khat leng chung umhmun an khuar cang i Gangaw khua chung ah motor in ral an va ven tawnnak kong tualchung mi hna nih an chim.
CDF-KKG Nih Christmas Donnak An Tuah, Bungzung Sakhan Le Yangyiaung Sakhan Laak Kahdohnak Zong Ah An I Tel Ve. Chinland hrambunh CDF-KKG battalion 4 in Ṭet-khuai(2) le (3) nih aluan ciami ni ah Christmas donnak kan tuah, tiah nihin December 22 ah thawng an thanh.
Aluan ciami November thla ah Kalaymyo thlanglei, CDF-KKG battalion No.3 nih an cawlcanghnak hmunram chung ah ummi Yangyiaung hrambunh SAC ralhrang sakhan cu CDF-KKG, CNDF le tualchung hriamtlai ṭangṭi phu hna he an kahdoh i an laak khawh, tiah kan theih.
Cu kahdohnak ah SAC ralhrang chungtel 16 an thi i, 17 an tlaih hna pinah hriamnam tampi le ralthuam tamngai zong an laak chih khawh. Kahdohnak ah CDF-KKG in minung 2 le CNDF in minung 1 nih an nunnak an pek i tualchung hriamtlai ṭangṭi phu in minung 7 nih hliamhma an tuar, tiah kan theih.
Cu bantuk ṭhiam in Hakha peng Bungzung khua um SAC ralhrang sakhan cu Chin ralkap CNA, CDF-Hakha, CDF-Thanthlang le CDF-KKG nih December 17 in 18 tiang an kahdoh i an laak khawh. Sakhan laak kahdohnak ah SAC ralhrang bawi 1 telh in 6 an tlaih hna i, 8 an thi pinah hriamnam tampi zong an laak chih khawh, tiah kan theih.
Mindat Khuapi Ah SAC Ralhrang Nih Tualchung Mi 4 An Tlaih Hna. Chin ramkulh, Mindat khuapi ah SAC ralhrang chungtel hna nih December 21 zing ah kum 40 tluk nupa hna le mino 2 an dihlak minung an tlaih hna, tiah theih a si.
“Mino 2 hna cu mizei an si ti theih a si rih lo. Nupa hna cu thilzuar mi an si i atu tiang pehtlaih khawh an si rih lo” tiah mithmutu pakhat nih The Mindat Post ah a chim. Mindat khuapi ah minung 4 (Pa 3 le nu 1) hna cu zeiruang ah an tlaih hna timi theih a si rih lo. Aluan ciami October thla zong ah SAC chungtel hna nih an tlaihmi kum 16 pa pakhat cu an hremnak ah a nunnak a liam, tiah theih chih a si.
SAC ralhrang chungtel hna nih an thahmi pa pakhat ruak cu kan la kho thai loh, tiah a chungkhar hna nih an chim. SAC ralhrang nih nawlngeihnak a laak kum 2 le cheu chung ah Mindat khuapi telh in a dang khuapi hna zong ah SAC ralhrang nih Mindat tualchung mi 60 leng an tlaih cang hna i thong ah an thlak hna, tiah theih chih a si.