Faak Deuh In Kahdohnak Kan Tuah Cang Lai Caah Hriamnam Rak Chia U Tiah Chaklei Ṭangṭi Phu Thum Nih An Thanh!
==========
SAC Ralkap Tank 5 Kan Lak Cang Tiah MNDAA Nih A Chim. Kokang kahdohnak ah SAC ralkap tank 5 kan lak khawh tiah MNDAA biachimnak nawl ngeitu Ly Kyarwen nih a chim. Operation 1027 chung in SAC ralkap tank 5 an laknak hmun cu; Phongsai lei ah tank 3 kan lak i, tank 2 cu kan hrawh , pakhat cu kan fim ko tiah Ly Kyarwen nih People’s Spring ah a chim chap.
Chin-shwe-haw ah SAC ralkap sakhaan umnak Maciatapuakpuak tlang cung kahdohnak zong ah tank 2 an hrawh cang tiah October 28 ni ah MNDAA nih an rak langhter. MNDAA le unau hawikom ralkap phu hna nih October 27 in an thawk mi Operation 1027, nili chung kahdohnak ah SAC sakhaan 76 an lak tiah MNDAA sin in theih a si.
Chaklei hriamtlai ṭangṭi phu thum nih operation 1027 cu hinak faak deuh in kalpi an timh caah SAC ralkap pawl cu an hriamnam chia(surrender) dingin nizan October 31 ah ralrin peknak an tuah leng ah an sinah a rak i fonmi SAC ralkap cu an nun himnak zong ṭha tein an zohkhenh hna lai kong an thanh.
“Kan sinah hriamnam a chia mi le kan tlaihmi hna cu hremnak, tukvelhnak le harnak kan pe hna lai lo i an chungkhar sin i an kir khawh naklai kan tawlrelpi hna lai. An tlunkalnak ah a dih heumi zong kan rin hna lai i hliamhma a pu i a dam lomi zong kan thlopbul hna lai,” tiah an langhter.
Oepration 1027 kan thawk ni in SAC ralkap sakhan 80 leng kan laak cang i Chinshwehaw, Hpaungsai le Theinni khuapi cu a dihlak in kan kuttang ah a um cang. SAC ralkap lei in chungkhar ning piin kan sin a rak i fonhmi 100 leng an si cang, tiah ṭangṭi phu thum nih cun thanhnak an tuah.
Chaklei hriamtlai ṭangṭi phu thum MNDAA, TNLA le AA nih operation 1027 an thawk ni October 27 zinglei suimilam 4:00 in nichuah chaklei SAC ralkap headquarter a umnak Lashio telh in Kunlong, Theinni, Chinshwehaw, Laukkaing, Namkham le Kautkaing khua um SAC ralkap sakhan cu hmakhatte ah an rak kah.
Kyaiktha Peng Khuate Hna Cu SAC Ralhrang Nih Hriamngan In Ankah Hna Caah Kum 5 Tang Ngakchia Telhchih In Mipi 11 Hliam An Tuar. Bago ramṭhen, Nyaunglaypin peng, Mon ramkulh le Kyaiktha peng khuate cheukhat hna cu SAC ralhrang nih hriamngan in ankah hna caah kum 5 tang ngakchia telhchih in tualchungmi 11 hliam an tuar tiah KNU nih a langhter.
October 30, zaanlei suimilam 3:30 tluk khan SAC ralhrang battalion 264 nih Tharyarkone in hriamngan 120 MM 2 ankah micu Taungkhin khua chungkhar khuasaknak inn cung a tlak caak unau pahnih kum 13, kum 18 nu le hringtu apa kum 55, a nu kum 58 nih hliam an tuar tiah theih asi.
Cu pinah October 30, zaan suimilam 8:12 tluk khan SAC ralhrang unit 20 nih Nyaunglaypin sakhan in 122 MM , 81 MM hriamngan lung 19 cu mipi umnak hmunhma tingchih in ankah tiah theih chih asi.
SAC ralhrang hriamngan kahmi nih khuate Pyinyaegyi, Gwaykone , Yephyokan, Nyaunglaypin khua le Meelaungkone khua hna hi aa khenh hna caah Yephyokan khua ah kum 1 le cheu pa ngakchia, kum 3 tluk nu ngakchia, hringtu a nu kum 28 le hringtu a pa kum 27 nih hliam an tuar tiah NUG nih a langhter.
Cu bantuk ṭhiam in October 22, zing suimilam 6:30 tluk khan Mon ramkulh, Kyaiktha peng SAC ralhrang No, 2 in hriamngan 2 tualchung mipi umnak khua tinhin ankah caah mipi 3 nih hliam an tuar inn pakhat a rawk tiah theih asi.
Yedashe Peng Ah Kahdohnak Voi 11 A Chuak SAC Ralhrang Ralbawi Commander 2 Telchih In 80 Naak Tlawmlo An Thi. Bago ramṭhen, Yedashe peng ah SAC ralhrang le mipi ralkap karlak ah kahdohnak voi 11 a chuak ralbawi 2 telhchih in SAC ralhrang lei 80 naak tlawmlo an thi tiah NUG Ministry of Defence nih an langhter.
October thlachung khan Yedashe peng ah mipi ralkap PDF Pawani rallam in ṭangṭi phufonh (joint force) le SAC ralhrang karlak ah kahdohnak voi 11 a chuak ralbawi 2 telhchih in SAC ralhrang 80 naak tlawmlo an thi 34 naak tlawmlo nih hliam an tuar tiah theih asi.
Pawani rallam in ṭangṭi phufonh (joint force) mipi ralkap chungin kahdohnak hmun ah minung 2 an nunnak a liam 4 nih hliam an tuar RPG le 60 MM mipi ralkap nih anlak, SAC ralhrang hriamngan kahnak in tualchungmi pakhat nunnak liam khuasaknak inn 2 a rawk mipi 550 tluk hmunhimnak ah anzaam tiah theih asi.
MNDAA, TNLA, AA Hna He Aa Ruang Tein Kahdohnak Tuah Ding In CNF Nih Forhfialnak A Thanh. Shan ram chaklei ah an kalpi cuahmah mi Operation 1027 he aa ruang tein kahdohnak tuah hna usih tiah CNF nih cathanh a chuah.
Unau hawikom phu (MNDAA, TNLA, AA) nih mipi an i ruahchan mi hramhram uknak a hram in hrawh khawh nakhnga mipi innlo, thilri mansung, mah hmunhma te uk khawh nak, SAC vanlei kahdohnak kham khawh nak, online in mihlen hmang pawl hrawh khawh nakhnga tiah SAC ralkap le pyithusit pawl an ṭhawl khawh nakhnga Operation 1027 an tuah mi cu kan hnatlak pi tiah cathanh ah an langhter.
October 27 in unau hawikom phu nih an thawk mi Operation 1027 chung ah SAC ralkap sakhaan tampi le hriam, kuanzen tampi an lak khawh i teinak an hmuh thluahmah mi cung ah kan lunglawmh pi i teinak thandar a thlir khawh nakhnga saduhthahnak nganpi kan ngei ve tiah cathanh ah an ṭial.
SAC nih hramhram in uknak a lak mi hi hramhram uknak a hram in hrawh khawh nakhnga le tlangcung miphun vialte nih kan i ruahchan mi ramkhel phung sernak caah kan hmuh bal lo mi caan ṭha bik a si caah hi bantuk caan ṭha hi ṭha te’n hmang in unau hawikom phu he aa ruang tein kahdohnak tuah hna usih tiah forhfialnak cathanh a chuah.